କେସିଙ୍ଗା,୨।୧୨(ଡି.ଏନ୍.ଏ.): କଳାହାଣ୍ଡି ଜିଲା କେସିଙ୍ଗା ବ୍ଲକ ଚାଞ୍ଚେର ପଞ୍ଚାୟତରେ ପିଡିଏସ୍ ଚାଉଳ ବଣ୍ଟନରେ ଦୁର୍ନୀତି ଓ ଅନିୟମିତତାକୁ ନେଇ କେସିଙ୍ଗା ବିଡିଓଙ୍କ ନିକଟରେ ସରପଞ୍ଚ ଓ ଗ୍ରାମବାସୀ ଅଭିଯୋଗ କରିଥିଲେ। ଏହାର ତଦନ୍ତ ପରେ ଶୁକ୍ରବାର ବଣ୍ଟନ ଦାୟିତ୍ୱ ପଞ୍ଚାୟତକୁ ହସ୍ତାନ୍ତର କରାଯାଇଛି। ସରପଞ୍ଚ ଅଞ୍ଜୁ କୁମାର, ପିଇଓ ଲମ୍ବୋଦର ଶିଖା ଶୁକ୍ରବାର ଏହାର ଶୁଭାରମ୍ଭ କରି ହିତାଧିକାରୀଙ୍କୁ ଚାଉଳ ବଣ୍ଟନ କରିଛନ୍ତି।
ପଞ୍ଚାୟତର ମା’ଜଗଦମ୍ବା ମହିଳା ସ୍ବୟଂ ସହାୟିକା ଗୋଷ୍ଠୀ ଚାଉଳ ବଣ୍ଟନରେ ମନମୁଖି ଓ ଦୁର୍ନୀତି କରୁଥିବା ଅଭିଯୋଗ କରି ସରପଞ୍ଚ ଅଞ୍ଜୁ କୁମାରଙ୍କ ସମେତ ପଞ୍ଚାୟତର ହିତାଧିକାରୀମାନେ ଅକ୍ଟୋବର ୧୮ ତାରିଖରେ ବ୍ଲକ କାର୍ଯ୍ୟାଳୟ ସମ୍ମୁଖରେ ଅନିର୍ଦ୍ଦିଷ୍ଟ କାଳ ପାଇଁ ଧାରଣାରେ ବସିଥିଲେ।
ଏପରିକି ଘଟଣାର ତଦନ୍ତ କରି ପଞ୍ଚାୟତକୁ ବଣ୍ଟନ ଦାୟିତ୍ୱ ଦେବା ପାଇଁ ସରପଞ୍ଚ ଅଞ୍ଜୁ କୁମାର ଲିଖିତ ଭାବେ ଦାବି କରିଥିଲେ। ଏହି ଖବର ଧରିତ୍ରୀରେ ପ୍ରକାଶ ପାଇଥିଲା। ପରେ କେସିଙ୍ଗା ବିଡିଓ ପ୍ରଫୁଲ୍ଲ କୁମାର ଅଦୁ ଆନ୍ଦୋଳନକାରୀଙ୍କୁ ବୁଝାଶୁଝା କରି ପ୍ରତିଶ୍ରୁତି ଦେଇଥିଲେ। ଏନେଇ ବିଡିଓ ଉପଜିଲାପାଳଙ୍କ ସହିତ ଆଲୋଚନା କରି ଚାଞ୍ଚେର ପଞ୍ଚାୟତ ଚାଉଳ ବଣ୍ଟନ ଦାୟିତ୍ୱ ପଞ୍ଚାୟତକୁ ଦିଆଯାଇଛି। ଏନେଇ ପଞ୍ଚାୟତର ସମସ୍ତ ହିତାଧିକାରୀ ବିଡିଓଙ୍କୁ ଧନ୍ୟବାଦ ଜଣାଇଛନ୍ତି।
ଏ ସଂକ୍ରାନ୍ତରେ ପିଇଓ ଲମ୍ବୋଦର ଶିଖାଙ୍କୁ ପଚାରିବାରୁ, ଏଣିକି ଠିକ ଭାବେ ହିତାଧିକାରୀଙ୍କୁ ପିଡିଏସ୍ ସାମଗ୍ରୀ ଦିଆଯିବ ବୋଲି ପ୍ରକାଶ କରିଛନ୍ତି।