କଟକ ଅଫିସ,୧।୮: କରୋନା ଆକ୍ରାନ୍ତ ଶିଶୁର ହସ୍ପିଟାଲରେ ମୃତ୍ୟୁ ହେବା ପରେ ତାକୁ ଧରି ମା’ ବାପା ସେଠାରୁ ଫେରାର ହୋଇଯାଇଛନ୍ତି। କଟକସ୍ଥିତ ଶିଶୁଭବନରେ ଶୁକ୍ରବାର ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି। ଆଣ୍ଟିଜେନ୍ ଟେଷ୍ଟ ରିପୋର୍ଟରେ ଉଭୟ ମା’-ଶିଶୁ ପଜିଟିଭ ଥିବା ଜଣାପଡ଼ିଛି।ସୂଚନା ଅନୁଯାୟୀ, ଶୁକ୍ରବାର ଦିନ ପ୍ରାୟ ୧୨ଟା ବେଳେ ଖୋର୍ଦ୍ଧା ଜିଲା ଧଉଳି ଥାନା ଅଞ୍ଚଳର ଜଣେ ଦମ୍ପତି ମାସକର ଶିଶୁକୁ ସଙ୍କଟାପନ୍ନ ଅବସ୍ଥାରେ ଶିଶୁଭବନକୁ ଆଣିଥିଲେ। ଶିଶୁଟି ସେପ୍ଟିସେମିଆ ଓ ବାତରୋଗରେ ଆକ୍ରାନ୍ତ ଥିବା ବେଳେ ତାକୁ ଆଇସୋଲେଶନରେ ରଖି ଚିକିତ୍ସା ଆରମ୍ଭ ହୋଇଥିଲା। ସେତେବେଳେ ଶିଶୁର ତାପମାତ୍ରା କମ୍ ଥିବା ସହ ଶ୍ୱାସକ୍ରିୟାରେ ସମସ୍ୟା ଥିବାରୁ ଡାକ୍ତର କୃତ୍ରିମ ଶ୍ୱାସକ୍ରିୟା ବା ସିପିଆର୍ (କାର୍ଡିଓ ପଲମୋନାରୀ ରିସସିଟୈଶନ) କରାଇଥିଲେ। ଅନ୍ୟ ସମସ୍ତ ଜରୁରୀ ଚିକିତ୍ସା ସତ୍ତ୍ୱେ ଶିଶୁଟିର ଜୀବନ ରକ୍ଷା କରାଯାଇ ପାରି ନ ଥିଲା। ଏହା ପୂର୍ବରୁ ଉଭୟ ଶିଶୁ ଓ ତାର ମାତା ପିତାଙ୍କ ଆଣ୍ଟିଜେନ ଟେଷ୍ଟ କରାଯାଇଥିଲା। ରିପୋର୍ଟରେ ମା’ ଓ ଶିଶୁ ପଜିଟିଭ ରହିଥିଲେ। ଏହାପରେ ମୃତ ଶିଶୁର କୋଭିଡ ନିୟମ ମୁତାବକ କାଗଜ ପ୍ରସ୍ତୁତି ସହ ଆକ୍ରାନ୍ତ ମା’ଙ୍କୁ କୋଭିଡ ହସ୍ପିଟାଲ ପଠାଇବା ପାଇଁ ଶିଶୁଭବନ ପକ୍ଷରୁ ବ୍ୟବସ୍ଥା ହେଉଥିଲା। କିନ୍ତୁ ଏତିକିବେଳେ ମୃତ ଶିଶୁକୁ ଧରି ତାର ମା’-ବାପା ସେଠାରୁ ଫେରାର ହୋଇଯାଇଥିଲେ। ଏନେଇ ହସ୍ପିଟାଲ କର୍ତ୍ତୃପକ୍ଷ ଲାଲବାଗ ଥାନାରେ ଏତଲା ଦେବା ପରେ ପୋଲିସ ତଦନ୍ତ ଆରମ୍ଭ କରିଛି।