ନୂଆଦିଲ୍ଲୀ,୧୪।୮: ପୂର୍ବତନ ମହାନ ଭାରତୀୟ ଅଧିନାୟକ ତଥା ଉଇକେଟକିପର ମହେନ୍ଦ୍ର ସିଂହ ଧୋନୀ କ୍ରିକେଟ ଇତିହାସରେ ନିଜର ଅନେକ ସଫଳତାର ଫର୍ଦ୍ଦ ଯୋଡ଼ିଛନ୍ତି। ସେସବୁର ସମକକ୍ଷ ହେବା କାହା ପାଇଁ ସହଜ ନୁହେଁ। କିନ୍ତୁ ବର୍ତ୍ତମାନ ଟେଷ୍ଟ ଟିମ୍ର ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ ଏହି ଦୀର୍ଘତମ ଫର୍ମାଟରେ କିଛି କ୍ଷେତ୍ରରେ ଧୋନୀଙ୍କ ସହ ପ୍ରତିନ୍ଦ୍ୱନ୍ଦିତା କରିବାକୁ ଚେଷ୍ଟା କରୁଛନ୍ତି। ଲର୍ଡସ କ୍ରିକେଟ ଗ୍ରାଉଣ୍ଡରେ ଭାରତ-ଇଂଲଣ୍ଡ ମଧ୍ୟରେ ଚାଲିଥିବା ଦ୍ୱିତୀୟ ଟେଷ୍ଟ ମ୍ୟାଚ୍ରେ ପନ୍ତ ଆଉ ଏକ ରେକର୍ଡ କରିଛନ୍ତି।
ଅନ୍ତର୍ଜାତୀୟ କ୍ରିକେଟରେ ସାମିଲ ହେବାରେ ହେବାର ବେଶି ଦିନ ହୋଇନାହିଁ। ପନ୍ତ ଗତ ଏକ ବର୍ଷ ମଧ୍ୟରେ ଟେଷ୍ଟ କ୍ରିକେଟରେ ଭଲ ପ୍ରଦର୍ଶନ କରିଆସୁଛନ୍ତି। ବିଦେଶୀ ମାଟିରେ ସେ ଅନେକ ମ୍ୟାଚ୍ ନିଜ ଦମ୍ରେ ଜିତାଇଛନ୍ତି ନଚେତ ଡ୍ର କରିଛନ୍ତି। ବର୍ତ୍ତମାନ ଇଂଲଣ୍ଡରେ ମଧ୍ୟ ସେ ନିଜକୁ ପ୍ରମାଣିତ କରିବାକୁ ପଛାଉନାହାନ୍ତି। ଦ୍ୱିତୀୟ ଟେଷ୍ଟର ଦ୍ୱିତୀୟ ଦିନରେ ସେ ୫୮ ବଲ୍ରେ ୩୭ରନ୍ ସଂଗ୍ରହ କରିଥିଲେ। ସେଥିରେ ସେ ମହାନ ଜେମ୍ସ ଆଣ୍ଡରସନଙ୍କ ବଲ୍ରେ ନିଜ ଶୈଳୀରେ ସଟ୍ ଖେଳିବାକୁ ପଛଘୁଞ୍ଚା ଦେଇ ନ ଥିଲେ।
ବର୍ତ୍ତମାନ ଏହି ଇନିଂସ ପରେ ପନ୍ତ ବିଦେଶୀ ମାଟିରେ ନିଜର ୧୦୦୦ ରନ୍ ପୂରଣ କରିଛନ୍ତି। ସେ ୨୩ ଟେଷ୍ଟ ମ୍ୟାଚ୍ର ୩୭ ଇନିଂସରେ ୧୪୬୫ରନ୍ କରିଥିବା ବେଳେ ସେଥିରୁ ବିଦେଶୀ ମାଟିରେ ୧୦୦୫ ରନ୍ ରହିଛି। ବିଦେଶୀ ମାଟିରେ ସର୍ବାଧିକ ରନ୍ କରିବା ମାମଲାରେ କେବଳ ତିନିଜଣ ପନ୍ତଙ୍କଠାରୁ ଆଗରେ ଅଛନ୍ତି।
୧- ମହେନ୍ଦ୍ର ସିଂହ ଧୋନୀ-୨୪୯୬ରନ୍
୨-ଫାରୁକ୍ ଇଞ୍ଜିନିୟର-୧୨୦୯ରନ୍
୩-ସୟଦ କିର୍ମାନି-୧୧୦୯ରନ୍
୪-ରିଷଭ ପନ୍ତ-୧୦୦୫ ରନ୍*
କେବଳ ଏତିକି ନୁହେଁ ପନ୍ତ ଏବେ ବିଦେଶୀ ମାଟିରେ ୧୦୦୦ ରନ୍ କରିଥିବା ଦ୍ରୁତତମ ଭାରତୀୟ ଉଇକେଟକିପର ହୋଇପାରିଛନ୍ତି। ଏହି ମାମଲାରେ ସେ ଧୋନୀ ଏବଂ ଫାରୁକଙ୍କୁ ପଛରେ ପକାଇଦେଇଛନ୍ତି।
୧-ରିଷଭ ପନ୍ତ-୨୯ ପାଳିରେ ୧୦୦୦ ପାର୍*
୨-ଏମ୍ଏସ୍ ଧୋନୀ-୩୨ ପାଳିରେ ୧୦୦୦ ପାର
ଏହାଛଡ଼ା ସେ ଇଂଲଣ୍ଡ ମାଟିରେ ସର୍ବାଧିକ ରନ୍ କରିବା ଘଟଣାରେ ପନ୍ତ ତୃତୀୟ ସ୍ଥାନରେ ପହଞ୍ଚିଛନ୍ତି। ଏବେ ଧୋନୀ ଏବଂ ଫାରୁକ୍ ତାଙ୍କଠାରୁ ଆଗରେ ଅଛନ୍ତି। ୨୦୧୮ରୁ ଏଯାବତ ଟେଷ୍ଟ କ୍ରିକେଟରେ ସର୍ବାଧିକ ଟେଷ୍ଟ ରନ୍ କରିଥିବା ଉଇକେଟକିପର ବ୍ୟାଟ୍ସମ୍ୟାନ୍ଙ୍କ ମଧ୍ୟରେ ତୃତୀୟ ସ୍ଥାନରେ ଅଛନ୍ତି।
