ନୂଆଦିଲ୍ଲୀ,୨୪।୫: ଦେଶର ନୂଆ ସଂସଦ ଭବନର କାର୍ଯ୍ୟ ଶେଷ ହୋଇଛି ଏବେ ବର୍ତ୍ତମାନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହାକୁ ମେ ୨୮ରେ ଉଦଘାଟନ କରିବାକୁ ଯାଉଛନ୍ତି। ଏହାପୂର୍ବରୁ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଏକ ସାମ୍ବାଦିକ ସମ୍ମିଳନୀ କରି ସମସ୍ତ ପ୍ରକାର ତଥ୍ୟ ଉପସ୍ଥାପନ କରିଥିଲେ। ରେକର୍ଡ ସମୟରେ ଏହି ସଂସଦ ପ୍ରସ୍ତୁତ କରାଯାଇଛି ବୋଲି ସେ କହିଛନ୍ତି। ଏହି ସମୟରେ ଅମିତ ଶାହା ନୂତନ ସଂସଦ ଭବନରେ ସ୍ଥାପନ ହେବାକୁ ଥିବା ରାଜଦଣ୍ଡ ବିଷୟରେ ମଧ୍ୟ ଉଲ୍ଲେଖ କରିଛନ୍ତି। ଏହା ତାମିଲରେ ସେଂଗୋଲ ନାମରେ ଜଣାଶୁଣା । ଶାହା ମଧ୍ୟ ସେଂଗୋଲ ବିଷୟରେ ସୂଚନା ଦେଇଥିଲେ ଏବଂ ଭାରତୀୟ ଇତିହାସ ଏବଂ ଗଣତନ୍ତ୍ରରେ ଏହାର ମହତ୍ତ୍ୱ କ’ଣ ବୋଲି କହିଥିଲେ।
କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା କହିଛନ୍ତି ଯେ ବ୍ରିଟିଶ ଶାସନରୁ ଭାରତକୁ ହସ୍ତାନ୍ତର କରାଯାଇଥିବା ଐତିହାସିକ ‘ସେଂଗୋଲ’ ନୂତନ ସଂସଦ ଗୃହରେ ସ୍ଥାପନ କରାଯିବ। ‘ସେଂଗୋଲ’ ବର୍ତ୍ତମାନ ଆହ୍ଲାବାଦର ଏକ ସଂଗ୍ରହାଳୟରେ ଅଛି। ଦେଶର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁ ‘ସେଂଗୋଲ’କୁ ବ୍ରିଟିଶମାନଙ୍କଠାରୁ ଶକ୍ତି ହସ୍ତାନ୍ତରର ପ୍ରତୀକ ଭାବରେ ଗ୍ରହଣ କରିଥିଲେ। ଅମିତ ଶାହା ଆହୁରି ମଧ୍ୟ କହିଛନ୍ତି, ’ସେଂଗୋଲ’ ପ୍ରତିଷ୍ଠା କରିବାର ଉଦ୍ଦେଶ୍ୟ ସେତେବେଳେ ସ୍ପଷ୍ଟ ଥିଲା ଏବଂ ଏବେବି ସ୍ପଷ୍ଟ ରହିଛି। ଶକ୍ତି ହସ୍ତାନ୍ତର କେବଳ ଏକ ହାତମିଳାଇବା କିମ୍ବା ଏକ ଦଲିଲର ଦସ୍ତଖତ ନୁହେଁ ଏବଂ ଆଧୁନିକ ଆବଶ୍ୟକତାକୁ ଦୃଷ୍ଟିରେ ରଖି ସ୍ଥାନୀୟ ପରମ୍ପରା ସହିତ ଯୋଡି ହୋଇ ରହିବା ଆବଶ୍ୟକ।