ଭୁବନେଶ୍ୱର,୧୦।୪(ବ୍ୟୁରୋ): ଭୁବନେଶ୍ୱର ସହାରଞ୍ଚଳ ଜିଲା ପୋଲିସ (ୟୁପିଡି) ପକ୍ଷରୁ ରବିବାର ଝାରପଡ଼ା ସ୍ବତନ୍ତ୍ର ଜେଲରେ ବିଚାରଧୀନ କଏଦୀଙ୍କ ପରେଡ କରାଯାଇଛି। ଏହି ପରେଡରେ ଭୁବନେଶ୍ୱରରେ ନବନିଯୁକ୍ତ ୩୯ଜଣ ଏସ୍ଆଇ ଅଭିଯୁକ୍ତଙ୍କୁ ଚିହ୍ନିଥିଲେ। ଏସ୍ଆଇଙ୍କ ସମେତ ୫୨ଜଣ ପୋଲିସ ଅଧିକାରୀ ଏହି ପରେଡ୍ରେ ଭାଗ ନେଇଥିଲେ। ବିଶେଷକରି ଏସ୍ଆଇମାନେ ଗତ ୧ରୁ ୭ ତାରିଖ ମଧ୍ୟରେ ସମ୍ପତ୍ତିଗତ ମାମଲାରେ ଜେଲ୍ରେ ଥିବା ୨୭ଜଣ ଅଭିଯୁକ୍ତଙ୍କୁ ପ୍ରତ୍ୟକ୍ଷ ଚିହ୍ନିଥିଲେ। ଏଥିସହ ଗତ ସପ୍ତାହରେ ଜେଲରୁ ମୁକୁଳିଥିବା ଅଭିଯୁକ୍ତଙ୍କ ତଥ୍ୟ ମଧ୍ୟ ରଖିଥିଲେ। ସେହିପରି ପୋଲିସ ଅଧିକାରୀମାନେ ଜେଲରେ ଥିବା ପୁରୁଣା ଅଭିଯୁକ୍ତଙ୍କୁ ଚିହ୍ନିଥିଲେ। ତେବେ ପ୍ରତି ରବିବାର ଜେଲ ପରେଡ କରାଯାଉଥିବାବେଳେ ମାସରେ ୨ଥର ଏଭଳି ସମସ୍ତଙ୍କୁ ନେଇ କାର୍ଯ୍ୟକ୍ରମ କରିବାକୁ ଲକ୍ଷ ରଖାଯାଇଥିବା ଅତିରିକ୍ତ ଡିସିପି ପ୍ରକାଶ ଚନ୍ଦ୍ର ପାଲ କହିଛନ୍ତି। ଏହି ପରେଡ୍ ଦ୍ୱାରା ଅଭିଯୁକ୍ତଙ୍କୁ ପରବର୍ତ୍ତୀ ସମୟରେ ପୋଲିସ ଅଧିକାରୀମାନେ ଚିହ୍ନି ପାରିବେ ବୋଲି ସେ କହିଛନ୍ତି।
ଞପାଲିସ ମାନୁଆଲ ଅନୁଯାୟୀ, ଜେଲରେ ରହୁଥିବା ଅଭିଯୁକ୍ତଙ୍କ ଉପରେ ପ୍ରତ୍ୟେକ ଥାନାର ଅଧିକାରୀ ନଜର ରଖିବାର ନିୟମ ରହିଛି। ବିଶେଷକରି ଚୋରି, ଲୁଟ୍, ଡ଼କାୟତି ଭଳି ମାମଲାରେ ସମ୍ପୃକ୍ତ ଥିବା ଅଭିଯୁକ୍ତଙ୍କ ସଂକ୍ରାନ୍ତରେ ପୋଲିସ ତଥ୍ୟ ରଖିବ। ଏଥିସହ ପ୍ରତ୍ୟେକ ସପ୍ତାହରେ ଜେଲକୁ କେତେ ଅଭିଯୁକ୍ତ ଆସିଲେ ଓ କେତେ ମୁକୁଳିଲେ ସେନେଇ ତଥ୍ୟ ରଖିବାର ନିୟମ ରହିଛି।