ନୂଆଦିଲ୍ଲୀ,୧୫।୫: ଏୟାରଟେଲ୍ ପେମେଣ୍ଟ୍ସ ବ୍ୟାଙ୍କ (ଏପିବି) ଏବଂ ନ୍ୟାଶନାଲ ପେମେଣ୍ଟ୍ସ କର୍ପୋରେଶନ ଅଫ୍ ଇଣ୍ଡିଆ (ଏନ୍ପିସିଆଇ) ମଧ୍ୟରେ ଏକ ଦ୍ୱିପାକ୍ଷିକ ବାଣିଜି୍ୟକ ବୁଝାମଣା ପତ୍ର (ଏମଓୟୁ) ନିକଟରେ ସ୍ବାକ୍ଷରିତ ହୋଇଯାଇଛି। ବିଶେଷ କରି ଏପିବିର ୫ ଲକ୍ଷ ବ୍ୟାଙ୍କିଙ୍ଗ୍ ପଏଣ୍ଟରେ ଆଧାର ଏନାବୁଲ୍ଡ ପେମେଣ୍ଟ ସିଷ୍ଟମ (ଏଇପିଏସ୍) ପାଇଁ ଫେସ୍ ଅଥେଣ୍ଟିକେଶନ ଆରମ୍ଭ କରିବା ଲାଗି ଏନ୍ପିସିଆଇ ସହ ଉକ୍ତ ସହଭାଗିତା ହୋଇଥିବା ଜଣାପଡିଛି। ଏ ସମ୍ପର୍କରେ ଏୟାରଟେଲ୍ ପେମେଣ୍ଟ୍ସ ବ୍ୟାଙ୍କର ସିଓଓ ଗଣେଶ ଅନନ୍ତନାରାୟଣନ୍ କହିଛନ୍ତି, ଆମେ ଆମର ମୂଲ୍ୟବାନ ଗ୍ରାହକଙ୍କୁ ଏହି ନୂଆ ସୁବିଧା ପ୍ରଦାନ କରିବା ପାଇଁ ଏନ୍ପିସିଆଇ ସହ ସହଭାଗିତା କରି ବେଶ ଆନନ୍ଦିତ। ଏପରିକି ଦେଶରେ ଆର୍ଥିକ ଓ ଡିଜିଟାଲ ଅନ୍ତର୍ଭୁକ୍ତୀକରଣକୁ ପରିଚାଳନା କରିବା ପାଇଁ ଆମର ବିଦ୍ୟମାନ ସୁରକ୍ଷିତ ଓ ସରଳ ବ୍ୟାଙ୍କିଙ୍ଗ୍ ସମାଧାନଗୁଡିକରେ ଫେସ୍ ଅଥେଣ୍ଟିକେଶନ ହେଉଛି ଏକ ଗୁରୁତ୍ୱପୂର୍ଣ୍ଣ ଯୋଗ। ସେହିଭଳି ଏନପିସିଆଇର ମୁଖ୍ୟ ପରିଚାଳନା ଅଧିକାରୀ ପ୍ରବୀଣା ରାୟ କହିଛନ୍ତି, ଆମେ ଆଧାର-ଆଧାରିତ ପ୍ରମାଣୀକରଣ ପାଇଁ ଫେସ୍ ଅଥେଣ୍ଟିକେଶନକୁ ଏକ ଅତିରିକ୍ତ ମାଧ୍ୟମ ରୂପେ ଆରମ୍ଭ କରିଥିବାରୁ ୟୁଆଇଡିଏଆଇକୁ ପ୍ରଶଂସା କରୁଛୁ। ଏୟାରଟେଲ୍ ପେମେଣ୍ଟ୍ସ ବ୍ୟାଙ୍କ ଏହି ଫିଚରକୁ ଏଇପିଏସ୍ ଟ୍ରାଞ୍ଜାକ୍ସନଗୁଡିକ ପାଇଁ କାର୍ଯ୍ୟକାରୀ କରୁଥିବାର ଦେଖିବା ଆନନ୍ଦଦାୟକ, ଯାହା ଦେଶବ୍ୟାପୀ ଆଧାର-ଆଧାରିତ ଟ୍ରାଞ୍ଜାକ୍ସନ ଗୁଡିକର ପହଞ୍ଚ ବୃଦ୍ଧି କରିବ। ଉଲ୍ଲେଖଯୋଗ୍ୟ, ଏୟାରଟେଲ୍ ପେମେଣ୍ଟ୍ସ ବ୍ୟାଙ୍କ ହେଉଛି, ଉକ୍ତ ପ୍ରଥମ ୪ଟି ବ୍ୟାଙ୍କ ମଧ୍ୟରୁ ଅନ୍ୟତମ, ଯାହା ଦେଶରେ ଏଇପିଏସ୍ ପାଇଁ ଫେସ୍ ଅଥେଣ୍ଟିକେଶନ ସୁବିଧା ପ୍ରଦାନ କରୁଛି।