ଜି.ଉଦୟଗିରି,୨।୫(ଶିଶିର ପଟ୍ଟନାୟକ): ବିଜେଡି ନେତା କାର୍ତ୍ତିକ ପାଣ୍ଡିଆନ ଗୁରୁବାର ଅପରାହ୍ନରେ ହେଲିକପ୍ଟର ଯୋଗେ ଜି.ଉଦୟଗିରି ଷ୍ଟାଡିୟମ ପଡ଼ିିଆରେ ଅବତରଣ କରି ସେଠାରେ ଅନୁଷ୍ଠିତ ନିର୍ବାଚନୀ ସଭାରେ ଯୋଗ ଦେଇଥିଲେ। ଏହି ଅବସରରେ ଜି.ଉଦୟଗିରି ବିଜେଡି ବିଧାନସଭା ପ୍ରାର୍ଥୀ ସାଲୁଗା ପ୍ରଧାନ ଓ କନ୍ଧମାଳ ଏମ୍ପି ପ୍ରାର୍ଥୀ ଡ. ଅଚୁତ୍ୟ ସାମନ୍ତଙ୍କୁ ଶଙ୍ଖ ଚିହ୍ନରେ ଭୋଟ ଦେଇ ଜୟଯୁକ୍ତ କରିବାକୁ ଜନସାଧାରଣଙ୍କୁ ଅନୁରୋଧ କରିଥିଲେ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଥା କମ୍ କାମ ବେଶି କରନ୍ତି କହି ମୁଖ୍ୟମନ୍ତ୍ରୀ ରାଇକିଆ ସହରକୁ ଏନ୍ଏସି ଘୋଷଣା କରିଥିବା କଥା ପାଣ୍ଡିଆନ କହିଥିଲେ। ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ସମ୍ପର୍କରେ ସେ କହି ରାଇକିଆ ବ୍ଲକର ସରିତା ସାହୁ ନାମ୍ନୀ ମହିଳା ତାଙ୍କ ଚିକିତ୍ସା ପାଇଁ ଦୁଇ ବର୍ଷରେ ୧୭ ଲକ୍ଷ ଟଙ୍କାର ଅନୁକମ୍ପା ପାଇଥିବା କହିଥିଲେ ।
ସେହିପରି ଦାରିଙ୍ଗବାଡି ବ୍ଲକର ସାବନା ନାୟକ ତାଙ୍କ ଚିକିତ୍ସା ପାଇଁ ୧୦ ଲକ୍ଷ ଟଙ୍କା ପାଇଥିବା କହିଥିଲେ। ଏପରିକି ଅଞ୍ଚଳର ସ୍କୁଲ, କଲେଜ, ହସ୍ପିଟାଲର ରୂପାନ୍ତକରଣ କରାଯାଇଥିବା ପାଣ୍ଡିଆନ୍ ପ୍ରକାଶ କରିଥିଲେ।
ଦାରିଙ୍ଗବାଡି, ବାଲିଗୁଡା, ବ୍ରାହ୍ମଣୀଗାଁର ପର୍ଯ୍ୟଟନ ବିକାଶ ପାଇଁ ନବୀନ ସରକାର ଅର୍ଥ ମଞ୍ଜୁର କରିଥିବା କହିଥିଲେ । ତାଙ୍କର ଜି ଉଦୟଗିରି ଗସ୍ତ ସମୟରେ ମନ୍ଦିର, ଚର୍ଚ୍ଚ, ମସଜିଦ ରୂପାନ୍ତକରଣ ପାଇଁ ଜି ଉଦୟଗିରି ଅଞ୍ଚଳରୁ ଯେଉଁ ଅନୁରୋଧ କରାଯାଇଥିଲା ମୁଖ୍ୟମନ୍ତ୍ରୀ ସେସବୁ ପୂରଣ କରିଛନ୍ତି ବୋଲି କହିଥିଲେ।
ଏପରି କି ସାଲୁଗା ପ୍ରଧାନ ଏବଂ ଡ଼ ଅଚୁତ୍ୟ ସାମନ୍ତ ମୁଖ୍ୟମନ୍ତ୍ରୀ କନ୍ଧମାଳ ଜିଲାର ଜି. ଉଦୟଗିରି ନିର୍ବାଚନ ମଣ୍ଡଳୀର ବିକାଶକୁ ଗୁରୁତ୍ୱ ଦେଇଛନ୍ତି ବୋଲି ତାଙ୍କ ଭାଷଣରେ କହିଥିଲେ।
ସଭା ମଞ୍ଚକୁ ଯିବା ପୂର୍ବରୁ ପାଣ୍ଡିଆନ ଲୋକଙ୍କ ସହ ମିଶି ସେମାନଙ୍କଠାରୁ ବିଭିନ୍ନ ଅଭିଯୋଗ ପତ୍ର ଗ୍ରହଣ କରିଥିଲେ। ସଭାରେ ଥିବା ଯୁବକ, ମହିଳା, ଛାତ୍ରୀଛାତ୍ରମାନେ ପାଣ୍ଡିଆନଙ୍କ ସହ ସେଲ୍ଫି ନେବାକୁ ଅନୁରୋଧ କରି ସେଲ୍ଫି ନେଇଥିଲେ।
ଅନ୍ୟପକ୍ଷେ କଂଗ୍ରେସ ଓ ଭାଜପାର ଅନେକ କର୍ମୀ ବିଜୁ ଜନତା ଦଳରେ ଯୋଗ ଦେଇଥିଲେ। ମିଶ୍ରଣ ପର୍ବରେ ଜିଲା ପର୍ଯ୍ୟବେକ୍ଷକ ବିଜୟ କୁମାର ନାୟକ, କ୍ଳେଶ ପ୍ରଧାନ, ଜି.ଉଦୟଗିରି ବ୍ଲକ ଅଧ୍ୟକ୍ଷା ସୁଷମା ପ୍ରଧାନ, ଏନ୍ଏସି ଅଧ୍ୟକ୍ଷା ଦେବସ୍ମିତା ଶତପଥୀ, ବିଜୁ ଜନତା ଦଳର ନଗର ସଭାପତି ପି. ସଞ୍ଜୀବ କୁମାର ପାତ୍ରଙ୍କ ସମେତ ଅନେକ ନେତା ଉପସ୍ଥିତ ଥିଲେ।