ତ୍ରିନିଦାଦ,୨।୮: ଭାରତୀୟ କ୍ରିକେଟ ଦଳ ବର୍ତ୍ତମାନ ୱେଷ୍ଟଇଣ୍ଡିଜ ଗସ୍ତରେ ଅଛି। ୨ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ୧-୦ ରେ ଜିତିବା ପରେ ଟିମ ଇଣ୍ଡିଆ ମଧ୍ୟ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜ ୨-୧ ରେ ଜିତିଛି। ଅନ୍ୟପକ୍ଷରେ ଶେଷ ୨ଟି ଦିନିକିଆରେ ରୋହିତ ଶର୍ମାଙ୍କ ସ୍ଥାନରେ ଦଳର ଅଧିନାୟକ ଥିବା ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଏହି ଗସ୍ତରେ ୱେଷ୍ଟଇଣ୍ଡିଜ ବୋର୍ଡ ଦ୍ୱାରା ଦିଆଯାଇଥିବା ସୁବିଧା ଉପରେ ଅସନ୍ତୋଷ ବ୍ୟକ୍ତ କରି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲେ।
ଏହି ସିରିଜ ଜିତିବା ପରେ ହାର୍ଦ୍ଦିକ ପାଣ୍ଡ୍ୟା ପୁସ୍କାର ସମାରୋହରେ କହିଛନ୍ତି ଯେ, ଆମେ ଏପର୍ଯ୍ୟନ୍ତ ଖେଳିଥିବା ସର୍ବଶ୍ରେଷ୍ଠ ସ୍ଥାନ ମଧ୍ୟରୁ ଏହା ଅନ୍ୟତମ। ପରବର୍ତ୍ତୀ ସମୟରେ ଯେତେବେଳେ ଆମେ ୱେଷ୍ଟଇଣ୍ଡିଜ ଆସିବା ସେତେବେଳେ ଜିନିଷଗୁଡ଼ିକର ଉନ୍ନତି ହୋଇପାରିବ। ଗତ ବର୍ଷ ମଧ୍ୟ ଯେତେବେଳେ ଆମେ ଭ୍ରମଣରେ ଆସିଥିଲୁ, ସେତେବେଳେ ଆମକୁ ଅସୁବିଧାର ସମ୍ମୁଖୀନ ହେବାକୁ ପଡିଥିଲା। ମୁଁ ଭାବୁଛି ୱେଷ୍ଟଇଣ୍ଡିଜ କ୍ରିକେଟ ବୋର୍ଡ ଏ ବିଷୟରେ ଚିନ୍ତା କରିବା ଉଚିତ୍। ଆମେ ସେମାନଙ୍କଠାରୁ ବିଳାସପୂର୍ଣ୍ଣ ସୁବିଧା ଦାବି କରୁନାହୁଁ। ଆମେ କେବଳ ମୌଳିକ ଜିନିଷକୁ ଧ୍ୟାନରେ ରଖିବା ବିଷୟରେ କହୁଛୁ । ମୁଁ ସବୁବେଳେ ଏଠାକୁ ଆସି ଖେଳିବାକୁ ପସନ୍ଦ କରେ।
ସୂଚନାଯୋଗ୍ୟ, ଟେଷ୍ଟ ସିରିଜ ଶେଷ ହେବା ପରେ ଭାରତୀୟ ଦଳକୁ ବାର୍ବାଡୋସ୍ ଯିବାର ଥିଲା।ବିମାନ ବିଳମ୍ବ ହେତୁ ସେମାନଙ୍କୁ ବିମାନ ବନ୍ଦରରେ ୪ ଘଣ୍ଟା ରାତି କଟାଇବାକୁ ପଡିଥିଲା।