ସଂସଦକୁ ବିଦେଶୀ ଶାସକ ନିର୍ମାଣ କରିଥିଲେ, କିନ୍ତୁ ଝାଳ, ଅର୍ଥ, ପରିଶ୍ରମ ସବୁ ଭାରତୀୟଙ୍କର ଲାଗିଥିଲା: ପ୍ରଧାନମନ୍ତ୍ରୀ

ନୂଆଦିଲ୍ଲୀ,୧୮।୯: ସଂସଦର ସ୍ବତନ୍ତ୍ର ଅଧିବେଶନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲୋକ ସଭାରେ କହିଛନ୍ତି ଯେ, ନୂତନ ପରିସରକୁ ଯିବା ପୂର୍ବରୁ ଏହି ସଂସଦ ଗୃହ ସହିତ ଜଡିତ ପ୍ରେରଣାଦାୟକ ମୂହୁର୍ତ୍ତଗୁଡ଼ିକୁ ମନେ ପକାଇବାର ସମୟ ଆସିଛି। ଦେଶର ୭୫ ବର୍ଷର ସଂସଦୀୟ ଯାତ୍ରା ବିଷୟରେ ମନେ ପକାଇବା ଏବଂ ନୂତନ ଗୃହକୁ ଯିବା ପୂର୍ବରୁ ଇତିହାସର ସେହି ପ୍ରେରଣାଦାୟକ ମୂହୁର୍ତ୍ତଗୁଡ଼ିକୁ ମନେ ପକାଇ ଆଗକୁ ବଢିବା ପାଇଁ ଏହା ଏକ ସୁଯୋଗ। ପ୍ରଧାନମନ୍ତ୍ରୀ କହିଛନ୍ତି ଯେ ଜି -୨୦ ଶିଖର ସମ୍ମିଳନୀକୁ ସଫଳତାର ସହ ଆୟୋଜନ କରିଥିବାରୁ ଭାରତର ଗର୍ବ ସାରା ବିଶ୍ୱରେ ଚର୍ଚ୍ଚା ହେଉଛି। ଏହାପୂର୍ବରୁ ଲୋକ ସଭା ବାଚସ୍ପତି ଓମ ବିର୍ଲା ଜି -୨୦ ଶିଖର ସମ୍ମିଳନୀର ସଫଳତା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦୂରଦୃଷ୍ଟି ସମ୍ପନ୍ନ ନେତୃତ୍ୱକୁ ପ୍ରଶଂସା କରିଛନ୍ତି।

ପ୍ରଧାନମନ୍ତ୍ରୀ ତାଙ୍କ ଅଭିଭାଷଣରେ କହିଛନ୍ତି, ଏହା ସତ୍ୟ ଯେ ଏହି ଭବନ ନିର୍ମାଣ ନିଷ୍ପତ୍ତି ବିଦେଶୀ ଶାସକଙ୍କର ଥିଲା, କିନ୍ତୁ ଆମେ କଦାପି ଭୁଲି ପାରିବୁ ନାହିଁ ଯେ ଏହି ଭବନ ନିର୍ମାଣ ପାଇଁ କଠିନ ପରିଶ୍ରମ, ଝାଳ ଏବଂ ଟଙ୍କା ମୋର ଦେଶବାସୀଙ୍କର ଲାଗିଥିଲା। ଏହି ଗୃହକୁ ବିଦାୟ ଦେବା ପାଇଁ ଏକ ଅତ୍ୟନ୍ତ ଭାବପ୍ରବଣ ମୁହୂର୍ତ୍ତ । ଗତ ୭୫ ବର୍ଷର ଆମର ଯାତ୍ରା ଅନେକ ଗଣତାନ୍ତ୍ରିକ ପରମ୍ପରା ଏବଂ ପ୍ରକ୍ରିୟା ଆଣିଛି। ଏହି ଗୃହର ସମସ୍ତ ସଦସ୍ୟ ଏଥିରେ ଏକ ବିଶେଷ ଅବଦାନ ରଖିଛନ୍ତି। ସମୟ ଏହାର ସାକ୍ଷୀ ହୋଇଛି। ଯଦିଓ ଆମେ ଏକ ନୂତନ ଭବନକୁ ଯିବା, କିନ୍ତୁ ଏହି ପୁରୁଣା ଭବନ ସର୍ବଦା ଆଗାମୀ ପିଢିଙ୍କୁ ପ୍ରେରଣା ଯୋଗାଇବ।