ନୟାଗଡ଼ ଅଫିସ,୧୩।୧: କରୋନାର ତୃତୀୟ ଲହର ସମୟରେ ପଞ୍ଚାୟତ ନିର୍ବାଚନ ଭୋଟରଙ୍କ ଭୟ ବଢ଼ାଇଛି। ତଥାପି ନିର୍ବାଚନ ବିଗୁଲ୍ ବାଜିବା ପରେ ନେତା ଓ ଆଶାୟଙ୍କ ଉତ୍କଣ୍ଠା ବଢ଼ିଛି । ବିଶେଷ କରି ଶାସକ ଦଳର କର୍ମୀ, ନେତା ଓ ସମର୍ଥକ ବେଶୀ ଖୁସି ଥିବା ପରିଲକ୍ଷିତ ହୋଇଛି । ଜିଲା ପରିଷଦ ସଭ୍ୟ ଆସନକୁ ହାତେଇବାକୁ ନେତାମାନେ ବେଶୀ ଆଗ୍ରହୀ । କାରଣ ବିଧାୟକ ଟିକେଟ୍ ପାଇଁ ଜିଲା ପରିଷଦ ସଭ୍ୟଙ୍କ ବିଜୟ ମାପକାଠି ହୋଇପାରେ। ଏପରି ସ୍ଥଳେ ନିର୍ବାଚନ କମିଶନର ଭୋଟ ଗ୍ରହଣ ତାରିଖ ଘୋଷଣା କରିଛନ୍ତି । ଫେବୃୟାରୀ ୧୬ ପ୍ରଥମ ପର୍ଯ୍ୟାୟ ନିର୍ବାଚନ ଓଡ଼ଗାଁ ବ୍ଲକରେ ହେବ । ସେହିପରି ୧୮ରେ ଦ୍ୱିତୀୟ ପର୍ଯ୍ୟାୟ ନିର୍ବାଚନ ରଣପୁର ବ୍ଲକରେ ହେବାକୁ ଥିବାବେଳେ ୨୦ରେ ତୃତୀୟ ପର୍ଯ୍ୟାୟ ନିର୍ବାଚନ ନୟାଗଡ଼ ବ୍ଲକରେ ହେବ। ୨୨ରେ ଚତୃର୍ଥ ପର୍ଯ୍ୟାୟ ନିର୍ବାଚନ ନୂଆଗାଁ, ଦଶପଲ୍ଲା ଓ ଗଣିଆ ବ୍ଲକରେ ହେବ ବୋଲି ଘୋଷଣା କରାଯାଇଛି । ଅନ୍ୟପକ୍ଷେ ୨୪ରେ ଶେଷ ପର୍ଯ୍ୟାୟ ନିର୍ବାଚନ ଖଣ୍ଡପଡ଼ା ଓ ଭାପୁର ବ୍ଲକରେ ହେବ। ଅପରପକ୍ଷେ ଅନାସ୍ଥାଭୋଟରେ ପରାଜୟର ଭୟକୁ ରୋକିବାକୁ ନିଜ ସମର୍ଥିତ ପ୍ରାର୍ଥୀ ବିଜୟୀ ହେବାକୁ ବିଭିନ୍ନ ଦଳ ପକ୍ଷରୁ ଗୁରୁତ୍ୱ ଦିଆଯାଇଛି। ଏଣୁ ତୃଣମୂଳସ୍ତରରେ ପ୍ରତି ରାଜନୈତିକ ଦଳ ସଙ୍ଗଠନକୁ ଗୁରୁତ୍ୱ ଦେଇଛନ୍ତି। ଶାସକ ଦଳରେ ଯେପରି ଅସନ୍ତୁଷ୍ଟ ପ୍ରାର୍ଥୀ ନ ରହିବେ ସେଥିପ୍ରତି ଗୁରୁତ୍ୱ ଦିଆଯାଉଛି। ହେଲେ ଟିକେଟ୍ ନ ମିଳିଲେ ଅସନ୍ତୁଷ୍ଟ ବଢ଼ିବେ ବୋଲି କେତେଜଣ ଶାସକ ଦଳର କର୍ମୀ ନିଜ ନଁା ଗୋପନ ରଖି ପ୍ରକାଶ କରିଛନ୍ତି। ଯଦିଓ ପଞ୍ଚାୟତ ନିର୍ବାଚନରେ ସରପଞ୍ଚ, ସମିତି ସଭ୍ୟ ଓ ୱାର୍ଡ ସଭ୍ୟ ପାଇଁ ଦଳୀୟ ଚିହ୍ନ ନ ଥାଏ ତେବେ ପ୍ରାର୍ଥୀମାନେ ବିଭିନ୍ନ ରାଜନୈତିକ ଦଳର ସମର୍ଥନରେ ନିର୍ବାଚନରେ ବିଜୟୀ ହୋଇଥାନ୍ତି । ସେହିପରି ପରୋକ୍ଷ ନିର୍ବାଚନ ମାର୍ଚ୍ଚ୧୧ରେ ନାଏବ ସରପଞ୍ଚ, ମାର୍ଚ୍ଚ ୧୨ରେ ବ୍ଲକ ଅଧ୍ୟକ୍ଷ, ମାର୍ଚ୍ଚ୧୩ ଜିଲା ପରିଷଦ ସଭାପତି, ମାର୍ଚ୍ଚ୨୩ ବ୍ଲକ ଉପାଧ୍ୟକ୍ଷ, ମାର୍ଚ୍ଚ ୨୫ ଜିଲା ପରିଷଦ ଉପସଭାପତି ନିର୍ବାଚନ ହେବ। ସୂଚନାଯୋଗ୍ୟ, ଜିଲାର ୮ ବ୍ଲକ୍ରେ ୮ ଅଧ୍ୟକ୍ଷ, ୧୯୪ ଜଣ ସରପଞ୍ଚ, ୧୯୪ ସମିତି ସଭ୍ୟ, ୨୪ ଜିଲା ପରିଷଦ ଆସନ ପାଇଁ ନିର୍ବାଚନ ହେଉଛି । ଅନ୍ୟପକ୍ଷେ ନୟାଗଡ଼ ବ୍ଲକରେ ୪୩୫, ଓଡ଼ଗାଁ ବ୍ଲକରେ ୫୭୪, ଦଶପଲ୍ଲା ବ୍ଲକରେ ୨୭୬, ନୂଆଗାଁ ବ୍ଲକରେ ୩୪୩, ଗଣିଆ ବ୍ଲକରେ ୧୧୯, ରଣପୁର ବ୍ଲକରେ ୫୧୭, ଭାପୁର ବ୍ଳକରେ ୩୪୨, ଖଣ୍ଡପଡା ବ୍ଲକରେ ୩୮୨ ଜଣ ୱାର୍ଡ ସଭ୍ୟ ଏପରି ମୋଟରେ ୨୯୮୮ ୱାର୍ଡ ସଭ୍ୟ ଆସନ ପାଇଁ ଅନୁରୂପ ଭାବେ ନିର୍ବାଚନ ହେବ।
