ମାର୍ଶାଘାଇ,୩।୨(ଡି.ଏନ.ଏ.): ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ମାର୍ଶାଘାଇ ବ୍ଲକର ୨୪ ଟି ପଞ୍ଚାୟତରେ ରାଜନୈତିକ ଉଷ୍ମତା ବୃଦ୍ଧି ପାଇବାରେ ଲାଗିଛି। ନିର୍ବାଚନ ଲଢୁଥିବା ପ୍ରାର୍ଥୀମାନେ ଚିହ୍ନ ପାଇବା ପରେ ପ୍ରଚାରକୁ ଜୋରଦାର କରିଛନ୍ତି। ପ୍ରାର୍ଥୀମାନଙ୍କ ସମର୍ଥକମାନେ ଗାଁକୁ ଗାଁ ଛକ ଜାଗା ଓ ରାସ୍ତା କଡରେ ବାଉଁଶ ପୋତି ଫ୍ଲେକ୍ସ ଓ ବ୍ୟାନର ଲଗାଇ ସାରିଲେଣି। ଗାଁ ଗାଁରେ ଭୋଜି ଭାତର ଆସର ଜମିବାକୁ ଲାଗିଲାଣି। ପ୍ରତ୍ୟେକ ଚା, ପାନ ଦୋକାନ ଓ ଛକ ବଜାରରେ ସମର୍ଥକମାନଙ୍କ ଦ୍ୱାରା ରାଜନୈତିକ ଅଙ୍କ କଷା ଜୋର ଧରିଛି। କରୋନା କଟକଣାକୁ ପଛରେ ପକାଇ ପ୍ରାର୍ଥୀମାନେ ଘରକୁ ଘର ବୁଲି ନିଜ ସପକ୍ଷରେ ଭୋଟ ଭିକ୍ଷା କରୁଛନ୍ତି। ବ୍ଲକର ବିଭିନ୍ନ ପଞ୍ଚାୟତରେ କ୍ଷମତା ଓ ଆସନ ପାଇଁ ହେଉଥିବା ଲଢେଇରେ ରାଜନେତାମାନେ ନିଜ ପ୍ରାର୍ଥୀଙ୍କ ସପକ୍ଷରେ ଭୋଟ ଦେବାକୁ ଭୋଟରଙ୍କୁ ପ୍ରବର୍ତ୍ତାଉଛନ୍ତି। ସ୍ବାମୀ କ୍ଷମତାରେ ଥିବା ପଞ୍ଚାୟତଟି ଯଦି ମହିଳାଙ୍କ ପାଇଁ ସଂରକ୍ଷିତ ହୋଇଛି ତେବେ ସ୍ବାାମୀ ସ୍ତ୍ରୀଙ୍କୁ ପ୍ରାର୍ଥୀ କରିଥିବା ଦେଖିବାକୁ ମିଳୁଛି। ବିଶେଷ କରି ନିର୍ବାଚନ ମଇଦାନରେ ବର୍ତ୍ତମାନର ସରପଞ୍ଚ ଓ ସମିତି ସଭ୍ୟମାନେ ନିଜ ନିଜ ଦବ୍ଦବା ରଖିବାକୁ ପରିବାର କୈନ୍ଦ୍ରିକ ରାଜନୀତି କରୁଥିବା ଦେଖିବାକୁ ମିଳୁଛି। ଅନେକ ସ୍ଥାନରେ ପୁରୁଖା ନେତାମାନେ କ୍ଷମତା ଲୋଭରେ ପ୍ରାର୍ଥୀ ହେବାକୁ ସୁଯୋଗ ହାତଛଡା କରିନାହାନ୍ତି। କ୍ଷମତା ଲଢେଇରେ ଗାଁ ଗାଁ ତଥା ଭାଇ, ବନ୍ଧୁ, ସାଙ୍ଗମାନଙ୍କ ମଧ୍ୟରେ ଶତ୍ରୁତା ଓ ନିର୍ବାଚନୀ ହିଂସାକୁ ମଧ୍ୟ ଏଡାଇ ଦିଆଯାଇ ନ ପାରେ। ତେଣୁ ପ୍ରଶାସନ ଶାନ୍ତି ଭଙ୍ଗକାରୀଙ୍କ ଉପରେ କଡା ନଜର ତଥା ଶାନ୍ତି ଶୃଙ୍ଖଳା ସହ ନିର୍ବାଚନ ଶେଷ ପାଇଁ ବୁଦ୍ଧିଜୀବୀମାନେ ଦାବି କରିଛନ୍ତି।