ପାରାଦୀପ, ୨୪।୧୨(ଶରତ ରାଉତ):ପୂର୍ବୋଦୟରୁ ଭାରତର ବିକାଶ ହେବ। ଏହାର ପ୍ରକୃଷ୍ଟ ସ୍ଥାନ ହେଉଛି ପାରାଦୀପ। ରାଜ୍ୟ ଓ ଦେଶ ବିକାଶରେ ପାରାଦୀପ ହେଉଛି ମାଧ୍ୟମ। ବିଶ୍ୱ ବ୍ୟବସାୟ କ୍ଷେତ୍ରରେ ପାରାଦୀପର ନାମ ଅଛି ବୋଲି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସୋମବାର ପାରାଦୀପର ଏକ ସମ୍ବର୍ଦ୍ଧନା ସଭାରେ ଯୋଗଦେଇ କହିଛନ୍ତି। ସ୍ଥାନୀୟ ଜୟଦେବ ସଦନ ଆଗରେ ପାରାଦୀପ ଭାଜପା ପକ୍ଷରୁ ଆୟୋଜିତି ସମ୍ବର୍ଦ୍ଧନା ସଭାରେ କେନ୍ଦ୍ରମନ୍ତ୍ରୀ ପ୍ରଧାନଙ୍କୁ ସବୁ ଆଗଧାଡ଼ିର ନେତା ଓ କର୍ମୀମାନେ ସମ୍ବର୍ଦ୍ଧନା ଜଣାଇଥିଲେ।
ଏହି ଅବସରରେ କେନ୍ଦ୍ରମନ୍ତ୍ରୀ ପ୍ରଧାନ ତାଙ୍କ ବକ୍ତବ୍ୟରେ କହିଥିଲେ, ଏକଦା ଜଗତ୍ସିଂହପୁର ଜିଲାର ଅନ୍ୟ ଦଳ ନେତାମାନେ କହୁଥିଲେ, ଲୁଣି ପାଣିରେ ପଦ୍ମ ଫୁଟିବ ନାହିଁ। ଏ କଥା କହିବା ପରେ ପ୍ରଥମେ ଆମେ ଦୁଇଟି ଜିଲା ପରିଷଦ ଜିତିଥିଲୁ। ଏବେ ପାରାଦୀପର ବିଧାୟକ ହୋଇଛନ୍ତି ଏ ଅଞ୍ଚଳର ପୁଅ ସମ୍ପଦ ଚନ୍ଦ୍ର ସ୍ବାଇଁ। ଡବଲ୍ ଇଞ୍ଜିନ ସରକାରରେ ସେ ଡ୍ରାଇଭର ଭଳି କାମ କରୁଛନ୍ତି। ଶିଳ୍ପାୟନକୁ ବଢାଇବା ପାଇଁ ସମ୍ପଦ କାର୍ଯ୍ୟ କରିବେ। ଏକଦା ତିର୍ତ୍ତୋଲ ସୂତାକଳ ରାଜ୍ୟର ପ୍ରମୁଖ ଥିଲା। ତାହା ବନ୍ଦ ଅଛି। ଏବେ ପାରାଦୀପରୁ ସୂତା ଉତ୍ପାଦନ ହେବ ଏବଂ ତାହା ଭାରତକୁ ଯୋଗାଇବ। ୬୧ ହଜାର କୋଟି ଟଙ୍କା ବ୍ୟୟ ଅଟକଳରେ ୫୦୦ ଉଦ୍ୟୋଗ ତିଆରି ହେବ। ଓଡ଼ିଆ ଯୁବକ କାରଖାନାର ମାଲିକ ସାଜିବେ। ପାରାଦୀପ ହେବ ଓଡ଼ିଶାର ପ୍ରୟୋଗଶାଳା। ଓଡ଼ିଶାର ଦରିଦ୍ରତା ସରକାରଙ୍କୁ ସୁହାଉଥିଲା। ଏବେ ଡବଲ୍ଇଞ୍ଜିନ ସରକାର ଦାରିଦ୍ର୍ୟ ଦୂରୀକରଣ କରିବ। ଏଥିପାଇଁ ଜଗତ୍ସିଂହପୁର ଜିଲାର ୩ ଜଣ ଲୋକ ପ୍ରତିନିଧି ନିଷ୍ଠାର ସହିତ କାମ କରିବେ ବୋଲି ଦୃଢ଼ ବିଶ୍ୱାସ ରହିଛି। ମହିଳାମାନଙ୍କ ପାଇଁ ସୁଭଦ୍ରା ଯୋଜନାରେ ୧୦ ହଜାର କୋଟି ଟଙ୍କା ରଖାଯାଇଛି। ଆମେ ଜଗତ୍ସିଂହପୁର ଜିଲାରୁ ଦୁଇଟି ଆସନ ପାଇଛୁ। ବାଲିକୁଦା-ଏରସମା ଓ ତିର୍ତ୍ତୋଲରୁ ଅଳ୍ପକେ ବଞ୍ଚତ୍ତ ହୋଇଗଲୁ। ଆରଥରକୁ ନିଶ୍ଚିତ ଜିତିବୁ। ଏଥିପାଇଁ ନେତା ଓ କର୍ମୀ ପୁରୁଣାଙ୍କ ପ୍ରତି ସମ୍ମାନ ଦେବା ସହ ନୂତନ କର୍ମୀ ସୃଷ୍ଟି କରନ୍ତୁ। ଦଳ ପାଇଁ ଆଦର୍ଶ ନୂଆ କର୍ମୀ ବୋଲି କେନ୍ଦ୍ରମନ୍ତ୍ରୀ ପ୍ରଧାନ କହିଛନ୍ତି।
ଏହି କାର୍ଯ୍ୟକ୍ରମରେ ଶିଳ୍ପ ମନ୍ତ୍ରୀ ସ୍ବାଇଁଙ୍କ ସମେତ ଜଗତ୍ସିଂହପୁର ଏମ୍ପି ବିଭୁପ୍ରସାଦ ତରାଇ, ବିଧାୟକ ଅମରେନ୍ଦ୍ର ଦାଶ, ବାଲିକୁଦା-ଏରସମା ବିଧାୟକ ପ୍ରାର୍ଥୀ ସତ୍ୟସାରଥି ମହାନ୍ତି, ତିର୍ତ୍ତୋଲ ବିଧାୟକ ପ୍ରାର୍ଥୀ ରାଜକିଶୋର ବେହେରା, ଜିଲା ଭାଜପା ସଭାପତି ସତ୍ୟବ୍ରତ ମହାପାତ୍ରଙ୍କ ସମେତ ଅନ୍ୟ କର୍ମୀମାନେ ଉପସ୍ଥିତ ଥିଲେ। ରାଜ୍ୟରେ ଭାଜପା ସରକାର ଆସିବା ପରେ ପରିବର୍ତ୍ତନର ଧାରା ଆରମ୍ଭ ହୋଇଛି ଏବଂ କେନ୍ଦ୍ରମନ୍ତ୍ରୀ ପ୍ରଧାନଙ୍କ ଦିଗ୍ଦର୍ଶନରେ ବିକାଶର ଧାରା ଆରମ୍ଭ ହୋଇଛି ବୋଲି ନେତା ଓ କର୍ମୀମାନେ କହିଥିଲେ।