ଭୁବନେଶ୍ୱର, ୧୭।୭(ତପନ ସ୍ବାଇଁ): ଏସିଆନ ଚାମ୍ପିୟନ୍ସ ଟ୍ରଫି ହକି ଟୁର୍ନାମେଣ୍ଟର ୬ଷ୍ଠ ସଂସ୍କରଣ ଅଗଷ୍ଟ ୩ରୁ ୧୨ ପର୍ଯ୍ୟନ୍ତ ଚେନ୍ନାଇରେ ଅନୁଷ୍ଠିତ ହେବ। ଏହାର ଅଂଶବିଶେଷ ଭାବେ ‘ପାସ୍ ଦି ବଲ୍ ଟ୍ରଫି ଟୁର୍’ କାର୍ଯ୍ୟକ୍ରମ ରବିବାର କଳିଙ୍ଗ ଷ୍ଟାଡିୟମରେ ଅନୁଷ୍ଠିତ ହୋଇଯାଇଛି। କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା, ହକି ଇଣ୍ଡିଆ ସଭାପତି ଦିଲୀପ ତିର୍କୀ ଏବଂ କ୍ରୀଡ଼ା ନିର୍ଦ୍ଦେଶକ ସିଦ୍ଧାର୍ଥ ଦାସ ଉକ୍ତ କାର୍ଯ୍ୟକ୍ରମରେ ଯୋଗଦେଇ ଟ୍ରଫି ଉନ୍ମୋଚନ କରିଛନ୍ତି। ଏହି ଅବସରରେ ଓଡ଼ିଶା ନାଭାଲ ଟାଟା ହକି ହାଇପଫର୍ମାନ୍ସ ସେଣ୍ଟର କ୍ୟାଡେଟ୍ସ ଏବଂ କ୍ରୀଡ଼ା ଓ ଯୁବସେବା ବିଭାଗର ଅଧିକାରୀମାନେ ଉପସ୍ଥିତ ଥିଲେ। ପ୍ରକାଶଯୋଗ୍ୟ ଯେ, କେନ୍ଦ୍ର କ୍ରୀଡ଼ାମନ୍ତ୍ରୀ ଅନୁରାଗ ଠାକୁର ‘ପାସ୍ ଦି ବଲ୍ ଟ୍ରଫି ଟୁର୍’ ଅଭିଯାନକୁ ଚେନ୍ନାଇଠାରେ ଶୁଭାରମ୍ଭ କରିବା ପରେ ଏହା ଦେଶର ବିଭିନ୍ନ ସ୍ଥାନରେ ଅନୁଷ୍ଠିତ ହେଉଛି। ଏହାଦ୍ୱାରା ଯୁବ ଆଥ୍ଲେଟମାନେ ଟ୍ରଫିକୁ ସ୍ପର୍ଶ କରିପାରିବେ ଏବଂ ସେମାନଙ୍କୁ ଦେଶ ପାଇଁ ଖେଳିବାକୁ ଅନୁପ୍ରାଣିତ କରିବା ଏହି କାର୍ଯ୍ୟକ୍ରମର ଉଦ୍ଦେଶ୍ୟ।
ଟ୍ରଫି ଉନ୍ମୋଚନ ଅବସରରେ କ୍ରୀଡ଼ାମନ୍ତ୍ରୀ କହିଲେ ଯେ, ”ଏସିଆନ ଚାମ୍ପିୟନ୍ସ ଟ୍ରଫି ହକିରୁ ଅନେକ ଫାଇଦା ମିଳିବ। ଅଲିମ୍ପିଆନ ସମେତ ଅନେକ ଆଥ୍ଲେଟଙ୍କୁ ସୃଷ୍ଟି କରିବାରେ ସୁନ୍ଦରଗଡ଼ର ସମୃଦ୍ଧ ଇତିହାସ ରହିଛି। ଆଗାମୀ ଦିନରେ ଆମେ କ୍ରୀଡ଼ାର ବିକାଶ ଉପରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବାକୁ ଲକ୍ଷ୍ୟ ରଖିଛୁ“। ହକି ଇଣ୍ଡିଆ ସଭାପତି