ନିମାପଡ଼ା,୨୬।୧୧(ରଞ୍ଜନ ପଟ୍ଟନାୟକ)କାଗଜ ଡଙ୍ଗା ଦେଇଛି ରୋଜଗାର। ଏଭଳି ସ୍ଥିତି ନିମାପଡ଼ା ବ୍ଲକ ଅଧୀନ ସାଇଁଶ ପଞ୍ଚାୟତ ତୋରିହଁବନ୍ଧ ଗ୍ରାମରେ ଦେଖିବାକୁ ମିଳିଛି। ଗ୍ରାମର ମହିଳା ଫୁର୍ସତ୍ ସମୟରେ କାଗଜ ଡଙ୍ଗା ତିଆରି କରି କିଭଳି ଆତ୍ମ ନିର୍ଭରଶୀଳ ହୋଇପାରିଛନ୍ତି। ଗ୍ରାମର ୧୦ ଜଣ ମହିଳା ଆତ୍ମନିର୍ଭରଶୀଳ ହେବା ଉଦ୍ଦେଶ୍ୟରେ ଆଜକୁ ୧୦ ବର୍ଷ ତଳେ ଗଠନ କରିଥିଲେ ‘ଗୋପବନ୍ଧୁ ସ୍ବୟଂ ସହାୟକ ଗୋଷ୍ଠୀ’। ଉକ୍ତ ଗୋଷ୍ଠୀର ମହିଳା ଆଜି ରଙ୍ଗ ବେରଙ୍ଗର କାଗଜ ଡଙ୍ଗା ତିଆରି କରି ହଜାର ହଜାର ଟଙ୍କା ରୋଜଗାର କରିପାରୁଛନ୍ତି। ଦିନକ ପରେ କାର୍ତ୍ତିକ ପୂର୍ଣ୍ଣିମା। ଏନେଇ ଲୋକଙ୍କ ଆବଶ୍ୟକ ପଡ଼ିଥାଏ ଡଙ୍ଗା। ବଜାରରେ ବିଭିନ୍ନ ପ୍ରକାର ହାତ ତିଆରି ଡଙ୍ଗା ବିକ୍ରି ହୋଇଥାଏ। ତାକୁ କିଣିବା ପାଇଁ ବଜାର ହାଟରେ ଭିଡ଼ ହୋଇଥାଏ। ଲୋକଙ୍କ ଆବଶ୍ୟକତାକୁ ଦେଖି ଗୋଷ୍ଠୀର ମହିଳା ନିଜେ ଡଙ୍ଗା ତିଆରି କରିବାକୁ ମନ ବଳାଇଥିଲେ। ଜଟଣୀ ଅଞ୍ଚଳର ଅନସୂୟା ମହାନ୍ତିଙ୍କଠାରୁ ପ୍ରେରଣା ପାଇ ମହିଳାମାନେ କାର୍ଯ୍ୟ ଆରମ୍ଭ କରିଥିଲେ। କାର୍ଟୁନ, ପଞ୍ଚରଙ୍ଗି କାଗଜ, ଜମ୍ବୁରା ଏବଂ ରଦି କାଗଜକୁ ବ୍ୟବହାର କରି ସୁନ୍ଦର ସୁନ୍ଦର ଡଙ୍ଗା ନିର୍ମାଣ କରିଥାନ୍ତି। ଗୋଷ୍ଠୀର ସଦସ୍ୟା ଏକତ୍ରିତ ହୋଇ ୧ ନଂ. ଠାରୁ ୧୦ନଂ. ପର୍ଯ୍ୟନ୍ତ ବିଭିନ୍ନ ପ୍ରକାରର ଡଙ୍ଗା ନିର୍ମାଣ କରିବାରେ ଲାଗି ପଡ଼ିଛନ୍ତି; ଯାହାର ମୂଲ୍ୟ ସର୍ବନିମ୍ନ ୧ ଟଙ୍କାଠାରୁ ୧୦ ଟଙ୍କା ପର୍ଯ୍ୟନ୍ତ ରହିଛି। ଏମାନଙ୍କ ହାତ ତିଆରି ଡଙ୍ଗା ଏବେ କଟକ, ପୁରୀ, ଭୁବନେଶ୍ୱର, ଖୋର୍ଦ୍ଧା ଆଦି ଅଞ୍ଚଳକୁ ବିକ୍ରି ପାଇଁ ଯାଉଛି। ବେପାରୀ ମଧ୍ୟ ତାଙ୍କଠାରୁ ଡଙ୍ଗା ନେଉଛନ୍ତି। ଏହାଦ୍ୱାରା ସେମାନେ ନିଜ ପରିଶ୍ରମ ମୁତାବକ ପାରିଶ୍ରମିକ ପାଇ ଏବେ ନିଜ ଗୋଡ଼ରେ ଠିଆ ହୋଇପାରିଛନ୍ତି। ସରକାରୀ ପ୍ରୋତ୍ସାହନ ମିଳିଲେ ଅଧିକ ରୋଜଗାର କରିବା ସହିତ ଗ୍ରାମାଞ୍ଚଳର ବେରୋଜଗାର ମହିଳାଙ୍କୁ ଏଥିରେ ସାମିଲ କରି ଆତ୍ମନିର୍ଭରଶୀଳ କରାଇପାରନ୍ତୁ ବୋଲି ଗୋଷ୍ଠୀର ସଭାନେତ୍ରୀ ଶର୍ମିଷ୍ଠା ପ୍ରଧାନ, ସମ୍ପାଦିକା କନକଲତା ପ୍ରଧାନ, ସଭ୍ୟା ସାରାଣୀ ରଥ, ସବିତା ପ୍ରଧାନ, ମମତା ପ୍ରଧାନ, ବିଜୟଲକ୍ଷ୍ମୀ ପ୍ରଧାନ, ଖୁଲଣା ପ୍ରଧାନ, ଉଲ୍ଲାସ ପ୍ରଧାନ, ସସ୍ମିତା ପ୍ରଧାନ ପ୍ରମୁଖ କହିଛନ୍ତି।
