ବ୍ରହ୍ମପୁର ଅଫିସ,୧୫ା୧୧: ବ୍ରହ୍ମପୁର ପୋଲିସ ଜିଲା ସଦର ଥାନା ଅନ୍ତର୍ଗତ ଗୌତମୀ ଗ୍ରାମରେ ହୋଇଥିବା ଏକ ବହୁଚର୍ଚ୍ଚିତ ଅନର କିଲିଂ ମାମଲାର ସୋମବାର ଶୁଣାଣି ହୋଇଥିଲା। ଅତିରିକ୍ତ ଜିଲା ଦୌରା ଜଜ୍ (ଏଡିଜେ)-୧ ସଂଘମିତ୍ରା ଶର୍ମା ପ୍ରମାଣ ଅଭାବରୁ ଉକ୍ତ ମାମଲାରୁ ବାପାମା’ଙ୍କୁ ନିର୍ଦ୍ଦୋଷ ସାବ୍ୟସ୍ତ କରିଛନ୍ତି। ନିର୍ଦ୍ଦୋଷ ବ୍ୟକ୍ତି ହେଲେ ବାପା ସେରା ଜେନା ଓ ମା’ ରୁନୁ ଜେନା ବୋଲି ତାଙ୍କ ଓକିଲ ପ୍ରଭାକର ସାବତ କହିଛନ୍ତି।
ଅନୁସାରେ, ସଦର ଥାନା ଅନ୍ତର୍ଗତ କାଉଖତ କେନାଲରୁ ୨୦୧୬ ଅଗଷ୍ଟ ୪ରେ ଜଣେ ନାବାଳିକାଙ୍କ ଗଳିତ ମୃତଦେହ ପୋଲିସ ଜବତ କରିଥିଲା। ଏ ନେଇ ପୋଲିସ ନଂ.୧୪/୧୬ରେ ଏକ ଅପମୃତ୍ୟୁ ମାମଲା ରୁଜୁକରି ତଦନ୍ତ ଆରମ୍ଭ କରିଥିଲା। ଗୌତମୀ ଗ୍ରାମର ସେରାଙ୍କ ଝିଅ ସନ୍ତୋଷିନୀ ଜେନା(୧୬) କିଛିଦିନ ହେଲା ଘରୁ ନିଖୋଜ ଥିବା ପୋଲିସ ଖବର ପାଇଥିଲା। ଅଧିକ ତଦନ୍ତ ପରେ ତାହା ସନ୍ତୋଷିନୀଙ୍କ ମୃତଦେହ ବୋଲି ଜଣାପଡ଼ିଥିଲା। ପରିବାରବର୍ଗ ମଧ୍ୟ ମୃତଦେହ ଚିହ୍ନଟ କରିଥିଲେ। ପୋଲିସ ଏ ନେଇ ଅଧିକ ଖୋଳତାଡ଼ କରିବା ପରେ ସନ୍ତୋଷିନୀ ଅନର କିଲିଂର ଶିକାର ହୋଇଥିବା ଜଣାପଡ଼ିଥିଲା। ପରିବାରବର୍ଗ ତାଙ୍କ ବାହାଘର ଠିକ୍ କରିଥିବା ବେଳେ ସେ ବାହା ହେବାପାଇଁ ମନା କରିଥିଲେ। ଅନ୍ୟ ଜଣେ ଯୁବକଙ୍କ ସହ ତାଙ୍କର ପ୍ରେମ ସମ୍ପର୍କ ଥିବା ସନ୍ଦେହକରି ସେରା ଓ ରୁନୁ ନିଜ ଝିଅକୁ ହତ୍ୟାକରି କେନାଲରେ ଫିଙ୍ଗି ଦେଇଥିଲେ।
ଘଟଣାରେ ପୋଲିସ ଉଭୟଙ୍କୁ ମାମଲା ନମ୍ବର ୧୪୬/୨୨ରେ ଗିରଫକରି କୋର୍ଟ ଚାଲାଣ କରିଥିଲା। ପ୍ରାୟ ୧ ବର୍ଷ ପରେ ସେରାଙ୍କୁ ହାଇକୋର୍ଟରୁ ଜାମିନ ମିଳିଥିଲା। ରୁନୁଙ୍କୁ ମଧ୍ୟ ବ୍ରହ୍ମପୁରର ତତ୍କାଳୀନ ଏଡିଜେ-୧ ସଞ୍ଜୟ କୁମାର ସାହୁ ଜାମିନ ଦେଇଥିଲେ। ସୋମବାର ଏହି ମାମଲାର ବିଚାର ବେଳେ ସେରା ଓ ରୁନୁଙ୍କୁ କୋର୍ଟରେ ହାଜର କରାଯାଇଥିଲା। ମାମଲାର ବିଚାର ବେଳେ ୩୨ ଜଣ ସାକ୍ଷୀଙ୍କ ବୟାନ ରେକର୍ଡ କରାଯାଇଥିଲା। ଉପଯୁକ୍ତ ପ୍ରମାଣ ଅଭାବରୁ ଏଡିଜେ-୧ ଉଭୟଙ୍କୁ ନିର୍ଦ୍ଦୋଷ ସାବ୍ୟସ୍ତ କରିଛନ୍ତି। ସରକାରଙ୍କ ପକ୍ଷରୁ ଏପିପି ଜ୍ଞାନେନ୍ଦ୍ର ନାଥ ଜେନା ଓ ମୁଦାଲାଙ୍କ ତରଫରୁ ବରିଷ୍ଠ ଆଇନଜୀବୀ ପ୍ରଭାକର ସାବତ ମକଦ୍ଦମା ପରିଚାଳନା କରିଥିଲେ।