ସିନାପାଲି,୧୦।୨(ଡି.ଏନ.ଏ.): ନୂଆପଡା ଜିଲା ସିନାପାଲି ବ୍ଲକ ଅନ୍ତର୍ଗତ ବରଗାଁ ଲିମପଡା ପ୍ରାଥମିକ ବିଦ୍ୟାଳୟରେ ଶିକ୍ଷକ ଶିକ୍ଷୟିତ୍ରୀ ଅବହେଳା କରୁଥିବା ଅଭିଯୋଗ ହୋଇଛି। ଏ ନେଇ ସ୍ଥାନୀୟ ଅଭିଭାବକ ତଥା ପରିଚାଳନା କମିଟି ସିନାପାଲି ଗୋଷ୍ଠୀ ଶିକ୍ଷାଧିକାରୀଙ୍କ ଦ୍ୱାରସ୍ଥ ହୋଇ ଲିଖିତ ଅଭିଯୋଗ କରିଛନ୍ତି। ଉକ୍ତ ବିଦ୍ୟାଳୟ ୨୦୦୭ରେ ପ୍ରତିଷ୍ଠିତ ହୋଇଥିବା ବେଳେ ବର୍ତ୍ତମାନ ବିଦ୍ୟାଳୟର ପାଞ୍ଚଟି ଶ୍ରେଣୀରେ ମୋଟ ୬୩ଜଣ ଛାତ୍ରୀଛାତ୍ର ଅଧ୍ୟୟନ କରୁଥିବା ବେଳେ ୩ଜଣ ଶିକ୍ଷକ ନିଯୁକ୍ତ ଅଛନ୍ତି। ଅଭିଯୋଗପତ୍ରରେ ଶିକ୍ଷକମାନେ ବିଦ୍ୟାଳୟକୁ ବିଳମ୍ବରେ ଆସୁଥିବା ସହ ମଧ୍ୟାହ୍ନ ଭୋଜନ ବଣ୍ଟନ ସମୟରେ ଛାତ୍ରୀଛାତ୍ରଙ୍କ ମଧ୍ୟରେ ପାତରଅନ୍ତର କରୁଥିବା ଉଲ୍ଲେଖ କରାଯାଇଛି। ଛାତ୍ରୀଛାତ୍ରମାନଙ୍କ ମଧ୍ୟରେ କୌଣସି ବିଶୃଙ୍ଖଳା ସୃଷ୍ଟି ହେଲେ ଶିକ୍ଷକମାନେ ସମାଧାନ କରୁନାହାନ୍ତି। ଏ ନେଇ ବାରମ୍ବାର ସ୍କୁଲ କର୍ତ୍ତୃପକ୍ଷଙ୍କୁ ଅବଗତ କରାଯାଇଥିଲେ ବି କୌଣସି ସୁଫଳ ମିଳି ନ ଥିବା ପ୍ରକାଶ କରିଛନ୍ତି। ପ୍ରଧାନ ଶିକ୍ଷକ ଡୋଲାମଣି ମେହେର ନିଜ ଦାୟିତ୍ୱରେ ଅବହେଳା କରୁଥିବା ଅଭିଭାବକମାନେ ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି। ଅଭିଯୋଗ ପତ୍ରରେ ବିଦ୍ୟାଳୟର ପିତୃମଞ୍ଚ, ମାତୃମଞ୍ଚ ତଥା ପରିଚାଳନା କମିଟି ସଦସ୍ୟ ସଦସ୍ୟା ଯୁଧିଷ୍ଠିର ଜଗତ, ହସିତ ଜଗତ, ଜଗମୋହନ ସୁନାନୀ, ଜଳନ୍ଧର ସୁନାନୀ, ଗୁପ୍ତେଶର ସୁନାନୀ, ଦେବ ସୁନାନୀ, ରଶ୍ମିତା ସୁନାନୀ, ଅକାଳୁ ଲୁହାର, ବିଭିଶନ ବାଗ, କୈକେୟୀ ତାଣ୍ଡି, ଲକ୍ଷ୍ମୀ ତାଣ୍ଡି, ସଞ୍ଜୟ ସୁନାନୀ, ମହେନ୍ଦ୍ର ସୁନାନୀ, କୈବଲ ସୁନାନୀ, ସୁମିତା ବିଶି, ଗୋଲେକ ବିଶି ପ୍ରମୁଖ ସାକ୍ଷର କରିଛନ୍ତି। ଏ ନେଇ ପ୍ରଧାନ ଶିକ୍ଷକ ମେହେରଙ୍କୁ ପଚାରିବାରୁ ଘଟଣାକୁ ଖଣ୍ଡନ କରିଛନ୍ତି। ଛୋଟଛୋଟ ପିଲାଙ୍କ ଘଟଣା କହି କୌଣସି ପ୍ରକାରପାତର ଅନ୍ତର କିମ୍ବା ଦାୟିତ୍ୱରେ ଅବହେଳା କରୁ ନ ଥିବା କହିଛନ୍ତି। ଶୁକ୍ରବାର ଆମ ବିଦ୍ୟାଳୟ ପରିଚାଳନା କମିଟି ବୈଠକ ହେବାର ସ୍ଥିର କରାଯାଇଛି। ସେ ଉପରେ ଆଲୋଚନା କରି ସମାଧାନ କରାଯିବ ବୋଲି ପ୍ରକାଶ କରିଛନ୍ତି। ଏ ନେଇ ସିନାପାଲି ଭାରପ୍ରାପ୍ତ ବିଇଓ ରୁଦରେଶ୍ୱର ମେହେରଙ୍କୁ ଯୋଗାଯୋଗ ସମ୍ଭବ ନ ହେବାରୁ କୌଣସି ପ୍ରତିକ୍ରିୟା ମିଳିପାରି ନାହିଁ। ଅପରପକ୍ଷରେ ସମସ୍ୟା ସମାଧାନ ନ ହେଲେ ଛାତ୍ରୀଛାତ୍ରମାନଙ୍କୁ ଅନ୍ୟତ୍ର ସ୍ଥାନାନ୍ତର କରିବାକୁ ବାଧ୍ୟ ହେବୁ ବୋଲି ଅଭିଭାବକମାନେ ଚେତାବନୀ ଦେଇଛନ୍ତି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ତୁରନ୍ତ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଦାବି ହେଉଛି।