ପୁଣେ,୧୨।୫: ମହାରାଷ୍ଟ୍ରର ପୁଣେରେ ଏକ ଅମାନବୀୟ ଘଟଣା ଘଟିଛି। ଏଠାରେ ଏକ ଦମ୍ପତି ୧୧ ବର୍ଷର ପୁଅକୁ ୨୦ଟି ବୁଲା କୁକୁର ସହ ଗୋଟିଏ ରୁମ୍ରେ ଅଟକ ରଖିଥିବା ଅଭିଯୋଗ ହୋଇଛି। ପୋଲିସ ଦମ୍ପତିଙ୍କ ବିରୋଧରେ ଏକ ମାମଲା ରୁଜୁ କରିଛି। ପୁଣେର କୋଣ୍ଡୱା ପୋଲିସ ଷ୍ଟେଶନରେ ଜୁଭେନାଇଲ ଜଷ୍ଟିସ ଆକ୍ଟ ଅନୁଯାୟୀ ଏହି ମାମଲା ରୁଜୁ ହୋଇଛି। ବାଳକଙ୍କ ଅବସ୍ଥା ସମ୍ପର୍କରେ ସ୍ଥାନୀୟ ଲୋକମାନେ ଅବଗତ ଥିବା ପୋଲିସ କହିଛି। ସ୍ଥାନୀୟ ଲୋକ ପିଲାଟିକୁ ଆପାର୍ଟମେଣ୍ଟ ଝରକାରୁ ଦେଖି ମାନସିକ ସ୍ତରରେ ବିବ୍ରତ ହୋଇପଡିଥିଲେ। ପଡୋଶୀ ଏନ୍ଜିଓ ସାହାଯ୍ୟ ଲୋଡି ପିଲାଟିକୁ ସେଠାରୁ ଉଦ୍ଧାର କରିଥିଲେ।
ଏନ୍ଜିଓ ଅଧିକାରୀ ଅନୁରାଧାଙ୍କ ଅନୁଯାୟୀ, ଆମେ ଜଣେ ବ୍ୟକ୍ତିଙ୍କଠାରୁ ଏନେଇ ସୂଚନା ପାଇଥିଲୁ। ଏନଜିଓ କର୍ମଚାରୀମାନେ ଆପାର୍ଟମେଣ୍ଟରେ ପହଞ୍ଚିବାରୁ ସେଠାରେ ଘର ବାହାରୁ ତାଲା ପଡିଥିବାର ଦେଖିବାକୁ ମିଳିଥିଲା। କିନ୍ତୁ ପିଲା ଏବଂ କୁକୁର ଭିତରେ ଥିଲେ। ଏହି ଆପାର୍ଟମେଣ୍ଟରେ କୁକୁରଙ୍କର କଙ୍କାଳ ମଧ୍ୟ ଦେଖିବାକୁ ମିଳିଥିଲା। ପିଲାଟିକୁ ବହୁତ ଖରାପ ଅବସ୍ଥାରେ ରଖାଯାଇଥିଲା। ପ୍ରାୟ ଦୁଇ ବର୍ଷ ହେବ ପିଲାଟି ସହ ଏପରି କାର୍ଯ୍ୟ କରାଯାଉଛି।
ସମ୍ପୃକ୍ତ ବାଳକଙ୍କ ପିତା ଏକ ଦୋକାନ କରନ୍ତି ଏବଂ ତାଙ୍କ ମା’ ସ୍ନାତକ। ଏହି ଘଟଣାରେ ଅଭିଯୁକ୍ତ ଦମ୍ପତି କୁହନ୍ତି ଯେ, ସେମାନେ କୁକୁରକୁ ଭଲ ପାଆନ୍ତି, ସେଥିପାଇଁ କୁକୁରଙ୍କୁ ଘରେ ରଖିଥିଲେ।
