ଅଲିଗଡ଼,୨।୧୨: ମୃତ୍ୟୁ କେବେ ଏବଂ କିପରି ଆସେ ତାହା କେହି କେବେ ଭାବି ନ ଥା’ନ୍ତି। ଏପରି ଏକ ଘଟଣା ଘଟିଛି ଚଳନ୍ତା ଟ୍ରେନରେ। ଦିଲ୍ଲୀର ଆନନ୍ଦ ବିହାରରୁ ଓଡ଼ିଶାର ପୁରୀ ମଧ୍ୟରେ ଚାଲୁଥିବା ନିଳାଞ୍ଚଳ ଏକ୍ସପ୍ରେସ ଟ୍ରେନ୍ରେ ଘଟିଛି ଏହି ଅଘଟଣ। ଶୁକ୍ରବାର ସକାଳ ପ୍ରାୟ ୯ଟା ୪୫ମିନିଟ୍ରେ ଟ୍ରେନ୍ଟି ଗନ୍ତବ୍ୟ ପଥରେ ଥିବା ବେଳେ ଉତ୍ତରପ୍ରଦେଶର ଅଲିଗଡ଼ରୁ ପ୍ରାୟ ୩୫କିଲୋମିଟର ପୂର୍ବରୁ ଦନଓ୍ବର ସୋମନା ଅଞ୍ଚଳରେ ହଠାତ୍ ଟ୍ରେନ୍ର ଝରକା କାଚ ଭାଙ୍ଗିଯାଇଥିଲା। ପରବର୍ତ୍ତୀ ସମୟରେ ଝରକା ପଟୁ ଟ୍ରାକ୍ରେ ପଡ଼ିଥିବା ଏକ ଲୁହା ରଡ୍ ଆସି ଜଣେ ଯାତ୍ରୀଙ୍କ ବେକ ଭିତରେ ପଶି ମୁଣ୍ଡ ଚିରି ବାହାରି ଆସିଥିଲା। ଦୁର୍ଘଟଣା ସମୟରେ ଟ୍ରେନ୍ର ବେଗ ଘଣ୍ଟା ପ୍ରତି ୧୧୦ କିଲୋମିଟର ଥିଲା ବୋଲି କୁହାଯାଉଛି।
ଫଳରେ ଯାତ୍ରୀ ଜଣକ ଗୁରୁତର ଆହତ ହୋଇଥିଲେ। ଟ୍ରେନ୍ରେ ଥିବା ଅଧିକାରୀ ଜଣକ ଅଲିଗଡ ରେଳ ଷ୍ଟେସନର ଅଧିକାରୀମାନଙ୍କୁ ଘଟଣା ସମ୍ପର୍କରେ ସୂଚନା ଦେଇଥିଲେ। ଟ୍ରେନଟି ଆଲିଗଡ ରେଳ ଷ୍ଟେଶନରେ ପହଞ୍ଚିବା ପରେ ରେଳ କର୍ମଚାରୀମାନେ ତୁରନ୍ତ ତାଙ୍କୁ ହସ୍ପିଟାଲକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଜିଆର୍ପି ପୋଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଛି। ମୃତବ୍ୟକ୍ତି ଜଣକ ସୁଲତାନପୁରର ହରିକେଶ କୁମାର ଦୁବେ ବୋଲି ଜଣାପଡ଼ିଛି। ତାଙ୍କ ପରିବାର ସଦସ୍ୟଙ୍କୁ ଏହି ଘଟଣା ସମ୍ପର୍କରେ ଅବଗତ କରାଯାଇଛି ବୋଲି ଉତ୍ତର କେନ୍ଦ୍ରୀୟ ରେଳବାଇ (ଏନସିଆର) ର ମୁଖ୍ୟ ଜନସମ୍ପର୍କ ଅଧିକାରୀ ହିମାଂଶୁ ଶେଖର ଉପାଧ୍ୟାୟ କହିଛନ୍ତି। ଏହି ଘଟଣା ପରେ ଟ୍ରେନ୍ରେ ହଇଚଇ ସୃଷ୍ଟି ହୋଇଥିଲା।
