ନୂଆପଡ଼ା ଅଫିସ,୩୦।୧୧: ନୂଆପଡା ଜିଲା କୋମନା ବ୍ଲକ ଅନ୍ତର୍ଗତ ନୂଆଗାଁ ପଞ୍ଚାୟତରେ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଦ୍ୱାରା ବସୁଧା ଯୋଜନାରେ ପାତଳ ବୋରୱାଲ କରି ଲୋହୋଣ୍ଡୋପାଲି, ଠୁଟିବର ଓ ଗୋନିଆପଡାକୁ ପାଇପ ଯୋଗେ ଜଳ ଯୋଗାଣ ହେଉଥିଲା। ପଞ୍ଚାୟତ ପକ୍ଷରୁ ବିଦ୍ୟୁତ୍ ବିଲ ପୈଠ ନ କରିବାରୁ ବିଭାଗ ବିଦ୍ୟୁତ ସଂଯୋଗ ବିଚ୍ଛିନ୍ନ କରିବାରୁ ଜଳ ଯୋଗାଣ ବନ୍ଦ ରହିଥିଲା। ଫଳରେ ଉକ୍ତ ୩ଟି ଗାଁ କୟା ନଦୀକୂଳରେ ବାଲି ଚୁଆଁ କରି ପାଣି ବ୍ୟବହାର କରୁଥିବା ସମ୍ପର୍କିତ ଏକ ଖବର ଗତ ୧୮ ତାରିଖରେ ଧରିତ୍ରୀରେ ପ୍ରକାଶ ପାଇବା ପରେ ବ୍ଲକ ପ୍ରଶାସନ ତପତ୍ର ଦେଖାଇ ବିଦ୍ୟୁତ୍ ବିଲ ପୈଠ କରିଥିବା ସୂଚନା ମିଳିଛି। ପ୍ରାପ୍ତ ସୂଚନା ମୁତାବକ ଗ୍ରାମ୍ୟ ଜଳ ଯୋଗାଣ ପ୍ରକଳ୍ପ ଠୁଟିବର ଦ୍ୱାରା ବସୁଧା ଯୋଜନାରେ ଗୋନିଆପଡାଠାରେ କୟା ନଦୀ କୂଳରେ ଏକ ପାତାଳ ବୋରୱେଲ କରି ୨୦୨୨ ଜାନୁୟାରୀଠାରୁ ଲୋହୋଣ୍ଡୋପାଲି, ଠୁଟିବର ଓ ଗୋନିଆପଡାକୁ ପାଇପ ଯୋଗେ ଜଳ ଯୋଗାଣ ହେଉଥିଲା। ଲୋହୋଣ୍ଡୋପାଲିରେ ୩୦, ଠୁଟିବରରେ ୫୦ ଓ ଗୋନିଆପଡାରେ ୩୦ଟି ଫ୍ରି ପଏଣ୍ଟରେ ଜଳ ଯୋଗାଣ ହେଉଥିଲା। ଘର ସଂଯୋଗ ହେବା ପୂର୍ବରୁ ଜଳ ଯୋଗାଣ ବନ୍ଦ ହୋଇଗଲା। ଦୀର୍ଘ ୬ ମାସ ଜଳ ଯୋଗାଣ ପରେ ପଞ୍ଚାୟତ ବିଦ୍ୟୁତ୍ ବିଲ ପୈଠ ନ କରିବାରୁ ଗତ ଜୁଲାଇରେ ବିଦ୍ୟୁତ ସଂଯୋଗ କାଟି ଦେବାରୁ ଜଳ ଯୋଗାଣ ବନ୍ଦ ରହିଛି। ଜାନୁୟାରୀଠାରୁ ଅକ୍ଟୋବର ପର୍ଯ୍ୟନ୍ତ ବିଦ୍ୟୁତ ବିଲ ମୋଟ ୧,୯୫,୨୮୩ ଟଙ୍କା ରହିଥିଲା। ହେଲେ ଧରିତ୍ରୀରେ ଖବର ପ୍ରକାଶ ହେବା ପରେ ପଞ୍ଚାୟତିରାଜ ବିଭାଗ ପକ୍ଷରୁ ୩,୭୮,୯୯୨ ଟଙ୍କା ବିଦ୍ୟୁତ ବିଭାଗକୁ ପୈଠ କରିଥିବା କୋମନା ଗୋଷ୍ଠି ଉନ୍ନୟନ ଅଧିକାରୀ ସୁଶାନ୍ତ କୁମାର ରଣା ସୂଚନା ଦେଇଛନ୍ତି। ବିଦ୍ୟୁତ ବିଲ ପୈଠ ହୋଇ ବିଦ୍ୟୁତ ସଂଯୋଗ ମଧ୍ୟ ହୋଇସାରିଛି। ହେଲେ ସେଥିରେ ବ୍ୟାବହାର କରାଯାଉଥିବା ଇଲେକ୍ଟ୍ରି ବୋର୍ଡର ସୁଇଜ ଖରାପ ହୋଇଥିବାରୁ ଜଳ ଯୋଗାଣ ହୋଇ ପାରୁନାହିଁ। ସବୁ କାର୍ଯ୍ୟ ମରାମତି ପରେ ଜଳ ଯୋଗାଣ ଆରମ୍ଭ ହେବ। ପୁଣି ସୂଚାରୁ ରୂପେ ୩ ଗାଁର ଲୋକେ ବିଶୁଦ୍ଧ ପାନୀୟ ଜଳ ପାଇବେ।