ବଅଁରପାଳ,୧୦ା୭(ଉପେନ୍ଦ୍ର ରାଉତ)
ଗଢ଼ିନି ପ୍ରକୃତି। ସୁଗନ୍ଧ ଦେଇନାହାନ୍ତି ଈଶ୍ୱର। ଗେଣ୍ଡୁ ପରି ଗୋଲଗାଲ ନୁହେଁ କି ଗୋଲାପ ଭଳି ଆକର୍ଷଣ ମଧ୍ୟ ନାହିଁ। ତଥାପି ଲକ୍ଡାଉନ୍ ଯୋଗୁ ବନ୍ଦ ପଡ଼ିଥିବା ଫୁଲ ବ୍ୟବସାୟକୁ ଜୀବନ ଦେଇଛି ହାତ ତିଆରି କାଗଜଫୁଲ। ଏବେ କଟକଣା ପାଇଁ କୋଲକାତାରୁ ତାଜା ଫୁଲ ଆସିପାରୁ ନ ଥିବା ବେଳେ ଏହି କାଗଜଫୁଲ ହିଁ ବରଗାଡ଼ି ଓ ବେଦି ସାଜସଜ୍ଜାର ଏକମାତ୍ର ବିକଳ୍ପ ସାଜିଥିବା କହିଛନ୍ତି ଅନୁଗୋଳ ଜିଲା ବଅଁରପାଳର ବହୁ ଫୁଲ ବ୍ୟବସାୟୀ।
ବ୍ୟବସାୟୀ ପୀତାମ୍ବର ପ୍ରଧାନ ଓ ଗଙ୍ଗାକୁମାର କହିଛନ୍ତି, ଲକ୍ଡାଉନ୍ ପୂର୍ବରୁ ବସିବାକୁ ସମୟ ନ ଥିଲା। ବାହାଘର, ବ୍ରତଘର ଠାରୁ ଆରମ୍ଭ କରି ସଭା ସମିତି ଯାଏ ସବୁଠି ଫୁଲର ସାଜସଜ୍ଜା ପାଇଁ ବରାଦ ପରେ ବରାଦ ମିଳୁଥିଲା। କିନ୍ତୁ ମାର୍ଚ୍ଚରୁ କରୋନା କଟକଣା ଲାଗୁ ପରଠାରୁ ବ୍ୟବସାୟ ପୂରା ବନ୍ଦ ହୋଇଯାଇଥିଲା। ପରେ ଦୋକାନ ବଜାର ଖୋଲିବାକୁ ସରକାର ଅନୁମତି ଦେଇଥିଲେ ହେଁ ପୂଜା, ପର୍ବ ଓ ସଭାସମିତି ଉପରେ କଡ଼ା କଟକଣା ଜାରି ରହିଛି। ବଡ଼ ଧରଣର ଆୟୋଜନକୁ ସମ୍ପୂର୍ଣ୍ଣ ମନା ଥିବାବେଳେ ବିବାହ, ବ୍ରତ ଆଦିରେ ଜାକଜମକକୁ ବାରଣ କରାଯାଇଛି। ତେଣୁ ଏସବୁ ମାଙ୍ଗଳିକ କାର୍ଯ୍ୟକୁ ଲୋକେ ଯଥାସମ୍ଭବ ଘୁଞ୍ଚାଇ ଦେଉଛନ୍ତି। କେଉଁଠି କେମିତି ସାଜସଜ୍ଜା କାମଟିଏ ଜୁଟିଲେ ବି ବରାଦ ମୁତାବକ ଫୁଲ ମିଳୁନି। ଓଡ଼ିଶାର ଫୁଲ ବ୍ୟବସାୟୀମାନେ ସାଧାରଣତଃ କୋଲକାତା ମାର୍କେଟ ଉପରେ ନିର୍ଭର କରିଥାନ୍ତି। ସେଠାରୁ ଦୈନିକ ଆସୁଥିବା ସଜଫୁଟା ଗୋଲାପ, ରଜନୀଗନ୍ଧା, ସେବତୀ, ଗେଣ୍ଡୁ ଆଦିର ଚାହିଦା ଏଠାରେ ବହୁ ଅଧିକ। ହେଲେ ଲକ୍ଡାଉନ୍ ଯୋଗୁ କୋଲକାତାରୁ ଫୁଲ ଆସିବା କଷ୍ଟକର ହୋଇପଡ଼ୁଛି। ଯାହା କିଛି ଗାଡ଼ିରେ ଆସୁଛି ତାହା ଚାହିଦା ପୂରଣ କରିପାରୁ ନାହିଁ। ବଅଁରପାଳ ବଜାରରେ ୧୦ରୁ ଅଧିକ ଫୁଲ ଦୋକାନୀ ବର୍ଷ ତମାମ ଭଲ ବ୍ୟବସାୟୀ କରୁଥିଲେ। ଗୋଟିଏ ବରଗାଡ଼ି ସଜାଇଲେ ୪ରୁ ୫ ହଜାର ଟଙ୍କା ପାଉଥିଲେ। କିନ୍ତୁ ଏବେ ସେପରି ବାହାଘର ନାହିଁ କି ସାଜସଜ୍ଜା ପାଇଁ ସଜ ଫୁଲ ନାହିଁ। ତେଣୁ କାଗଜ ଓ ପ୍ଲାଷ୍ଟିକ୍ ନିର୍ମିତ ଫୁଲକୁ ବ୍ୟବହାର କରିବାକୁ ପଡ଼ୁଛି। ଗେଣ୍ଡୁ, ରଜନୀଗନ୍ଧା ଓ ଗୋଲାପ ପରି ଏହା ସୁବାସିତ ହୋଇ ନ ଥିଲେ ବି ସୌନ୍ଦର୍ଯ୍ୟ ପାଇଁ ବେଦୀ, ବରଗାଡ଼ିରେ ସଜାଇବାକୁ ପଡ଼ୁଛି। ଫଳରେ ଅଧିକ ଅର୍ଥ ମିଳୁ ନ ଥିଲେ ମଧ୍ୟ ଯାହା କିଛି ରୋଜଗାର ହେଉଛି ସେଥିରେ ପରିବାର କଷ୍ଟେମଷ୍ଟେ ଚଳିଯାଉଛି ବୋଲି ଫୁଲ ବ୍ୟବସାୟୀ ପୀତାମ୍ବର ଓ ଗଙ୍ଗାକୁମାର ପ୍ରକାଶ କରିଛନ୍ତି।