ଚାଇନାରେ ଆତଙ୍କ: ସରକାରୀ ପରିସଂଖ୍ୟାନରେ ମଧ୍ୟ ସ୍ଥିତି ନିୟନ୍ତ୍ରଣରେ ନାହିଁ…

ବେଜିଂ,୨୨।୧୨ : ଶୂନ କୋଭିଡ ନୀତି ହଟାଇବା ପରେ ଚାଇନାର ଅବସ୍ଥା ବିଗିଡି ଯାଇଛି। କୋରୋନାର ଓମିକ୍ରନ ବିଏଫ.୭ ଭାରିଆଣ୍ଟ, ବେଜିଂରୁ ସାଂଘାଇ ପର୍ଯ୍ୟନ୍ତ ଆତଙ୍କ ସୃଷ୍ଟି କରିଛି । ପ୍ରକାଶିତ ସରକାରୀ ପରିସଂଖ୍ୟାନରେ ମଧ୍ୟ ମାମଲା ନିୟନ୍ତ୍ରଣରେ ନାହିଁ। ବହୁ ଡାକ୍ତରଖାନାରେ ରୋଗୀମାନଙ୍କର ଲମ୍ବା ଲାଇନ ଲାଗିଛି। ବିଶେଷଜ୍ଞମାନେ କହୁଛନ୍ତି ଯେ ଚାଇନାରେ କରୋନା କାରଣରୁ ପ୍ରକୃତରେ କେତେ ଲୋକ ସଂକ୍ରମିତ ହୋଇଛନ୍ତି ଏବଂ କେତେ ମୃତ୍ୟୁ ଘଟୁଛି ତାହା ଜାଣିବା କଷ୍ଟକର। କିନ୍ତୁ ଯଦି ସରକାରୀ ଆକଳନକୁ ବିଚାର କରାଯାଏ, ତେବେ ଦେଶର ଅବସ୍ଥା ଅତ୍ୟନ୍ତ ଗୁରୁତର ।

ଆଶ୍ଚର୍ଯ୍ୟଜନକ କଥା ହେଉଛି ଯେ ସୋମବାର ପର୍ଯ୍ୟନ୍ତ ଚାଇନା କରୋନା ମାମଲାରେ ବୃଦ୍ଧି ସହିତ ମୃତ୍ୟୁ ବୃଦ୍ଧି ବିଷୟରେ ମଧ୍ୟ ଆଲୋଚନା କରିଥିଲା। ବର୍ତ୍ତମାନ ଗତ ଦୁଇ ଦିନ ମଙ୍ଗଳବାର-ବୁଧବାର ସମଗ୍ର ଦେଶରେ ଗୋଟିଏ ବି ମୃତ୍ୟୁର ରେକର୍ଡ ଦେଖାଯାଇ ନାହିଁ। ଅନ୍ୟପକ୍ଷରେ, ଗଣମାଧ୍ୟମର ରିପୋର୍ଟରେ କୁହାଯାଇଛି ଯେ ଚାଇନାରେ ଅନ୍ତିମ ସଂସ୍କାର ପାଇଁ ଲମ୍ବା ଲାଇନ ଲାଗିଛି। ଏଭଳି ପରିସ୍ଥିତିରେ ସରକାରୀ ପରିସଂଖ୍ୟାନ ଅନୁଯାୟୀ ଚାଇନା କରୋନା ସ୍ଥିତିକୁ ବୁଝିବା ଅତ୍ୟନ୍ତ କଷ୍ଟସାଧ୍ୟ ବୋଲି ପ୍ରମାଣିତ ହୋଇଛି।

ଏନେଇ ବିଶ୍ୱ ସ୍ବାସ୍ଥ୍ୟ ସଂଗଠନ କହିଛି ଯେ ଚାଇନା ସରକାର ଏହାକୁ ସଠିକ ତଥ୍ୟ ପ୍ରଦାନ କରିବା ଉଚିତ, ଯାହା ଦ୍ୱାରା ଆକ୍ରାନ୍ତ ଏବଂ ମୃତ୍ୟୁ ରୋକିବା ପଦ୍ଧତିର ସମୀକ୍ଷା କରାଯାଇପାରିବ।