ଲାଞ୍ଜିଗଡ଼,୨।୭(ରମେଶ ଚନ୍ଦ୍ର ନାୟକ)କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ବେନଗାଁ ପଞ୍ଚାୟତରେ ଆଜକୁ ୫ ମାସରୁ ଊର୍ଦ୍ଧ୍ୱ ହେଲା ବାର୍ଦ୍ଧକ୍ୟ, ବିଧବା ଓ ଦିବ୍ୟାଙ୍ଗମାନଙ୍କୁ ଭତ୍ତା ମିଳି ନ ଥିବାରୁ ପଞ୍ଚାୟତ ଅଫିସରେ ତାଲା ପକାଇଥିଲେ। ଘଟଣାର ୬ ଦିନ ପରେ ଏବିଡିଓଙ୍କ ହସ୍ତକ୍ଷେପ ପରେ ଶନିବାର ସାଢେ ୧୧ଟାରେ ହିତାଧିକାରୀମାନେ ପଞ୍ଚାୟତ ଅଫିସ ତାଲା ଖୋଲିଥିଲେ।
ପୂର୍ବରୁ ବୃଦ୍ଧାମାନଙ୍କୁ ନିୟମିତ ଭାବେ ଭତ୍ତା ଟଙ୍କା ପ୍ରତେକ ମାସରେ ପଞ୍ଚାୟତ କାର୍ଯ୍ୟାଳୟରେ ମିଳୁଥିଲା। ସରକାରଙ୍କ ନୂତନ ଗାଇଡ଼ ଲାଇନ ଅନୁସାରେ ଭତ୍ତା ଟଙ୍କା ନିଜ ନାମରେ ଥିବା ବ୍ୟାଙ୍କ ଖାତାରେ ଜମା ହେଉଛି। କିନ୍ତୁ ଏବେବି ଅନେକ ଲୋକଙ୍କ ବ୍ୟାଙ୍କ ଖାତାରେ ଭତ୍ତା ଟଙ୍କା ଜମା ହେଉନାହିଁ। ବୃଦ୍ଧବୃଦ୍ଧାମାନେ ଏକତ୍ରିତ ହୋଇ ସୋମବାର ପଞ୍ଚାୟତ ନିର୍ବାହୀ ଅଧିକାରୀ ଯଦୁମଣି ନାଏକଙ୍କୁ ପଞ୍ଚାୟତ କାର୍ଯ୍ୟାଳୟରେ ଭତ୍ତା ଟଙ୍କା ସମ୍ପର୍କରେ ପଚାରିଥିଲେ। ଏଥିରେ ନିର୍ବାହୀ ଅଧିକାରୀ ନାଏକ ଉତ୍ତ୍ୟକ୍ତ ହୋଇ ବୃଦ୍ଧାମାନଙ୍କୁ ଦୁର୍ବ୍ୟବହାର କରୁଥିବା ହିତାଧିକାରୀମାନେ ଅଭିଯୋଗ ଆଣିଥିଲେ। ଏହାକୁ ନେଇ ଶତାଧିକ ହିତାଧିକାରୀ ପଞ୍ଚାୟତ କାର୍ଯ୍ୟାଳୟ ଘେରାଉ କରି ତାଲା ପକାଇ ପ୍ରତିବାଦ କରିଥିଲେ। ଯେତେଦିନ ପର୍ଯ୍ୟନ୍ତ ବାକି ଥିବା ଭତ୍ତା ଟଙ୍କା ଦିଆ ନ ଯାଇଛି ସେତେ ଦିନ ପର୍ଯ୍ୟନ୍ତ ପଞ୍ଚାୟତ କାର୍ଯ୍ୟାଳୟ ବନ୍ଦ ରଖିବୁ ବୋଲି ଚେତାବନୀ ଦେଇଥିଲେ। ଶନିବାର ଏବିଡିଓ ବିଭୁତି ଭୂଷଣ ଶତପଥି ଏବଂ ବିଏସଏସଓ ଅରବିନ୍ଦ ମହାପାତ୍ର ବେନଗାଁ ପଞ୍ଚାୟତ ଯାଇଥିବା ସରପଞ୍ଚ ପୁରାନା ମାଝିଙ୍କ ଉପସ୍ଥିତିରେ ହିତାଧିକାରୀଙ୍କୁ ବୁଝାଶୁଝା କରିବା ପରେ ହିତାଧିକାରୀ ପଞ୍ଚାୟତ ଅଫିସ ତାଲା ଖୋଲିଥିଲେ। ହିତାଧିକାରୀମାନେ ନିର୍ବାହୀ ଅଧିକାରୀଙ୍କୁ ବଦଳି କରିବା ପାଇଁ ଅଡ଼ି ବସିଥିଲେ ଏବଂ ଏବିଡିଓ ଏହାର ଅଭିଯୋଗ ବିଡିଓଙ୍କୁ ଉପସ୍ଥାପନ ବୋଲି କହିଥିଲେ। ଏ ବିଷୟରେ ଏବିଡିଓଙ୍କୁ ପଚାରିବାରୁ ସେ କହିଲେ ଆଜି ବେନଗାଁ ପଞ୍ଚାୟତକୁ ଯାଇଥିଲୁ ଏବଂ ତଦାରଖ କରି ସମସ୍ତ ହିତାଧିକାରୀଙ୍କ ପାସ୍ବୁକ୍ ଅପଟୁଡେଟ କରିବା ପାଇଁ ବ୍ୟାଙ୍କକୁ ଯାଇ ବ୍ୟାଙ୍କ ମ୍ୟାନେଜରଙ୍କୁ ଜଣାଯାଇଛି। ଜାନୁୟାରୀରୁ ବ୍ୟାଙ୍କ ଖାତାକୁ ଭତ୍ତା ଜମା ହେଉଛି ଏବଂ ପାସ୍ବୁକ୍ ଅପଟୁଡେଟ ହେବା ପରେ କାହାର ଖାତାରେ କେତେ ଦିନର ଜମା ହେଇଛି, ତଦାରଖ ପରେ ବଳକା ଭତ୍ତା ଦିଆଯିବ। ଏହି କାର୍ଯ୍ୟ ଏକ ସପ୍ତାହ ମଧ୍ୟରେ କରାଯିବ ବୋଲି ପ୍ରକାଶ କରିଥିଲେ। ହିତାଧିକାରୀମାନେ ନିର୍ବାହୀ ଅଧିକାରୀଙ୍କୁ ବଦଳି କରିବା ପାଇଁ ଦାବି କଥା ପଚାରିବାରୁ ମୁଁ ଏହି ଅଭିଯୋଗକୁ ବିଡିଓଙ୍କ ଆଗରେ ଉପସ୍ଥାପନ କରିବି ବୋଲି ପ୍ରକାଶ କରିଥିଲେ।