ତଥା ପୂର୍ବତନ ଅଧିନାୟକ ଦିଲୀପ ତିର୍କୀ କଳିଙ୍ଗ ଷ୍ଟାଡିୟମରେ ଏପରି ଏକ କାର୍ଯ୍ୟକ୍ରମରେ ଯୋଗଦେଇ ସ୍ବାଭାବିକଭାବେ ଖୁସି ପ୍ରକାଶ କରିଛନ୍ତି। ”କଳିଙ୍ଗରେ ଆଜି ଏସିଆନ ଚାମ୍ପିୟନ୍ସ ଟ୍ରଫି ହକିର ‘ପାସ୍ ଦି ବଲ୍ ଟ୍ରଫି ଟୁର୍’ କାର୍ଯ୍ୟକ୍ରମ ଆୟୋଜନ କରି ଆମେ ଆନନ୍ଦିତ। ବଡ଼ ହକି ଟୁର୍ନାମେଣ୍ଟ ଆୟୋଜନ କରିବାରେ ଭାରତର ସମୃଦ୍ଧ ଇତିହାସ ରହିଛି। ଚେନ୍ନାଇରେ ହେବାକୁ ଯାଉଥିବା ଆଗାମୀ ପ୍ରତିଯୋଗିତା ମଧ୍ୟ ସଫଳ ହେବାନେଇ ମୁଁ ଆଶାବାଦୀ“ ବୋଲି ଦିଲୀପ ପ୍ରକାଶ କରିଛନ୍ତି। ଅନ୍ୟପକ୍ଷରେ ”ଟ୍ରଫି ଓଡ଼ିଶାରେ ପହଞ୍ଚତ୍ବା ଆମ ପାଇଁ ଆନନ୍ଦର ମୁହୂର୍ତ୍ତ। ହକିରେ ଭାରତ ଅନେକ ସ୍ମରଣୀୟ ସଫଳତା ଅର୍ଜନ କରିଛି। ଅଲିମ୍ପିକ୍ସରେ ମଧ୍ୟ ତାହା ପ୍ରତିଫଳିତ ହୋଇଛି, ଯାହାକି ଆମକୁ ଗର୍ବିତ କରିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦିଗ୍ଦର୍ଶନରେ ଓଡ଼ିଶାରେ ହକିକୁ ଭରପୂର ସମର୍ଥନ ମିଳୁଛି। ଏଠାରେ ଟୁର୍ନାମେଣ୍ଟ ଆୟୋଜନ କରାଯାଇ କେବଳ ହକିକୁ ପ୍ରମୋଟ କରାଯାଉନାହିଁ, ୨୦ଟି ଅଧିକ ହକି ଟର୍ଫ ପ୍ରସ୍ତୁତ କରାଯାଇଛି“ ବୋଲି କ୍ରୀଡ଼ା ନିର୍ଦ୍ଦେଶକ ପ୍ରକାଶ କରିଛନ୍ତି।
ପ୍ରକାଶଯୋଗ୍ୟ ଯେ, ଟ୍ରଫି ଟୁର୍ କାର୍ଯ୍ୟକ୍ରମ ଦିଲ୍ଲୀ, ଚଣ୍ଡିଗଡ଼, ଗୁଆହାଟୀ ଓ ପାଟଣା ଆଦି ଦେଶର ଅନେକ ସହରରେ ଆୟୋଜନ ହେବା ପରେ ଭୁବନେଶ୍ୱରରେ ପହଞ୍ଚତ୍ଛି। ଏହାପରେ ଟ୍ରଫି ରାଞ୍ଚତ୍, ବେଙ୍ଗାଲୁରୁ ଓ ତ୍ରିଭେନ୍ଦ୍ରମ ଦେଇ ଚେନ୍ନାଇରେ ପହଞ୍ଚତ୍ବା କାର୍ଯ୍ୟକ୍ରମ ରହିଛି। ଆଗାମୀ ଏସିଆନ ଚାମ୍ପିୟନ୍ସ ଟ୍ରଫିରେ ଭାରତ, ଜାପାନ, କୋରିଆ, ପାକିସ୍ତାନ, ଚାଇନା ଓ ମାଲେସିଆ ଦଳ ଅଂଶଗ୍ରହଣ କରିବ।