ନୂଆଦିଲ୍ଲୀ,୧୯।୧୨: ସମ୍ବିଧାନର ସୃଷ୍ଟିକର୍ତ୍ତା ଡ. ଆମ୍ବେଦକରଙ୍କ ଉପରେ ଗୃହମନ୍ତ୍ରୀ ଅମିତ ଶାହାଙ୍କ ବିବୃତ୍ତି ପରେ ରାଜନୀତି ଉଠୁଛି ପଡୁଛି। ଏହାକୁ ନେଇ ଆଜି ସଂସଦ ପରିସରରେ ଖଣ୍ଡଯୁଦ୍ଧ ଦେଖାଦେଇଛି। ଗୁରୁବାର ସଂସଦ ପ୍ରକ୍ରିୟା ଆରମ୍ଭ ହେବା ପୂର୍ବରୁ ସଂସଦ ପରିସରରେ ଭାଜପା ଏବଂ ବିରୋଧୀ ଏମପିଙ୍କ ମଧ୍ୟରେ ଖଣ୍ଡଯୁଦ୍ଧ ହୋଇଛି। ଯେଉଁଥିରେ ଦୁଇ ଶାସକ ଦଳର ଏମପି ପ୍ରତାପ ଷଡଙ୍ଗୀ ଏବଂ ମୁକେଶ ରାଜପୁତ ଆହତ ହୋଇଛନ୍ତି। ଉଭୟଙ୍କୁ ଆରଏମଏଲ ହସ୍ପିଟାଲରେ ଭର୍ତ୍ତି କରାଯାଇଛି। ଦୁଇ ଏମପିଙ୍କ ସମ୍ପର୍କରେ ପ୍ରଧାନମନ୍ତ୍ରୀ ମୋଦିଙ୍କୁ ସୂଚନା ଦିଆଯାଇଛି।
ଏନେଇ ପ୍ରତାପ ଷଡଙ୍ଗୀ କହିଛନ୍ତି, ରାହୁଲ ଗାନ୍ଧୀ ଜଣେ ଏମପିଙ୍କୁ ଠେଲିଦେଲେ। ଯିଏ ମୋ ଉପରେ ପଡ଼ିଗଲେ। ଏବଂ ମୁଁ ତଳେ ପଡ଼ିଗଲି। ସେତେବେଳେ ମୁଁ ସିଡ଼ି ନିକଟରେ ଛିଡା ହୋଇଥିଲି। ଅନ୍ୟପଟେ କଂଗ୍ରେସ ଏମପି ରାହୁଲ ଗାନ୍ଧୀ କହିଛନ୍ତି ଯେ, ମୁଁ ଭିତରକୁ ଯାଉଥିବାବେଳେ ଭାଜପା ଏମପିମାନେ ମୋତେ ଧମକ ଦେଉଥିଲେ। ସେ ମୋତେ ଠେଲିଦେଲେ।
#WATCH | BJP MPs injured | RML MS Dr Ajay Shukla says, “We are evaluating their condition and trying to stabilise them. Both of them are in the ICU. Mukesh Rajput fell unconscious after sustaining a head injury, he is experiencing anxiety and dizziness. The BP of both of them had… pic.twitter.com/bm4QsMwDtW
— ANI (@ANI) December 19, 2024
ତେବେ ଭାଜପାର ଦୁଇ ଏମପି ଭର୍ତ୍ତି ହୋଇଥିବା ଆରଏମଏଲ ହସ୍ପିଟାଲର ଡ ଅଜୟ ଶୁକଲା ଗଣମାଧ୍ୟମରେ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ଆମେ ଉଭୟ ଏମପି (ପ୍ରତାପ ଷଡଙ୍ଗୀ ଏବଂ ମୁକେଶ ରାଜପୁତ) କୁ ସ୍ଥିର କରିବାକୁ ଚେଷ୍ଟା କରୁଛୁ। ସେମାନଙ୍କର ବିଭିନ୍ନ ଟେଷ୍ଟ କରାଯାଉଛି। ଉଭୟଙ୍କ ମୁଣ୍ଡରେ ଗଭୀର ଆଘାତ ଲାଗିଥିବାରୁ ସେମାନଙ୍କୁ ଆଇସିୟୁରେ ଭର୍ତ୍ତି କରାଯାଇଛି।
ସେ ଆହୁରି ମଧ୍ୟ କହିଛନ୍ତି, ପ୍ରତାପଙ୍କ ମୁଣ୍ଡରେ ପ୍ରବଳ ରକ୍ତସ୍ରାବ ହେଉଛି। ତାଙ୍କ ମୁଣ୍ଡରେ ଗଭୀର ଆଘାତ ଲାଗିଛି। ସେଥିପାଇଁ ଆଘାତ ସ୍ଥାନରେ ଷ୍ଟିଜ କରିବାକୁ ପଡିଛି। ମୁକେଶ ରାଜପୁତ ଚେତାଶୂନ୍ୟ ହୋଇଯାଇଛନ୍ତି। ତାଙ୍କର ରକ୍ତଚାପ ବଢି ଯାଇଛି।
