ନୂଆଦିଲ୍ଲୀ,୧୬ା୭: ଆଗକୁ ପାର୍ଲାମେଣ୍ଟ ପରିସରରେ ବିକ୍ଷୋଭ, ଧାରଣା, ଅନଶନ କିମ୍ବା ଧର୍ମୀୟ ଉତ୍ସବ କରାଯାଇପାରିବ ନାହିଁ। ଏନେଇ ରାଜ୍ୟ ସଭା ସେକ୍ରେଟାରିଏଟ୍ ପକ୍ଷରୁ ଗୁରୁବାର ଏକ ସର୍କ୍ୟୁଲାର ଜାରି କରାଯାଇଛି। ଉଭୟ ସଦନରେ ‘ଅସଂସଦୀୟ ଶବ୍ଦ’ ବ୍ୟବହାର ଉପରେ କଟକଣାର ଦିନକ ପରେ ପ୍ରକାଶ ପାଇଥିବା ଏହି ରିପୋର୍ଟକୁ ନେଇ କେନ୍ଦ୍ର ସରକାରଙ୍କୁ ବିରୋଧୀ ଦଳଗୁଡ଼ିକ ପୁଣି ଟାର୍ଗେଟ କରିଛନ୍ତି।
ଜୁଲାଇ ୧୮ରେ ପାର୍ଲାମେଣ୍ଟର ମୌସୁମୀ ଅଧିବେଶନ ଆରମ୍ଭ ହେବ। ଏହା ପୂର୍ବରୁ ରାଜ୍ୟ ସଭା ସେକ୍ରେଟାରି ଜେନେରାଲ ପି.ସି. ମୋଦି ନିର୍ଦ୍ଦେଶାବଳୀ ସମ୍ବଳିତ ଏକ ବୁକ୍ଲେଟ୍ ଜାରି କରି ବିକ୍ଷୋଭ ନ କରିବା ନିମନ୍ତେ ଏମ୍ପିମାନଙ୍କ ସହଯୋଗ ଲୋଡ଼ିଛନ୍ତି। ଏନେଇ କଂଗ୍ରେସ ସାଧାରଣ ସମ୍ପାଦକ ତଥା ରାଜ୍ୟ ସଭାରେ ଦଳର ମୁଖ୍ୟ ସଚେତକ ଜୟରାମ ରମେଶ ଟୁଇଟ୍ କରି କେନ୍ଦ୍ରକୁ ଟାର୍ଗେଟ କରିଛନ୍ତି। ଜୟରାମ ଏଥିରେ ‘ବିଶ୍ୱଗୁରୁର ସଦ୍ୟ ଟାର୍ଗେଟ: ଧାରଣା ମନା’ ଉଲ୍ଲେଖ କରି ସର୍କ୍ୟୁଲାରର ଏକ କପି ଶେୟାର କରିଛନ୍ତି। ସେହିପରି ତୃଣମୂଳ କଂଗ୍ରେସ (ଟିଏମ୍ସି) ନେତା ଡେରେକ୍ ଓ’ବ୍ରାଏନ୍ ମଧ୍ୟ ଏହି ପ୍ରସଙ୍ଗରେ କେନ୍ଦ୍ରକୁ ଘେରିଛନ୍ତି। ବିକ୍ଷୋଭ, ଧାରଣା, ଅନଶନ ଆଦି ହେଉଛି ବିରୋଧ ଜଣାଇବା ପାଇଁ ବୈଧ ସଂସଦୀୟ କୌଶଳ। ଆମକୁ କେହି ଅଟକାଇପାରିବେ ନାହିଁ। ଜାତୀୟତାବାଦୀ କଂଗ୍ରେସ ପାର୍ଟି (ଏନ୍ସିପି) ମୁଖ୍ୟ ଶରଦ ପାଓ୍ବାର ଏହାର ପ୍ରତିବାଦରେ ଶନିବାର ଦିଲ୍ଲୀରେ ଏକାଠି ହୋଇ ଆଲୋଚନା କରିବାକୁ ଆହ୍ବାନ ଦେଇଛନ୍ତି। ଅତୀତରେ ପାର୍ଲାମେଣ୍ଟ ପରିସର ଓ ମହାମତ୍ା ଗାନ୍ଧୀଙ୍କ ପ୍ରତିମୂର୍ତ୍ତି ସାମ୍ନାରେ ବିରୋଧୀ ସଦସ୍ୟମାନେ ଧାରଣା ଦେଇ ବିକ୍ଷୋଭ ପ୍ରଦର୍ଶନ କରିଆସିଛନ୍ତି। ତେଣୁ ବିରୋଧୀ ଦଳଗୁଡ଼ିକ ଏହା ଉପରେ ଆପତ୍ତି ଉଠାଇଛନ୍ତି। ପ୍ରକାଶ ଯେ, ଲୋକ ସଭା ସେକ୍ରେଟାରିଏଟ୍ ପକ୍ଷରୁ ବୁଧବାର କେତେକ ଶବ୍ଦକୁ ଅସଂସଦୀୟ ଦର୍ଶାଇ ଏକ ସର୍କ୍ୟୁଲାର ଜାରି କରାଯାଇଥିଲା। ଏହାର ଦିନକ ପରେ ରାଜ୍ୟ ସଭା ସେକ୍ରେଟାରିଏଟ୍ ପାର୍ଲାମେଣ୍ଟ ପରିସରରେ ବିକ୍ଷୋଭ ନ କରିବାକୁ କହିବା ପରେ ବିରୋଧୀ ଦଳଗୁଡ଼ିକ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ଭାଜପା ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ (ଏନ୍ଡିଏ) ସରକାର ଓ ଏହାର ମୁଖ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶକୁ କିପରି ଧ୍ୱଂସ କରିଚାଲିଛନ୍ତି, ବିତର୍କ ବେଳେ ତାହା ବର୍ଣ୍ଣନା କରିବାକୁ ଯାଇ ବିରୋଧୀ ସଦସ୍ୟ ବ୍ୟବହାର କରୁଥିବା ଶବ୍ଦଗୁଡ଼ିକ ଉପରେ କଟକଣା ଜାରି କରାଯାଇଥିବା ବିରୋଧୀ କହିଛନ୍ତି। ବିବାଦ ପରେ ଲୋକ ସଭା ବାଚସ୍ପତି ଓମ୍ ବିର୍ଲା ଶୁକ୍ରବାର ଏକ ଖବରଦାତା ସମ୍ମିଳନୀରେ କହିଛନ୍ତି, ପାର୍ଲାମେଣ୍ଟରେ କୌଣସି ଶବ୍ଦର ବ୍ୟବହାର ଉପରେ କଟକଣା ଜାରି କରାଯାଇ ନାହିଁ। କିନ୍ତୁ ସଦସ୍ୟମାନେ ଗୃହର ମର୍ଯ୍ୟାଦା ରକ୍ଷା କରିବା ଉଚିତ। ଅସଂସଦୀୟ ଶବ୍ଦାବଳୀ ଜାରି କରିବା ଏକ ନିୟମିତ ପ୍ରକ୍ରିୟା, ଯାହାକି ୨୦୦୯ରୁ ଚାଲିଆସିଛି। ଏହାକୁ ନେଇ କୌଣସି ପ୍ରକାର ରାଜନୀତି ହେବା ଅନୁଚିତ।