ଆସିକା,୧୬ା୪(ଡି.ଏନ.ଏ.): ଆସିକା ଏନ୍ଏସିର ଆୟ ବୃଦ୍ଧି ଓ ରକ୍ଷଣାବେକ୍ଷଣ ପାଇଁ ସହର ମଧ୍ୟରେ ଥିବା କରୋନେଶନ ପାର୍କ ଏବଂ ବାଣୀବିହାର ଓ ତାଲୁକା ଛକଠାରେ ଥିବା କଲ୍ୟାଣ ମଣ୍ଡପକୁ ଘରୋଇକରଣ କରିବାକୁ ନିଷ୍ପତ୍ତି ନିଆଯାଇଛି ା ଏହାଛଡା ଷ୍ଟେଟ ବ୍ୟାଙ୍କ ପକ୍ଷରୁ ଏନ୍ଏସି ଅଫିସ ନିକଟରେ ଥିବା ମାର୍କେଟ କମ୍ପ୍ଲେକ୍ସରେ ଅସହାୟ, ବୃଦ୍ଧାବୃଦ୍ଧ, ଗର୍ଭବତୀ ଓ ସ୍କୁଲ ପିଲାମାନଙ୍କୁ ୨୪x୭ ଘଣ୍ଟା ସେବା ଯୋଗାଇବା ପାଇଁ ଏକ ଗ୍ରାହକ ସେବା କେନ୍ଦ୍ର ଖୋଲିବାକୁ ଶନିବାର ଅନୁଷ୍ଠିତ ଏନ୍ଏସି କାଉନସିଲ ବୈଠକରେ ଆଲୋଚନା କରାଯାଇଛି। ଏନ୍ଏସି ଅଧ୍ୟକ୍ଷା ବିନେତା ସ୍ବାଇଁଙ୍କ ଅଧ୍ୟକ୍ଷତାରେ ଏନ୍ଏସି ସଭା ଗୃହରେ ଏନ୍ଏସି କାଉନସିଲ ବୈଠକ ଅନୁଷ୍ଠିତ ହୋଇଥିଲା। ବିଧାୟିକା ମଞ୍ଜୁଳା ସ୍ବାଇଁ, ଏମ୍ପି ପ୍ରତିନିଧି ସତ୍ୟନାରାୟଣ ସ୍ବାଇଁ, ତହସିଲଦାର ସଞ୍ଜୟ କୁମାର ସାମନ୍ତରା, ଏନ୍ଏସି ଉପାଧ୍ୟକ୍ଷା ଜୟନ୍ତୀ ବିଷୋୟୀ ଓ ନିର୍ବାହୀ ଅଧିକାରୀ ଲୋକନାଥ ବେଜ ବୈଠକରେ ମଞ୍ଚାସୀନ ଥିଲେ। ଏହି ଅବସରରେ ଏନ୍ଏସିର ଆୟବ୍ୟୟ ବିବରଣୀ ଉପସ୍ଥାପନ କରାଯିବା ସହ ସ୍ବାସ୍ଥ୍ୟ, ଶିକ୍ଷା, ପାନୀୟଜଳ, ମହିଳା ଓ ଶିଶୁ ବିକାଶ କାର୍ଯ୍ୟକ୍ରମ, ଖାଦ୍ୟ ସୁରକ୍ଷା, ସାମାଜିକ ସୁରକ୍ଷା, ପରିମଳ ବ୍ୟବସ୍ଥା, ପ୍ରଧାନମନ୍ତ୍ରୀ ଆବାସ ଯୋଜନା ସାଙ୍ଗକୁ ବିଭିନ୍ନ ୱାର୍ଡର କାଉନସିଲରଙ୍କ ଦ୍ୱାରା ଦିଆଯାଇଥିବା ପ୍ରକଳ୍ପ ସମ୍ପର୍କରେ ଆଲୋଚନା କରାଯାଇଥିଲା ା ସହରର ବିଭିନ୍ନ ୱାର୍ଡର ଖୋଲାଜାଗାଗୁଡିକର ସୌନ୍ଦର୍ଯ୍ୟକରଣ, ମୁଖ୍ୟ ରାସ୍ତାକୁ ସଂଯୋଗ କରୁଥିବା ଶାଖା ରାସ୍ତା, ପୋଖରୀ ହୁଡାକୁ ଫେବର ରାସ୍ତା ନିର୍ମାଣ, ସହରର ପ୍ରବେଶ ଓ ପ୍ରସ୍ଥାନ ଫାଟକରେ ଆଲୋକୀକରଣ ଓ ସୌନ୍ଦର୍ଯ୍ୟକରଣ, ବିଜୁ ପଟ୍ଟନାୟକ ଛକ ନିକଟରେ ଥିବା ଖାଲି ସ୍ଥାନରେ ଆଦର୍ଶ ଭେଣ୍ଡିଂ ଜୋନ ଏବଂ ଚାରିଚକିଆ ଯାନ ପାଇଁ ପାର୍କିଂ ଜୋନ, ୨୦ ଗ୍ରାହକ ଭୋଜନ କଲାଭଳି ଫୁଡ କୋର୍ଟ ନିର୍ମାଣ, ପରିଷଦର ଆୟ ବୃଦ୍ଧି ପାଇଁ ୨ଟି ପ୍ରମୁଖ ଜାଗାରେ ବିଜ୍ଞାପନ ଡିଜିଟାଲ ବୋର୍ଡ ସ୍ଥାପନ ଏବଂ ୫-ଟି ଅଧୀନରେ ଆସିଥିବା ୩ ସ୍କୁଲ ପରିସରରେ ଛାତ୍ରୀଛାତ୍ରଙ୍କ ଲାଗି ଖେଳ କସରତ ଓ ଜିମ ବ୍ୟବସ୍ଥା, ସହରର ମାଛ ମାଂସ ସାମଗ୍ରୀକୁ ଏକାଠି ବିକ୍ରୟ ପାଇଁ ଏକ ସ୍ବତନ୍ତ୍ର ଆମିଷ ବଜାର ପ୍ରତିଷ୍ଠା ଲାଗି ନିଷ୍ପତ୍ତି ନିଆଯାଇଛି।