ନୂଆଦିଲ୍ଲୀ,୧୬।୨ : ଆରଏସଏସର ସାସ୍ତାହିକ ପତ୍ରିକା ପଞ୍ଚଜନ୍ୟର ସମ୍ପାଦକୀୟରେ ସୁପ୍ରିମକୋର୍ଟଙ୍କ ବିରୋଧରେ ଏକ ବଡ ଅଭିଯୋଗ ଆସିଛି। ଏଥିରେ ଦାବି କରାଯାଇଛି ଯେ, ସୁପ୍ରିମକୋର୍ଟଙ୍କୁ ଏକ ଉପକରଣ ଭାବରେ ଭାରତ ବିରୋଧୀ ଶକ୍ତି ବ୍ୟବହାର କରୁଛନ୍ତି।
ବିବିସି ଡକ୍ୟୁମେଣ୍ଟାରୀ ଉପରେ ପ୍ରତିବନ୍ଧକ ଲଗାଇବାକୁ କେନ୍ଦ୍ର ସରକାରଙ୍କ ନିଷ୍ପତ୍ତିକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯାଇଛି। ଯେଉଁଥିରେ କୋର୍ଟ କେନ୍ଦ୍ର ସରକାରଙ୍କୁ ନୋଟିସ ଜାରି କରି ଏହାର ଉତ୍ତର ମାଗିଛନ୍ତି। ଏହା ପରେ ସୁପ୍ରିମକୋର୍ଟ ବିରୋଧରେ ପଞ୍ଚଜନ୍ୟରେ ଲିଖିତ ପ୍ରବନ୍ଧରେ ଏଭଳି ମନ୍ତବ୍ୟ ଦିଆଯାଇଛି।
ସଦ୍ୟତମ ସମ୍ପାଦକୀୟ ପ୍ରବନ୍ଧରେ ଏହା ଲେଖାଯାଇଛି ଯେ ଆତଙ୍କବାଦୀଙ୍କୁ ମାନବିକ ଅଧିକାର ନାମରେ ବଞ୍ଚାଇବାକୁ ଚେଷ୍ଟା କରିବା ପରେ ପରିବେଶ ନାମରେ ଭାରତର ବିକାଶରେ ବାଧା ସୃଷ୍ଟି କରିବା ଦ୍ୱାରା ବର୍ତ୍ତମାନ ଜାତୀୟ ବିରୋଧୀ ଶକ୍ତିମାନଙ୍କୁ ଉତ୍ସାହିତ କରିବା ଲାଗି ଉଦ୍ୟମ ଚାଲିଛି। ଆର୍ଟିକିଲ ଅନୁଯାୟୀ, ଜାତୀୟ ସ୍ବାର୍ଥ ରକ୍ଷା ପାଇଁ ସୁପ୍ରିମକୋର୍ଟ ଗଠନ କରାଯାଇଥିଲା, କିନ୍ତୁ ଏହାକୁ ଜାତୀୟ ବିରୋଧୀ ଶକ୍ତିମାନେ ସେମାନଙ୍କ ରାସ୍ତା ସଫା କରିବା ପାଇଁ ଏକ ଉପକରଣ ଭାବରେ ବ୍ୟବହାର କରୁଛନ୍ତି। ଭାରତୀୟ ଆଇନ ଅନୁଯାୟୀ ତଥା ଭାରତୀୟଙ୍କ ମଙ୍ଗଳ ପାଇଁ ସୁପ୍ରିମକୋର୍ଟ ଦେଶର ଟିକସଦାତାଙ୍କ ଟଙ୍କା ଦ୍ୱାରା ପରିଚାଳିତ ହୋଇଥାଏ।
ଆର୍ଟିକିଲରେ ବିବିସି ଡକ୍ୟୁମେଣ୍ଟାରୀ ଭାରତକୁ ବଦନାମ କରିବା ପାଇଁ ଏକ ପ୍ରଚାର ବୋଲି ବର୍ଣ୍ଣନା କରାଯାଇଛି ଏବଂ ଏହା ମିଥ୍ୟା ତଥା କାଳ୍ପନିକ ଉପରେ ଆଧାରିତ ବୋଲି ଦାବି କରାଯାଇଛି। ଜାତୀୟ ବିରୋଧୀ ଶକ୍ତିମାନେ ଆମର ଗଣତନ୍ତ୍ର, ଆମର ଦୟା ଏବଂ ଆମ ସଭ୍ୟତାର ମାନର ଲାଭ ଉଠାଇବାକୁ ଚାହୁଁଛନ୍ତି ସୂଚନାଯୋଗ୍ୟ ଯେ ଗତ ସପ୍ତାହରେ ଭାରତରେ ବିବିସି ଉପରେ ପ୍ରତିବନ୍ଧକ ଲଗାଇବାକୁ ସୁପ୍ରିମକୋର୍ଟ ଆବେଦନକୁ ଖାରଜ କରିଥିଲେ। କୋର୍ଟ ଏହି ଆବେଦନର ଯୋଗ୍ୟତାକୁ ଭିତ୍ତିହୀନ ବୋଲି କହିଛନ୍ତି।
ଏଥି ସହ ଡକ୍ୟୁମେଣ୍ଟାରୀ ଉପରେ ପ୍ରତିବନ୍ଧକ ଲଗାଇବାକୁ କେନ୍ଦ୍ର ସରକାରଙ୍କ ନିଷ୍ପତ୍ତିକୁ ଚ୍ୟାଲେଞ୍ଜ କରୁଥିବା ଏକ ଆବେଦନ ମଧ୍ୟ ସୁପ୍ରିମକୋର୍ଟରେ ବିଚାରାଧୀନ ଅଛି ଯାହା ଉପରେ କୋର୍ଟ ଏପ୍ରିଲରେ ଶୁଣାଣି କରିବେ।