ଛତ୍ରପୁର,୧୧।୪(ଡି.ଏନ୍.ଏ.): ଗଞ୍ଜାମ ଜିଲା ଛତ୍ରପୁର ବ୍ଲକ କଣମଣା ପଞ୍ଚାୟତ ଅଧୀନ ୯ ନଂ ୱାର୍ଡସଭ୍ୟ ଉପନିର୍ବାଚନ ଲାଗି ନାମାଙ୍କନପତ୍ର ଦାଖଲ ନେଇ ବିବାଦ ଦେଖାଦେଇଛି। ଛତ୍ରପୁର ବ୍ଲକର ପଞ୍ଚାୟତ ସମ୍ପ୍ରସାରଣ ଅଧିକାରୀ (ଜିପିଇଓ) ଅବଧି ସରିବା ପରେ ଜଣଙ୍କ ନାମାଙ୍କନପତ୍ର ଗ୍ରହଣ କରିଥିବା ନେଇ ଅଭିଯୋଗ ହୋଇଛି । ପଞ୍ଚାୟତ ବଦଳରେ ବ୍ଲକ କାର୍ଯ୍ୟାଳୟରେ ନାମାଙ୍କନପତ୍ର ଗ୍ରହଣ କରିବା ବେଆଇନ ବୋଲି କୁହାଯାଇଛି । ଅରପକ୍ଷରେ ଏହି ଘଟଣାର ତଦନ୍ତ ହେବ ବୋଲି ଛତ୍ରପୁର ବିଡିଓ ସୁଶାନ୍ତ କୁମାର ବରାଳ ସୂଚନା ଦେଇଛନ୍ତି ।
ମିଳିଥିବା ସୂଚନା ଅନୁସାରେ, ୬ ତାରିଖରେ ନାମାଙ୍କନ ପତ୍ର ଦାଖଲର ଅବଧି ସରିଥିଲା । ସୋମବାର ଏହାର ଯାଞ୍ଚହେବାର ଥିଲା । ପୂର୍ବରୁ ପଞ୍ଚାୟତ କାର୍ଯ୍ୟାଳୟରେ ୬ ତାରିଖ ସୁଦ୍ଧା କେବଳ ୨ ଜଣ ନାମାଙ୍କନପତ୍ର ଦାଖଲ କରିଥିଲେ ବୋଲି ନିର୍ବାହୀ ଅଧିକାରୀ ଡକ୍ଟର ସେଠୀ କହିଛନ୍ତି । ଅପରପକ୍ଷରେ ୩ ଜଣ ନାମାଙ୍କନପତ୍ର ଦାଖଲ କରିଥିବା ସୂଚନା ମିଳିଛି। ଏହା ବେଆଇନ ବୋଲି ଅନ୍ୟତମ ପ୍ରାର୍ଥିନୀ ସୁରେଖା ପ୍ରଧାନ ଅଭିଯୋଗ କରିଛନ୍ତି । ଏ ନେଇ ଏକ ସ୍ମାରକପତ୍ର ପଞ୍ଚାୟତ ସମିତି ନିର୍ବାଚନ ଅଧିକାରୀଙ୍କ ନିକଟରେ ଦାଖଲ କରିଛନ୍ତି । ପଞ୍ଚାୟତ କାର୍ଯ୍ୟାଳୟରେ ହିଁ ନାମାଙ୍କନପତ୍ର ଦାଖଲ କରିବାର ନିୟମ ରହିଛି । ତେବେ କିଭଳି ବ୍ଲକ କାର୍ଯ୍ୟାଳୟରେ ଆଉ ଜଣେ ନାମାଙ୍କନପତ୍ର ଦାଖଲ କଲେ ଏବଂ ତାଙ୍କର ନାମାଙ୍କନପତ୍ର ଗ୍ରହଣ କରାଗଲା ସେନେଇ ସେ ପ୍ରଶ୍ନ ଉଠାଇଛନ୍ତି । ଜିପିଇଓଙ୍କ ପକ୍ଷରୁ ନାମାଙ୍କନପତ୍ର ଗ୍ରହଣ କରିବା ବେଆଇନ ଏବଂ ଏହାକୁ ନାକଚ କରିବାକୁ ସେ ଦାବି କରିଛନ୍ତି । ତୃତୀୟ ଜଣଙ୍କ ନାମାଙ୍କନପତ୍ର ବ୍ଲକ କାର୍ଯ୍ୟାଳୟରେ ଗ୍ରହଣ କରିଥିବା ନେଇ ଜିପିଇଓ ଅଶୋକ ଦାଶ ସ୍ବୀକାର କରିଛନ୍ତି । ୧୨ ତାରିଖରେ ଚୂଡାନ୍ତ ପ୍ରାର୍ଥି ତାଲିକା ପ୍ରକାଶ ପାଇବ ବୋଲି ସୂଚନା ଦିଆଯାଇଛି ।