ବମ୍ବେ: ବଲିଉଡ୍ର ଏପରି ଅନେକ କଳାକାର ଅଛନ୍ତି, ଯେଉଁମାନଙ୍କ ବ୍ୟକ୍ତିଗତ ଜୀବନ ଖବର ଶିରୋନାମା ପାଲଟିଛି। ଏସବୁରୁ ସବୁଠୁ ବେଶି ଚର୍ଚ୍ଚିତ ହୋଇଥାଏ ସେମାନଙ୍କ ପ୍ରେମ ଜୀବନ। ସେଭଳି ଜଣେ ଅଭିନେତା ହେଲେ ପରେଶ ରାଓ୍ବଲ। ସ୍ବରୂପ ସମ୍ପତଙ୍କୁ ପ୍ରଥମ ଦେଖାରେ ହୃଦୟ ଦେଇ ବସିଥିଲେ ସେ। ଇତିମଧ୍ୟରେ ଉଭୟ ବିବାହ କରିବାର ୩୩ ବର୍ଷ ବିତିସାରିଛି। ହେଲେ ଆଜିବି ତାଙ୍କର ପ୍ରେମକାହାଣୀ ଶୁଣିଲେ ରୋଚକ ଲାଗେ।
ଗୋଟିଏ କଲେଜରେ ପାଠ ପଢ଼ୁଥିଲେ ପରେଶ-ସମ୍ପତ। ଉଭୟ ଥିଏଟର କଳାକାର ଥିଲେ। ପ୍ରଥମ ଦେଖାରେ ହିଁ ସମ୍ପତଙ୍କୁ ପସନ୍ଦ କରିଥିଲେ ପରେଶ। ସେଦିନ ସେ ଗୋଲାପି ରଙ୍ଗର ଶାଢ଼ୀ ପିନ୍ଧିଥାନ୍ତି। ପରେଶ ତାଙ୍କୁ ଦେଖି ଦିନେ ନା ଦିନେ ତାଙ୍କୁ ବିବାହ କରିବେ ବୋଲି ବନ୍ଧୁଙ୍କୁ କହିଦେଇଥିଲେ। ହେଲେ ଦୀର୍ଘ ଏକ ବର୍ଷ ପର୍ଯ୍ୟନ୍ତ ଚୁପ୍ ରହିଥିଲେ। ପରେ ଏପରି କିଛି ଘଟିଲା ଯାହା ଉଭୟଙ୍କୁ ନିକଟତର କରିଥିଲା। ଏକଦା କଲେଜର ଏକ କାର୍ଯ୍ୟକ୍ରମରେ ପରେଶଙ୍କୁ ଷ୍ଟେଜ୍ରେ ଅଭିନୟ କରୁଥିବା ଦେଖି ବିଭୋର ହୋଇଯାଇଥିଲେ ସମ୍ପତ। ପରେ ସେ ପରେଶଙ୍କୁ ବ୍ୟକ୍ତିଗତ ଭାବେ ପ୍ରଶଂସା କରିଥିଲେ। ସେବେଠାରୁ ସେମାନଙ୍କ ମଧ୍ୟରେ କଥାବାର୍ତ୍ତା ଆଗକୁ ବଢ଼ିଥିଲା।
୧୯୭୯ରେ ମିସ୍ ଇଣ୍ଡିଆ ପ୍ରତିଯୋଗିତାରେ ଭାଗ ନେଇଥିଲେ ସମ୍ପତ। ଏଥିରେ ସେ ବିଜେତା ହୋଇଥିଲେ ମଧ୍ୟ। ହେଲେ ଏହି ଘଟଣାକୁ ନେଇ ପରେଶ ଚିନ୍ତିତ ହୋଇଥିଲେ। କାଳେ ସମ୍ପତ ବଦଳିଯିବେ ସେ ସର୍ବଦା ତାହା ଭାବି ହେଉଥିଲେ। ମାତ୍ର ସେଭଳି କିଛି ହୋଇନଥିଲା। ଦୀର୍ଘ ଦଶ ବର୍ଷ ଧରି ଉଭୟ ଉଭୟଙ୍କୁ ଡେଟ୍ କରିବା ପରେ ବିବାହ କରିବାକୁ ନିଷ୍ପତ୍ତି ନେଇଥିଲେ। ୧୯୮୭ରେ ସମ୍ପତଙ୍କ ହାତ ଧରିଥିଲେ ପରେଶ। ବିବାହଟି ଅତ୍ୟନ୍ତ ଗୋପନୀୟ ଥିଲା।
୧୨୯ ବର୍ଷ ପରେ ସମ୍ପତଙ୍କ ପରିବାରର କେହି ବିବାହ କରୁଥିଲେ। ଏହି ବିବାହକୁ ସ୍ବତନ୍ତ୍ର କରିବାକୁ ଯାଇ କେବଳ ପରିବାର ଏବଂ ନିକଟ ସମ୍ପର୍କୀୟଙ୍କ ଗହଣରେ ଏକ ଗଛମୂଳରେ ଉଭୟ ବିବାହ କରିନେଇଥିଲେ। ଏବେ ଉଭୟଙ୍କ ଦୁଇଟି ପୁଅ ରହିଛି।
