ପଲକ୍କଡ (କେରଳ), ୧୧।୬: କେରଳର ଜଣେ ଯୁବକ ନିଜ ପ୍ରେମିକାଙ୍କୁ ୧୦ ବର୍ଷ ଧରି ରୁମ୍ରେ ଲୁଚାଇ ରଖିଥିଲେ। ଆଉ ଏ ସମ୍ପର୍କରେ ଟେର ପାଇ ନ ଥିଲେ ଯୁବକଙ୍କ ପରିବାର ଲୋକେ। ନିଖୋଜ ହେବାର ୧୦ ବର୍ଷ ପରେ ମିଳିଛି ୨୯ ବର୍ଷୀୟା ମହିଳାଙ୍କ ପତ୍ତା। ଏଭଳି ଏକ ଘଟଣା ପଲକ୍କଡ ଜିଲାର ଆୟାଲୁର ଗ୍ରାମରେ ଘଟିଛି। ଯୁବକ ଜଣକ ନିଜ ଘରଠାରୁ ମାତ୍ର ୫୦୦ ମିଟର ଦୂରରେ ପ୍ରେମିକାଙ୍କୁ ରଖିଥିଲେ।
ସାଜିଥା ନାମ୍ନୀ ଯୁବତୀ ନିଖୋଜ ହୋଇଯାଇଥିଲା। ବହୁ ଖୋଜାଖୋଜି ପରେ ମଧ୍ୟ ଟେର ପାଇ ନ ଥିଲା ପୋଲିସ। ତେବେ ପ୍ରେମିକ ରେହମନଙ୍କ ଘରେ ଗୋପନରେ ରହୁଥିଲେ ସାଜିଥା। ଉକ୍ତ ଘରେ ରେହମନଙ୍କ ମା’ ବାପା, ଭଉଣୀ ଓ ପୁତୁରା ରହୁଥିଲେ ମଧ୍ୟ କେହି ଜାଣି ପାରି ନ ଥିଲେ।
ସାଜିଥାଙ୍କୁ ଏକ ଛୋଟ ରୁମ୍ରେ ରଖିଥିଲେ ରେହମାନ। ସେ ରାତିରେ ଝରକା ଦେଇ ବାହାରକୁ ଆସି ନୀତ୍ୟକର୍ମ କରନ୍ତି। ପ୍ରାୟ ୧୦ ବର୍ଷ ଧରି ଏଭଳି ଚାଲିଥିଲା। କିନ୍ତୁ ଗତ ମାର୍ଚ୍ଚରେ ନିଖୋଜ ହୋଇଯାଇଥିଲେ ରେହମନ। ତାଙ୍କ ପରିବାର ପକ୍ଷରୁ ଏନେଇ ପୋଲିସରେଏତଲା ଦିଆଯାଇଥିଲା। ଜୁନ୍ ୭ରେ ରେହମନଙ୍କୁ ତାଙ୍କ ଭାଇ ଖୋଜି ପାଇବା ପରେ ପୋଲିସକୁ ଜଣାଇଥିଲେ। ପୋଲିସ ତାଙ୍କୁ ନେଇ ପଚରାଉଚୁରା କରିବା ପରେ ସେ ସାଜିଥାଙ୍କୁ ନେଇ ଏକ ଭଡ଼ାଘରେ ରହିଥିବା କହିଥିଲେ। ଏଥିସହ ସାମ୍ନାକୁ ଆସିଥିଲା ସାଜିଥାଙ୍କ ନିଖୋଜ ହେବା ପଛର ରହସ୍ୟ।