ସୋନେପତ୍, ୨୪ା୧୦ (ପି.ଟି.)- କୋଭିଡ୍ ଟେଷ୍ଟରେ ପଜିଟିଭ ହୋଇଥିବା ପାରା-ତୀରନ୍ଦାଜ ଅଙ୍କିତ ହସ୍ପିଟାଲରୁ ମୁକ୍ତି ଲାଭ କରିଛନ୍ତି। ତେବେ ସେ ୧୦ ଦିନ ପାଇଁ ହୋମ୍ କ୍ୱାରାଣ୍ଟାଇନ୍ରେ ରହିବେ ବୋଲି ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ପକ୍ଷରୁ ଶୁକ୍ରବାର ପ୍ରକାଶ କରାଯାଇଛି। ସ୍ଥାନୀୟ ସାଇ ନର୍ଦନ ରିଜିଓନାଲ ସେଣ୍ଟରରେ ଏକ ଜାତୀୟ କ୍ୟାମ୍ପବେଳେ ହୋଇଥିବା ଟେଷ୍ଟରେ ପଜିଟିଭ ପରେ ଅକ୍ଟୋବର ୧୪ରେ ଅଙ୍କିତଙ୍କୁ ଭଗବାନ ଦାସ ହସ୍ପିଟାଲରେ ଭର୍ତ୍ତି କରାଯାଇଥିଲା। ଅଙ୍କିତଙ୍କୁ ତାଙ୍କ ପରିବାର ଆସି ହସ୍ପିଟାଲରୁ ନେଇ ଯାଇଛନ୍ତି। ଅଙ୍କିତ ନେଗେଟିଭ୍ କୋଭିଡ୍-୧୯ ଆର୍ଟି-ପିସିଆର୍ ରିପୋର୍ଟ ଦାଖଲ କରିବା ପରେ ଅକ୍ଟୋବର ୫ରେ ଆରମ୍ଭ ହୋଇଥିବା ଜାତୀୟ କ୍ୟାମ୍ପରେ ଯୋଗଦେଇଥିଲେ। ଏସ୍ଓପି (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର) ଅନୁସାରେ ଅକ୍ଟୋବର ୧୨ରେ ତାଙ୍କ ନିକଟରୁ ଆଉ ଥରେ ସାମ୍ପଲ ନିଆଯାଇଥିଲା ଏବଂ ଫଳାଫଳ ପଜିଟିଭ ଆସିଥିଲା। ସୂଚନାଯୋଗ୍ୟ, ‘ଖେଲୋ ଇଣ୍ଡିଆ ଫିର୍ ସେ୍’ କାର୍ଯ୍ୟକ୍ରମର ଅଂଶବିଶେଷ ସ୍ବରୂପ ସାଇ ଟୋକିଓ ଅଲିମ୍ପିକ୍ସରେ ଭାଗନେବାକୁ ଥିବା ପାରା-ଆଥଲେଟ୍ସ ଓ ଆଥଲେଟ୍ସମାନଙ୍କ ଟ୍ରେନିଂ ଆରମ୍ଭ କରିଥିଲା। ଏହା ଅକ୍ଟୋବର ୫ରୁ ପର୍ଯ୍ୟାୟକ୍ରମେ ସମଗ୍ର ଦେଶରେ ରହିଥିବା ଏହାର ବିଭିନ୍ନ ନ୍ୟାଶନାଲ ସେଣ୍ଟର ଅଫ୍ ଏକ୍ସଲେନ୍ସରେ ଚାଲୁ ରହିଛି।
