ଲକ୍ଷ୍ନୌ,୧୧।୩: ଉତ୍ତରପ୍ରଦେଶର ଆଲିଗଡ଼ରେ ଏକ ଶୁଆକୁ ଖୋଜିବା ପାଇଁ ପୋଲିସ ସହର ସାରା ପୋଷ୍ଟର ଲଗାଇଛି। ମଣିଷ ପରି କଥା କହୁଥିବା ଏହି ଶୁଆ କିଛିଦିନ ହେବ ନିଖୋଜ ହୋଇଯାଇଛି। ଏନେଇ ଥାନାରେ ଅଭିଯୋଗ ହୋଇଥିଲା। ପୋଲିସ ପ୍ରତ୍ୟେକ ସ୍ଥାନରେ ଏହି ଶୁଆକୁ ଖୋଜୁଛି।
ସୂଚନାଯୋଗ୍ୟ, ରମେଶ ବିହାର ନିକଟରେ ରହୁଥବା ସରୋଜ ସିଂହଙ୍କ ପୁତ୍ରବଧୂ ନୀଶୁ ୨ ବର୍ଷ ତଳେ ଆଫ୍ରିକୀୟ ପ୍ରଜାତିର ଏକ ଶୁଆ ଅନ୍ଲାଇନ୍ରେ ମଗାଇଥିଲେ। ଏହି ଶୁଆର ରଙ୍ଗ ଧୂସରିଆ ହୋଇଥିବା ବେଳେ ଏହାର ଲାଞ୍ଜ ଲାଲ୍ ରଙ୍ଗର। ଶୁଆଟି ପୂରା ମଣିଷ ପରି କଥାବାର୍ତ୍ତା କରିଥାଏ। ସିଟି ବି ବଜାଇଥାଏ। ଘରର ପ୍ରତ୍ୟେକ ସଦସ୍ୟଙ୍କୁ ନାଁ ଧରି ଡାକିଥାଏ।
ନୀଶୁ ଚାକିରି ପାଇଁ ଶୁଆକୁ ଆଲିଗଡ଼ରେ ଛାଡ଼ି ଲଣ୍ଡନ ଯାଇଥିଲେ। ୨ ମାର୍ଚ୍ଚରେ ଏହି ଶୁଆଟି ଘରୁ ହଠାତ୍ କେଉଁଆଡ଼େ ଗାଏବ ହୋଇଗଲା। ଏହା ପରେ ପରିବାର ଲୋକେ କ୍ୱାରସି ଥାନାରେ ଶୁଆ ନିଖୋଜ ନେଇ ଅଭିଯୋଗ କରିଥିଲେ।
ଶୁଆକୁ ଖୋଜି ଆଣିଦେଲେ ୧୦୦୦୦ ଟଙ୍କା ପୁରସ୍କାର ଦିଆଯିବ ବୋଲି ନୀଶୁ ଘୋଷଣା କରିଛନ୍ତି। କିନ୍ତୁ ବର୍ତ୍ତମାନ ପର୍ଯ୍ୟନ୍ତ ଶୁଆର କୌଣସି ସନ୍ଧାନ ମିଳିନାହିଁ।
ପୋଲିସ କହିଛି, ଶୁଆ ନିଖୋଜ ନେଇ ଅଭିଯୋଗ ହୋଇଛି। ବିଭିନ୍ନ ସ୍ଥାନରେ ଖୋଜା ଚାଲିଛି।