ଇଷ୍ଟବୋର୍ନ(ୟୁକେ),୨୫ା୬(ଏପି)- ଏଠାରେ ଚାଲିଥିବା ଭାଇକିଂ ଇଣ୍ଟରନ୍ୟାଶନାଲ ଗ୍ରାସ୍କୋର୍ଟ ଟେନିସ ଟୁର୍ନାମେଣ୍ଟରେ ଅଷ୍ଟ୍ରେଲିଆର ମାକ୍ସ ପର୍ସେଲ କ୍ୱାର୍ଟରଫାଇନାଲରେ ପ୍ରବେଶ କରିଛନ୍ତି। ୨୮୩ ର଼୍ୟାଙ୍କିଙ୍ଗପ୍ରାପ୍ତ ଏହି ଖେଳାଳି ଟପ୍ ସିଡ୍ ତଥା ୧୬ତମ ର଼୍ୟାଙ୍କିଙ୍ଗ ଫ୍ରାନ୍ସର ଗେଲ୍ ମନଫିଲ୍ସଙ୍କୁ ୬-୪, ୫-୭, ୬-୪ ସେଟ୍ରେ ହରାଇ ଦେଇଛନ୍ତି। ତାଙ୍କ କ୍ୟାରିୟରର ଏହା ହେଉଛି ସବୁଠାରୁ ବଡ଼ ବିଜୟ। ଟୁର୍ ଲେଭଲରେ ପ୍ରଥମ ଥର ସିଙ୍ଗଲ୍ସ କ୍ୱାର୍ଟରଫାଇନାଲରେ ସେ ପ୍ରବେଶ କରିପାରିଛନ୍ତି। ପର୍ସେଲ ଟୁର୍ନାମେଣ୍ଟର ଫାଇନାଲ କ୍ୱାଲିଫାଇଂ ରାଉଣ୍ଡରେ ପରାଜିତ ହୋଇଥିଲେ। ମାତ୍ର ଜଣେ ଖେଳାଳି ଓହରିଯିବାରୁ ତାଙ୍କ ସ୍ଥାନରେ ଏହି ଅଷ୍ଟ୍ରେଲୀୟ ଖେଳାଳିଙ୍କୁ ସୁଯୋଗ ମିଳିଥିଲା। ଟେନିସ୍ରେ ଏହାକୁ ଲକି ଲୁଜର କୁହାଯାଇଥାଏ। ଓ୍ବିମ୍ବେଲଡନ ଓ୍ବାର୍ମଅପ୍ ଟୁର୍ନାମେଣ୍ଟରେ ପର୍ସେଲ ପରବର୍ତ୍ତୀ ରାଉଣ୍ଡରେ ଆନ୍ଦ୍ରିଆସ ସେପିଙ୍କୁ ଭେଟିବେ।