ଅସ୍ତରଙ୍ଗ,୧୦।୨(ଡି.ଏନ୍.ଏ.): ପୁରୀ ଜିଲା ଅସ୍ତରଙ୍ଗ ବ୍ଲକ ଆଳଙ୍ଗପୁର ପଞ୍ଚାୟତ କରଞ୍ଜପୁର ଗ୍ରାମର ସୁଦର୍ଶନ ପଣ୍ଡାଙ୍କ ୧୨ ବର୍ଷର ପୁଅ ଆୟୁଷ ହୃଦ୍ ଆଉ ଫୁସ୍ଫୁସ୍ ଜନିତ ରୋଗରେ ଆକ୍ରାନ୍ତ ହୋଇ ଜୀବନମରଣ ସହିତ ଲଢ଼େଇ କରୁଛନ୍ତି। ବେଙ୍ଗାଲୁରୁ, କଟକ ଓ ଭୁବନେଶ୍ୱରରେ ଅଭିଜ୍ଞ ଡାକ୍ତରଙ୍କ ପରାମର୍ଶ ଅନୁଯାୟୀ ୨ଟିଯାକ ଅଙ୍ଗ ପ୍ରତିରୋପଣ ପାଇଁ ପ୍ରାୟ ୨୦ ରୁ ୩୦ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି କହିବା ପରେ ସୁଦର୍ଶନଙ୍କ ମୁଣ୍ଡରେ ଚଡ଼କ ପଡ଼ିଛି। ସୁଦର୍ଶନଙ୍କ ଆର୍ଥିକ ରୋଜଗାର କହିଲେ ଆଖପାଖ ଗ୍ରାମରେ କିଛି ମନ୍ଦିରରେ ପୂଜକ ଭାବେ କାର୍ଯ୍ୟ କରି ପରିବାରର ଗୁଜୁରାଣ ମେଣ୍ଟାନ୍ତି। ଆର୍ଥିକ ସ୍ଥିତି ସ୍ବଚ୍ଛଳ ନ ଥିବାରୁ ପୁଅର ଚିକିତ୍ସା ପାଇଁ ମାଆବାପା ଚିନ୍ତାରେ ଥିବାବେଳେ କୌଣସି ସହୃଦୟ ବ୍ୟକ୍ତି କିମ୍ବା ସରକାରୀ ସହାୟତା ପାଇଁ ନିବେଦନ କରିଛନ୍ତି। ସୁଦର୍ଶନଙ୍କ ସ୍ତ୍ରୀ କୁହନ୍ତି, ଯଦି କେହି ବଦାନ୍ୟ ବ୍ୟକ୍ତି ମୋର ପୁଅକୁ ଉକ୍ତ ଦୁଇଟି ଅଙ୍ଗ ଦାନ କରନ୍ତି ମୁଁ ଆଉ ମୋ ସ୍ବାମୀ ନିଜ ଆଖି ଆଉ କିଡ୍ନୀ ବିକ୍ରି କରିଦେବୁ। ଯଦି ଏହା ସମ୍ଭବ ନ ହୁଏ କି କୌଣସି ସାହାଯ୍ୟ ନ ମିଳେ ତଥାପି ଆମେ ସ୍ବାମୀ ସ୍ତ୍ରୀ ପୁଅର ଜୀବନ ବଞ୍ଚାଇବା ପାଇଁ କିଡ୍ନୀ ଆଉ ଆଖି ବିକ୍ରି କରି ଚିକିତ୍ସା କରାଇବୁ ବୋଲି ନିଷ୍ପତ୍ତି ନେଇଛୁ ବୋଲି କହିଛନ୍ତି। ଜନ୍ମର ୫ ମାସରୁ ଆୟୁଷୁ ଏହି ରୋଗରେ ପୀଡ଼ିତ ଥିବା ସୁଦର୍ଶନ ଜାଣିବା ପରେ ବାରମ୍ବାର ବାହାର ମେଡିକାଲରେ ଦେଖାଇ ଲକ୍ଷାଧିକ ଟଙ୍କା ଖର୍ଚ୍ଚ କରିସାରିଥିବା କହିଛନ୍ତି। ଏବେ ପ୍ରତି ମାସରେ ଆୟୁଷର ଔଷଧ ଖାଇବା ପାଇଁ ଖର୍ଚ୍ଚ ହେଉଛି ୧ ହଜାର ଟଙ୍କା। ଏହି ଟଙ୍କା ଖର୍ଚ୍ଚ କରିବା ପାଇଁ ଏବେ ସମ୍ଭବ ହୋଇପାରୁନି। ଆର୍ଥିକ ଆଉ ମାନସିକ ଭାରସାମ୍ୟ ହରାଇ ବସିଲୁଣି ସ୍ବାମୀ ସ୍ତ୍ରୀ। ସୁଦର୍ଶନଙ୍କର ଦୁଇ ପୁଅ ଦୁଇ ଝିଅ ଓ ବିଧବା ମା ଏବେ ଘରେ ଅଛନ୍ତି। ତେଣୁ ପୁଅର ଚିକିତ୍ସା ପାଇଁ ରାଜ୍ୟ ସରକାର ଓ ବଦାନ୍ୟ ବ୍ୟକ୍ତିମାନେ ଆର୍ଥିକ ସାହାଯ୍ୟ ସହାୟତା ଯୋଗାଇଦେବାକୁ ସୁଦର୍ଶନ ଏବଂ ତାଙ୍କ ସ୍ତ୍ରୀ ତୃପ୍ତିରେଖା ଅନୁରୋଧ କରିଛନ୍ତି। କାନାରା ବ୍ୟାଙ୍କ ଆକାଉଣ୍ଟ ନଂ./ ୧୧୦୦୬୯୭୬୩୦୧୯, IFSC Code/ CNRB OOO୬୦୧୫,ଏହିନଂ ରେ ପଠାଇବାକୁ ସେ ନିବେଦନ କରିଛନ୍ତି l
