ନୂଆଦିଲ୍ଲୀ,୧୮।୧୧ (ପି.ଟି.): ହକି ଇଣ୍ଡିଆର ଷ୍ଟେଟ୍ ମେମ୍ବର ୟୁନିଟ୍ଗୁଡିକ ମିଳିତ ଭାବେ ‘ମାଷ୍ଟର୍ସ କମିଟି’ ଗଠନ କରିଛନ୍ତି। ଦେଶରେ ମାଷ୍ଟର୍ସ ହକିର ପ୍ରଚାର ଓ ପ୍ରସାର ପାଇଁ ଗଠିତ ହୋଇଥିବା ଏହି କମିଟିରେ ପୂର୍ବତନ ଅଧିନାୟକ ପରଗତ ସିଂ, ମୀର ରଞ୍ଜନ ନେଗୀ ଓ ଗୁରବକ୍ସଙ୍କୁ ସାମିଲ କରାଯାଇଛି ହକି ଇଣ୍ଡିଆ ତରଫରୁ କୁହାଯାଇଛି। ହକିରେ ରୁଚି ରଖୁଥିବା ଉଭୟ ସବୁ ବୟସ ବର୍ଗର ପୁରୁଷ ଓ ମହିଳା ଖେଳାଳିମାନଙ୍କୁ ସୁଯୋଗ ଦେବା ପାଇଁ ଓ ହକି ପ୍ରତି ସେମାନଙ୍କର ଅଙ୍ଗୀକାରବଦ୍ଧତାକୁ ବଜାୟ ରଖିବା ପାଇଁ ଏଭଳି ଉପକ୍ରମର ଆରମ୍ଭ କରାଯାଇଛି ହକି ଇଣ୍ଡିଆ କହିଛି।
ଗତ ମାର୍ଚ୍ଚରେ ହକି ଇଣ୍ଡିଆ ଅନ୍ୟ ୩୮ଟି ଜାତୀୟ ଆସୋସିଏଶନଗୁଡିକ ସହ ସଦସ୍ୟ ଭାବେ ବିଶ୍ୱ ମାଷ୍ଟର୍ସ ହକି (ଡବ୍ଲ୍ୟଏମ୍ଏଚ୍)ରେ ଯୋଗ ଦେଇଥିଲା। ଅନ୍ତର୍ଜାତୀୟ ହକି ଫେଡେରେଶନ (ଏଫ୍ଆଇଏଚ୍) ଏକମାତ୍ର ମାଷ୍ଟର ୟୁନିଟ୍ ଡବ୍ଲ୍ୟୁଏମ୍ଏଚ୍କୁ ମାନ୍ୟତା ପ୍ରଦାନ କରିଛି। ଡବ୍ଲ୍ୟୁଏମ୍ଏଚ୍ ମଧ୍ୟ ସାରା ବିଶ୍ୱରେ ଅନ୍ତର୍ଜାତୀୟ ମାଷ୍ଟର୍ସ ହକି ଆୟୋଜନ କରିବାର ଅଧିକାର ପାଇଛି।
ତେବେ ରାଜ୍ୟରେ ମାଷ୍ଟର୍ସ ହକିର ବିକାଶ ପାଇଁ ହକି ଇଣ୍ଡିଆ ସବୁ ଷ୍ଟେଟ୍ ୟୁନିଟ୍ଗୁଡିକୁ ଏକ କାର୍ଯ୍ୟକାରୀ କମିଟି ଗଠନ କରିବାକୁ ପରାମର୍ଶ ଦେଇଥିଲା। ଏଥିରେ ପୂର୍ବତନ ଜାତୀୟ ଓ ଅନ୍ତର୍ଜାତୀୟସ୍ତରର ଖେଳାଳିଙ୍କୁ ସାମିଲ କରିବାକୁ କୁହାଯାଇଥିଲା। ରାଜ୍ୟସ୍ତରରେ ଏହି କମିଟିଗୁଡିକ ମାଷ୍ଟର୍ସ ହକିର ଉନ୍ନତି ପାଇଁ କାର୍ଯ୍ୟ କରିବ। ସେହିପରି ଦେଶରେ ଜାତୀୟସ୍ତରରେ ହକି ଇଣ୍ଡିଆ ମାଷ୍ଟର୍ସ କମିଟି ମାଷ୍ଟର୍ସ ମ୍ୟାଚ୍ ଓ ଟୁର୍ନାମେଣ୍ଟଗୁଡିକୁ ତଦାରଖ କରିବ। ହରବିନ୍ଦର ସିଂ ଏହି କମିଟିର ଅଧ୍ୟକ୍ଷ ରହିଛନ୍ତି। ସେହିପରି ଆର.ପି. ସିଂ ଏହାର ସଂଯୋଜକ ରହିଛନ୍ତି। ପୂର୍ବତନ ଭାରତୀୟ ଖେଳାଳି ବି.ପି. ଗୋବିନ୍ଦା, ଜଗବୀର ସିଂ, ଏ.ବି. ସୁବାୟା, ସୁରିନ୍ଦର କୌର ଓ ଏମ୍. ରେଣୁକା ଲକ୍ଷ୍ମୀ ଏହାର ସଦସ୍ୟ ରହିଛନ୍ତି। ମାଷ୍ଟର୍ସ କମିଟି ଗଠନ କରିବାକୁ ଷ୍ଟେଟ୍ ୟୁନିଟ୍ଗୁଡିକ ମଧ୍ୟ ଏ ନେଇ ବେଶ୍ ଉତ୍ସାହ ପ୍ରକଟ କରିଛନ୍ତି ଓ ଏହା ନିଶ୍ଚିତ ଭାବେ ଆନନ୍ଦଦାୟକ ବୋଲି ହକି ଇଣ୍ଡିଆ ସାଧରଣ ସମ୍ପାଦକ ରାଜିନ୍ଦର ସିଂ କହିଛନ୍ତି।
