ରସୁଲପୁର,୨୯।୬(ରଞ୍ଜିତ ରାଉତ):୨୦୧୫ରୁ ୨୦୩୦ ମଧ୍ୟରେ ପଞ୍ଚାୟତଗୁଡ଼ିକରେ ସ୍ଥାୟୀ ବିକାଶ ପାଇଁ ଲକ୍ଷ୍ୟ ରଖାଯାଇଛି। ହେଲେ ଦୁର୍ବଳ ଭିତ୍ତିଭୂମି ଉପରେ ସ୍ଥାୟୀ ବିକାଶ ଅବାସ୍ତବ ବୋଲି ମନେ ହେଉଛି। ପଞ୍ଚାୟତଗୁଡ଼ିକରେ ମାନବ ସମ୍ବଳର ଅଭାବ ପରିଲକ୍ଷିତ ହେଉଛି। ମାନବ ସମ୍ବଳ ଅଭାବ ଯୋଗୁ ପଞ୍ଚାୟତର ବିକାଶମୂଳକ ବାଧାପ୍ରାପ୍ତ ହେଉଛି। ଏଦିଗରେ ସରକାରୀ ପ୍ରୟାସ ପ୍ରଭାବୀ ହୋଇପାରୁନାହିଁ। ପଞ୍ଚାୟତରେ ଖାଲିପଡ଼ିଥିବା ପଦବୀଗୁଡ଼ିକ ପୂରଣ ହୋଇପାରୁନାହିଁ। ପ୍ରତ୍ୟେକ ପଞ୍ଚାୟତରେ ଜଣେ ଲେଖାଏ ଡାଟା ଏଣ୍ଟ୍ରି ଅପରେଟର ନିଯୁକ୍ତି ଏବେ ବି ସରକାରଙ୍କ କୋର୍ଟରେ ବିଚାରାଧୀନ ରହିଛି। ପଞ୍ଚାୟତରେ ବ୍ୟାଙ୍କ ଓ ଇଣ୍ଟରନେଟ୍ ସୁବିଧା ଅପହଞ୍ଚ। ଏଭଳିସ୍ଥିତି ସବୁଠି ଦେଖାଦେଉଥିଲେ ବି ରାଜ୍ୟର ଅଗ୍ରଣୀ ଯାଜପୁର ଜିଲା ରସୁଲପୁର ବ୍ଲକର ସ୍ଥିତି ଅତ୍ୟନ୍ତ ଶୋଚନୀୟ ହୋଇପଡ଼ିଛି। ଏ ଦିଗରେ ସୁଧାର ଆଣିବାରେ ସରକାରଙ୍କ ପକ୍ଷରୁ ପଦକ୍ଷେପ ଗ୍ରହଣ କରାଯିବାକୁ ସାଧାରଣରେ ଦାବି ହୋଇଛି।
ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍), ପଞ୍ଚଦଶ କେନ୍ଦ୍ରୀୟ ଓ ପଞ୍ଚମ ରାଜ୍ୟ ଅର୍ଥ କମିଶନ ଭଳି କେତେକ ଗୁରୁତ୍ୱପୂର୍ଣ୍ଣ ଯୋଜନାରେ ବିପୁଳ ଟଙ୍କା ବ୍ୟୟବରାଦ କରାଯାଉଛି। ଉକ୍ତ ଅର୍ଥ ବ୍ୟୟ କରାଯାଇ ପଞ୍ଚାୟତରେ ଦୀର୍ଘ ସ୍ଥାୟୀ ସମ୍ପତ୍ତି, ବିକାଶ, ଉନ୍ନୟନମୂଳକ କାର୍ଯ୍ୟ ହୋଇପାରିବ। ଯେଉଁ ସବୁ ବିକାଶରେ ଭବିଷ୍ୟତ ପିଢ଼ିର ମଙ୍ଗଳ ସାଧନ ହୋଇପାରିବ। ସମାଜକୁ ଶୃଙ୍ଖଳିତ ଓ ସହଜ ଜୀବନଯାପନ କରିବାରେ ସହାୟକ ହେବ। ଏଭଳି ଘଟିପାରିଲେ ତା’କୁ ହିଁ ସ୍ଥାୟୀ ବିକାଶ ବୋଲି କୁହାଯାଇ ପାରିବ। ବିଶ୍ୱରେ ସ୍ଥାୟୀ ବିକାଶ ହାସଲ ପାଇଁ ୧୭ଟି ଲକ୍ଷ୍ୟକୁ ଭେଦ କରିବାକୁ ପଡ଼ିବ। ଏହି ୧୭ ଗୋଲକୁ ଓଡ଼ିଶାରେ ୯ଟି ଥିମ୍ରେ ବିଭକ୍ତ କରାଯାଇଛି। ଉକ୍ତ ଥିମ୍ଗୁଡ଼ିକୁ କାର୍ଯ୍ୟକାରୀ କରିବା ସହ ଏ ଦିଗରେ ସ୍ଥାୟୀ ବିକାଶର ପ୍ରୟାସକୁ ପ୍ରାଧାନ୍ୟ ଦିଆଯିବ ବୋଲି କୁହାଯାଉଛି। ବ୍ଲକରେ ଏହି ଲକ୍ଷ୍ୟ ହାସଲ ଏକ ପ୍ରକାର କଷ୍ଟସାଧ୍ୟ ବ୍ୟାପାର ବୋଲି ମନେହେଉଛି। ତା’ର ମୂଳକାରଣ ହେଉଛି ମାନବ ସମ୍ବଳର ଅଭାବ। ପ୍ରତ୍ୟେକ ପଞ୍ଚାୟତକୁ ଜଣେ ଲେଖାଏ କନିଷ୍ଠ ଯନ୍ତ୍ରୀ, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ), ଗ୍ରାମ ରୋଜଗାର ସେବକ(ଜିଆର୍ଏସ୍), ଡାଟା ଏଣ୍ଟ୍ରି ଅପରେଟର ନିଯୁକ୍ତି ଘୋଷଣା ଏବେ ସୁଧାବାସ୍ତବ ରୂପରେଖ ନେଇ ପାରିନାହିଁ। ବ୍ଲକରେ ୨୮ ଯନ୍ତ୍ରୀ, ପିଇଓ ଏବଂ ଜିଆର୍ଏସ୍ଙ୍କ ଆବଶ୍ୟକତା ଥିବାବେଳେ ବାସ୍ତବରେ ୫ ଯନ୍ତ୍ରୀ, ୧୮ ପିଇଓ, ୨୦ ଜିଆର୍ଏସ୍ ଅଛନ୍ତି। ପଞ୍ଚାୟତକୁ ଜଣେ ଲେଖାଏ ଡାଟା ଏଣ୍ଟ୍ରି ଅପରେଟର ନିଯୁକ୍ତି ପାଇଁ ଘୋଷଣା କାର୍ଯ୍ୟକାରୀ ହୋଇ ପାରିନାହିଁ। ଏଭଳି ସ୍ଥିତିରେ ନୂତନ ଭାବେ ପଞ୍ଚାୟତର ବିଭିନ୍ନ ଉନ୍ନୟନମୂଳକ ଯୋଜନାକୁ ଜିପିଡିପି କରିବା, ଇ-ପଞ୍ଚାୟତ ସଭା ଆୟୋଜନ ଓ ତା’ର ବିବରଣୀକୁ ଅନଲାଇନରେ ଅପଲୋଡ୍ କରିବା, ଡବିଟି ପ୍ରକ୍ରିୟାକୁ ତ୍ୱରାନ୍ବିତ କରିବା ଭଳି କାର୍ଯ୍ୟଗୁଡ଼ିକୁ ବିନା ଡାଟା ଏଣ୍ଟ୍ରି ଅପରେଟର ନିଯୁକ୍ତିରେ ଆଦୌ ସହଜ ହେଉନାହିଁ।
ମାନବ ସମ୍ବଳ ଅଭାବରେ ସରକାରଙ୍କ ବିଭିନ୍ନ ଅନୁଦାନକୁ ଖର୍ଚ୍ଚ କରିବା, ରେଜିଷ୍ଟରଗୁଡ଼ିକୁ ପ୍ରିୟା ସଫ୍ଟ ଜରିଆରେ ଅନଲାଇନ କରିବା, ଏମ୍ଜିଏନ୍ଆର୍ଇଜିଏସ୍ କାର୍ଯ୍ୟକୁ ଅନଲାଇନ କରିବା, ବିଭିନ୍ନ ଉନ୍ନୟନମୂଳକ କାର୍ଯ୍ୟକୁ ଜିଓ ଟ୍ୟାଗ କରିବା, ନୋଟ କ୍ୟାମ୍ ଫଟୋ ଉତ୍ତୋଳନ ଭଳି କାର୍ଯ୍ୟକୁ କମ୍ପୁଟରକରଣ କରିବାକୁ ପଡୁଛି। ମାତ୍ର ଦୁର୍ବଳ ଭିତ୍ତିଭୂମି ଯୋଗୁ ଏସବୁ କାର୍ଯ୍ୟ ବିଳମ୍ବିତ ହେଉଛି। ପିଇଓ ଏବଂ ଜିଆର୍ଏସ୍ଙ୍କ ମଧ୍ୟରୁ ଅଧିକାଂଶଙ୍କ କମ୍ୟୁଟର ଜ୍ଞାନ ଅଭାବରୁ ଅନଲାଇନ କାର୍ଯ୍ୟରେ ବାଧା ଉପୁଜୁଛି। ଏଭଳି ଦୁର୍ବଳ ଭିତ୍ତିଭୂମି ଉପରେ ପଞ୍ଚାୟତର ସର୍ବାଙ୍ଗୀନ ବିକାଶ ଆଶା ନିଷ୍ଫଳ ବୋଲି ବୁଦ୍ଧିଜୀବୀଙ୍କ ମହଲରେ ମତ ପ୍ରକାଶପାଇଛି। ଏ ସମ୍ପର୍କରେ ବିଡିଓ ଅବନିକାନ୍ତ ସାହୁଙ୍କୁ ପଚାରିବାରୁ ସେ କହିଛନ୍ତି, ପଞ୍ଚାୟତଗୁଡ଼ିକୁ ସ୍ବୟଂସମ୍ପୂର୍ଣ୍ଣ କରିବା ପାଇଁ ସରକାରୀସ୍ତରରେ ପ୍ରୟାସ କରାଯାଉଛି। ଏହାବାଦ ପଞ୍ଚାୟତର ଆୟ ଉତ୍ସ ବଢ଼ାଇବା ପରେ ଦେଖାଯାଉଥିବା ଅନେକ ସମସ୍ୟା ସ୍ବତଃ ସମାଧାନ ହୋଇପାରିବ। ତେବେ ଏ ଦିଗରେ ଯାହାକିଛି ନିଷ୍ପତ୍ତି ସରକାରୀସ୍ତରରେ ନିଆଯାଇ ପାରିବ। ସେ କୌଣସି ମତାମତ ରଖିବା ସମ୍ଭବ ନୁହେଁ ବୋଲି ପ୍ରକାଶ କରିଛନ୍ତି।