କଟକ ଅଫିସ,୮।୭: ଚଳିତବର୍ଷ ମାଟ୍ରିକ ଫଳକୁ ନେଇ ଝାରସୁଗୁଡାର ଜଣେ ଅଭିଭାବକ ଅସନ୍ତୋଷ ପ୍ରକାଶ କରିବା ସହ ତାଙ୍କ ପୁତ୍ରଙ୍କ ସାନି ମୂଲ୍ୟାୟନ ପାଇଁ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଆବେଦନକାରୀ ନିରାକାର ପାରୁୱାଙ୍କ ପକ୍ଷରୁ ଆଇନଜୀବୀ ଆଶିଷ ମିଶ୍ର ଏ ନେଇ ମାମଲା ରୁଜୁ କରିଛନ୍ତି। ଏହି ମାମଲାରେ ରାଜ୍ୟ ସରକାରଙ୍କ ଗଣଶିକ୍ଷା ବିଭାଗ ସଚିବ, ମାଧ୍ୟମିକ ଶିକ୍ଷା ପରିଷଦ ସମ୍ପାଦକ, ଝାରସୁଗୁଡା ଜିଲାପାଳ, ଆରକ୍ଷୀ ଅଧୀକ୍ଷକ ଓ ଗହ୍ମାପଲ୍ଲୀ ସରସ୍ବତୀ ଶିଶୁ ମନ୍ଦିରର ପ୍ରଧାନ ଶିକ୍ଷକଙ୍କୁ ପକ୍ଷଭୁକ୍ତ କରାଯାଇଛି। ପିଟିଶନରେ ଦର୍ଶାଯାଇଛି, ଝାରସୁଗୁଡାର ଜିଲା ଗହ୍ମାପଲ୍ଲୀ ସରସ୍ବତୀ ଶିଶୁମନ୍ଦିରରେ ନିରାକାରଙ୍କ ପୁତ୍ର ଝୁନେସ ପାରୁୱା ଦଶମ ଶ୍ରେଣୀର ଛାତ୍ର ଥିଲେ। ସେ ପ୍ରତିବର୍ଷ ଶ୍ରେଣୀ ପରୀକ୍ଷାରେ ୮୫ରୁ ୯୦ ପ୍ରତିଶତ ମାର୍କ ରଖୁଥିଲେ। କିନ୍ତୁ ଚଳିତବର୍ଷ ମାଟ୍ରିକ ମୂଲ୍ୟାୟନବେଳେ ତାଙ୍କୁ କମ୍ମାର୍କ ଦିଆଯାଇଛି। ତେଣୁ ଝୁନେସଙ୍କ ମାଟ୍ରିକ ଫଳ ରଦ୍ଦ କରାଯିବା ସହ ସାନି ମୂଲ୍ୟାୟନପାଇଁ ଆବେଦନକାରୀ ପିଟିଶନରେ ଦର୍ଶାଇଛନ୍ତି।