ନୂଆଦିଲ୍ଲୀ, ୨୭।୨: ବିମାନ ଯାତ୍ରା ହେଉ ଅବା ରେଳ ଯାତ୍ରା, ଯାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ବିଭାଗୀୟ କର୍ତ୍ତୃପକ୍ଷଙ୍କ ପକ୍ଷରୁ ଅନେକ ନିୟମ ଲାଗୁ କରାଯାଇଛି। ଯେଉଁ ଯାତ୍ରୀ ଉକ୍ତ ନିୟମକୁ ଉଲ୍ଲଂଘନ କରନ୍ତି, ସେମାନଙ୍କଠାରୁ ଜରିମାନା ଆଦାୟର ଆଇନ ବ୍ୟବସ୍ଥା ମଧ୍ୟ ରହିଛି। ହେଲେ କଡ଼ା ନିୟମ ଲାଗୁ ସତ୍ତ୍ୱେ ଅନେକ ସମୟରେ ଯାତ୍ରା ସମୟରେ ଯାତ୍ରୀ ଧୂମପାନ କାର୍ଯ୍ୟରେ ଲିପ୍ତ ରହୁଥିବା ଘଟଣା ଅନେକଥର ସାମ୍ନାକୁ ଆସିଛି। ଇତିମଧ୍ୟରେ ସୋସିଆଲ ମିଡିଆରେ ଏଭଳି ଏକ ଭିଡିଓ ଏବେ ଭାଇରାଲ ହେବାରେ ଲାଗିଛି। ଜଣେ ମହିଳା ଯାତ୍ରୀ ବିନା ଡରରେ ଟ୍ରେନ୍ ଭିତରେ ଛିଡ଼ାହୋଇ ଗଞ୍ଜେଇ ଟାଣୁଥିବାର ଦେଖିବାକୁ ମିଳିଛି। ଉକ୍ତ ଯୁବତୀଙ୍କ ପାଖରେ ଅନ୍ୟ ଯାତ୍ରୀମାନେ ମଧ୍ୟ ଛିଡ଼ା ହୋଇଛନ୍ତି। ଏହି ଭିଡିଓକୁ ଟାଟାନଗରରୁ କଟିହାର ଏକ୍ସପ୍ରେସ୍ରେ ଯାତ୍ରା କରୁଥିବା ଅନ୍ୟଜଣେ ଯାତ୍ରୀ ଟୁଇଟରରେ ପୋଷ୍ଟ କରିଛନ୍ତି। ଯୁବତୀଜଣକ ଆସାନସୋଲରୁ ଟ୍ରେନ୍ରେ ଚଢ଼ିଥିଲେ। ରାତିତମାମ ସେ ଗଞ୍ଜେଇ ଓ ସିଗାରେଟ ଟାଣିଥିବା କଥା ଭିଡିଓଟିକୁ ସୋସିଆଲ ମିଡିଆରେ ଶେୟାର କରିଥିବା ଜଣେ ଯାତ୍ରୀ କହିଛନ୍ତି। ଭିଡିଓ ଉପରେ ରେଳ ସେବା କର୍ତ୍ତୃପକ୍ଷଙ୍କ ନଜର ପଡ଼ିବା ପରେ ଏନେଇ ଅଧିକ ତଥ୍ୟ ଦେବା ପାଇଁ ସେ ଅନୁରୋଧ କରିଛନ୍ତି। ଟ୍ରେନ୍ ନମ୍ବର ଓ ଭିଡିଓ ଶେୟାର କରିଥିବା ପାସେଞ୍ଜରଙ୍କ ମୋବାଇଲ୍ ନମ୍ବର ମାଗିବା ସହ ୧୩୯କୁ ଫୋନ୍ କରି ତଥ୍ୟ ଦେବାକୁ ରେଳ ସେବା ପକ୍ଷରୁ କୁହାଯାଇଥିବା ଜଣାପଡ଼ିଛି।
