ଭୁବନେଶ୍ୱର,୫।୮(ବ୍ୟୁରୋ): ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ(ବିଡିଏ) ଦ୍ୱାରା ସ୍ଥାନୀୟ କଳିଙ୍ଗନଗର କେ-୮ ଅଞ୍ଚଳରେ ନିର୍ମାଣ ହେଉଥିବା ପାର୍କକୁ ପୂର୍ବତନ ରାଷ୍ଟ୍ରପତି ଏପିଜେ ଅବଦୁଲ୍ କଲାମଙ୍କ ନାମରେ ନାମିତ କରାଯିବ। ଏନେଇ ବିଡିଏ ପକ୍ଷରୁ ଟୁଇଟ୍ କରି ଜଣାଯାଇଛି। କଳିଙ୍ଗ ନଗରଠାରେ ୧୨ ଏକର ପରିମିତ ଅଞ୍ଚଳରେ ତିଆରି ହେଉଥିବା ପାର୍କର ନିର୍ମାଣ କାର୍ଯ୍ୟ ଆସନ୍ତା ମାସକ ମଧ୍ୟରେ ଶେଷ ହେବ ବୋଲି ଆଶା ରଖାଯାଇଛି। ଭାରତର ମିଶାଇଲ ମ୍ୟାନ ବୋଲି କୁହାଯାଉଥିବା କଲାମଙ୍କ ଜୟନ୍ତୀ ଅବସରରେ ଶ୍ରଦ୍ଧାଞ୍ଜଳି ସ୍ବରୂପ ତାଙ୍କ ନାମରେ ପାର୍କର ନାମକରଣ କରାଯିବାକୁ ବିଡିଏ ପକ୍ଷରୁ ନିଷ୍ପତ୍ତି ନିଆଯାଇଛି। ଏହି ପାର୍କ କେବଳ ସହରର ସାୈନ୍ଦର୍ଯ୍ୟ ବୃଦ୍ଧି କରିବାରେ ସହାୟକ ହେବ ତାହା ନୁହେଁ ବରଂ କଲାମଙ୍କ ଭଳି ଜଣେ ବିଶିଷ୍ଟ ବ୍ୟକ୍ତିତ୍ୱଙ୍କ ବିଷୟରେ ଯୁବଗୋଷ୍ଠୀ ଅଧିକରୁ ଅଧିକ ଜାଣିବାକୁ ଉତ୍ସାହିତ ହେବେ। ଭୁବନେଶ୍ୱରରେ ଏହା ହେଉଛି ପ୍ରଥମ ପାର୍କ, ଯାହାକି କଲାମଙ୍କ ନାମରେ ନାମିତ ହେବାକୁ ଯାଉଛି ବୋଲି ବିଡିଏର ଜଣେ ଅଧିକାରୀ ପ୍ରକାଶ କରିଛନ୍ତି।
ମିଳିଥିବା ସୂଚନା ଅନୁସାରେ ଗତ ଜୁନ୍ରେ ବିଡିଏ ପକ୍ଷରୁ ସହରରେ ୩ଟି ପାର୍କ ନିର୍ମାଣ ପାଇଁ ଘୋଷଣା କରାଯାଇଥିଲା। ସେଥିମଧ୍ୟରେ ଗୋଟିଏ କଳିଙ୍ଗନଗରରେ ନିର୍ମାଣ ହେଉଥିବାବେଳେ ଅନ୍ୟ ୨ଟି ଡୁମୁଡୁମା ହାଉସିଂ ବୋର୍ଡ କଲୋନୀ ଓ ଲକ୍ଷ୍ମୀସାଗର ଅଞ୍ଚଳରେ ନିର୍ମାଣ ହେଉଛି। କଳିଙ୍ଗନଗର ପାର୍କ ପାଇଁ ୧୫.୪୨ ଲକ୍ଷ ଟଙ୍କା ବ୍ୟୟ ଅଟକଳ ହୋଇଥିବାବେଳେ ଡୁମୁଡୁମା ଏବଂ ଲକ୍ଷ୍ମୀସାଗର ପାର୍କ ପାଇଁ ଯଥାକ୍ରମେ ୨୯.୨୭ ଏବଂ ୪୨.୭୧ଲକ୍ଷ ଟଙ୍କା ଅଟକଳ କରାଯାଇଛି। ଉକ୍ତ ପାର୍କଗୁଡ଼ିକରେ ଶାରୀରିକ ଅଭ୍ୟାସ ପାଇଁ ଅତ୍ୟାଧୁନିକ ବ୍ୟବସ୍ଥା ଉପଲବ୍ଧ ରହିବ। ଏପରି କି ଖୋଲା ଜିମ୍ନାସିୟମ, ଜଗିଂ ଟ୍ରାକ୍ ଏବଂ ବର୍ଷାଜଳ ଅମଳ ବ୍ୟବସ୍ଥା ଆଦି ରହିବ।
ବର୍ତ୍ତମାନ ରାଜଧାନୀରେ ୧୨୦ରୁ ଊର୍ଦ୍ଧ୍ୱ ଛୋଟବଡ଼ ପାର୍କ ରହିଛି। ସେଥିମଧ୍ୟରୁ ୫୭ଟି ବିଡିଏ ଏବଂ ୬୩ଟି ବିଏମ୍ସି ଦ୍ୱାରା ପରିଚାଳିତ ହେଉଛି। ବିଜୁ ପଟ୍ଟନାୟକ ପାର୍କ, ଇନ୍ଦିରା ଗାନ୍ଧୀ ଏବଂ ମଧୁସୂଦନ ଦାସ ଭଳି ୧୦ଟି ବଡ଼ ପାର୍କ ବିଡିଏ ଦ୍ୱାରା ସିଧାସଳଖ ପରିଚାଳିତ ହେଉଥିବାବେଳେ ବିଏମ୍ସି ଛୋଟ ଛୋଟ ପାର୍କର ପରିଚାଳନା କରୁଛି।