ବର୍ମିଂହାମ୍, ୨।୭- ଭାରତ ଓ ଇଂଲଣ୍ଡ ମଧ୍ୟରେ ସ୍ଥଗିତ ରହିଥିବା ସିରିଜର ୫ମ ତଥା ଅନ୍ତିମ ଟେଷ୍ଟ ଶୁକ୍ରବାର ଆରମ୍ଭ ହୋଇଯାଇଛି। ବର୍ଷା ବାଧାପ୍ରାପ୍ତ ମ୍ୟାଚରେ ଭାରତ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ୯୮ ରନ୍ରେ ୫ ଉଇକେଟ ହରାଇଥିଲା। ମାତ୍ର ଯୁବ ଉଇକେଟ କିପର ରିଷଭ ପନ୍ତ ଓ ଅଲ୍ରାଉଣ୍ଡର ରବୀନ୍ଦ୍ର ଜାଡେଜା ଦ୍ୱିଶତକୀୟ ଭାଗୀଦାରି ଗଢ଼ି ଭାରତକୁ ଏକ ସମ୍ମାନଜନକ ସ୍କୋରରେ ପହଞ୍ଚାଇଛନ୍ତି। ପ୍ରଥମ ଦିବସ ଖେଳ ଶେଷ ହେବା ବେଳକୁ ଭାରତ ୭ ଉଇକେଟ ହରାଇ ୩୩୮ ରନ କରିଛି। ପନ୍ତ ଓ ଜାଡେଜା ୬ଷ୍ଠ ଉଇକେଟରେ ୨୩୯ ବଲ୍ରୁ ୨୨୨ ରନ୍ ଯୋଗ କରିଛନ୍ତି। କ୍ୟାରିୟରର ୫ମ ଟେଷ୍ଟ ଶତକ ହାସଲ କରିଥିବା ପନ୍ତ ୧୧୧ ବଲ୍ରୁ ୧୪୬ (୨୦ ଚୌକା, ୪ ଛକା) ରନ୍ କରି ଭାରତୀୟ ଇନିଂସର ମେରୁଦଣ୍ଡ ସାଜିଛନ୍ତି। ଜୋ ରୁଟ୍ଙ୍କୁ ଏକ ଛକା ମାରିବା ପରେ ଚୌକା ଲଗାଇ ୧୫୦ ରନ୍ ପୂରଣ କରିବା ଚକ୍କରରେ ଥିବା ପନ୍ତ ସ୍ଲିପ୍ରେ ଜ୍ୟାକ୍ କ୍ରଲିଙ୍କୁ କ୍ୟାଚ ଦେଇଥିଲେ। ଜାଡେଜା ୧୬୩ ବଲ୍ରୁ ୮୩ (୧୦ ଚୌକା) ରନ୍ରେ ଅପରାଜିତ ରହିଥିଲେ। ଇଂଲଣ୍ଡ ମାଟିରେ କୌଣସି ଟେଷ୍ଟର ପ୍ରଥମ ଦିବସରେ ୩୩୮ ରନ କରିବା ଭାରତ ପାଇଁ ଏହା ପ୍ରଥମ। ପୂର୍ବରୁ ୧୯୯୦ରେ ଓଭାଲଠାରେ ଭାରତ ସର୍ବାଧିକ ୩୨୪ ରନ କରିଥିଲା।
ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେଇଥିଲା ଇଂଲଣ୍ଡ। ଭାରତ ପକ୍ଷରୁ ଶୁବମନ ଗିଲ୍ ଓ ଚେତେଶ୍ୱର ପୂଜାରା ଇନିଂସ ଆରମ୍ଭ କରିଥିଲେ। ଟିମ୍ ଇଣ୍ଡିଆ ଭଲ ଆରମ୍ଭ କରିଥିଲେ ହେଁ ଘରୋଇ ଦଳର ଜେମ୍ସ ଆଣ୍ଡରସନଙ୍କ ଡବଲ ଷ୍ଟ୍ରାଇକ୍ ଭାରତର ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟ ଘଟାଇଥିଲା। ଗିଲ୍ ୧୭ ରନ କରିଥିବା ବେଳେ ଆଣ୍ଡରସନଙ୍କ ବଲ୍ରେ ଜ୍ୟାକ୍ କ୍ରଲିଙ୍କୁ କ୍ୟାଚ ଦେଇଥିଲେ। ସେହିପରି ପୂଜାରା ୧୩ ରନ କରି ଆଣ୍ଡରସନଙ୍କ ଦ୍ୱିତୀୟ ଶିକାର ହୋଇଥିଲେ। ଭାରତ ୨ ଉଇକେଟ ହରାଇ ୫୩ ରନ କରିଥିବା ବେଳେ ବର୍ଷା ପାଇଁ ଦେଢ଼ ଘଣ୍ଟା ଖେଳ ବନ୍ଦ ରହିଥିଲା। ବର୍ଷା ଛାଡ଼ିବାପରେ ମ୍ୟାଟ୍ଟି ପଟ୍ସ ୨୦ ରନ କରିଥିବା ହନୁମା ବିହାରୀଙ୍କୁ ଏଲ୍ବିଡବ୍ଲ୍ୟୁ ଆଉଟ କରିଥିବା ବେଳେ ବିରାଟ କୋହଲି (୧୧ ରନ)ଙ୍କୁ କ୍ଲିନ୍ ବୋଲ୍ଡ କରି ବଡ଼ ସଫଳତା ପାଇଥିଲେ। ଶ୍ରେୟାସ ଆୟାର ମଧ୍ୟ ଖରାପ ଫର୍ମ ଜାରିରଖି ମାତ୍ର ୧୫ ରନ କରିବାକୁ ସକ୍ଷମ ହୋଇଥିଲେ। ଇଂଲଣ୍ଡରେ ଜେମ୍ସ ଆଣ୍ଡରସନ ୩ଟି, ମ୍ୟାଟ୍ଟି ପଟ୍ସ ୨ଟି ଏବଂ ଜୋ ରୁଟ ଓ ବେନ୍ ଷ୍ଟୋକ୍ସ ଗୋଟିଏ ଲେଖାଏ ଉଇକେଟ ନେଇଥିଲେ।