ନୂଆଦିଲ୍ଲୀ,୨୪ ।୧୨: ବ୍ରିଟେନରେ ଦେଖାଦେଇଥିବା କରୋନା ଭାଇରସର ନୂଆ ରୂପକୁ ନେଇ ଏବେ ବିଶ୍ୱବାସୀ ଡରି ଯାଇଛନ୍ତି । ଭାଇରସର ନୂଆ ରୂପକୁ ନେଇ ଭାରତ ସମେତ ପାଖାପାଖି ୫୦ଟି ଦେଶ ବ୍ରିଟେନକୁ ଯାତାୟତ ଉପରେ କଟକଣା ଜାରି କରି ଦେଇଛନ୍ତି । ହେଲେ ବ୍ରିଟେନକୁ ବିମାନ ସେବା ବନ୍ଦ କରିବା ପୂର୍ବରୁ କିନ୍ତୁ ଶହ ଶହ ଯାତ୍ରୀ ଭାରତ ପହଞ୍ଚି ସାରିଛନ୍ତି । ଯାହାକୁ ନେଇ ଏବେ ସରକାର ଓ ସାଧାରଣ ଜନତା ଚିନ୍ତାରେ ପଡିଯାଇଛନ୍ତି । ଏମାନଙ୍କ ମଧ୍ୟରୁ ଅନେକ କରୋନାରେ ସଂକ୍ରମିତ ବି ହୋଇଛନ୍ତି । ସୂଚନା ମୁତାବକ ବ୍ରିଟେନରେ ଦେଖାଦେଇଥିବା ନୂଆ ଷ୍ଟ୍ରେ୍ନ୍ ୭୦ ପ୍ରତିଶତ ଅଧିକ ବେଗରେ ସଂକ୍ରମିତ ହେବାର ଆଶଙ୍କା ରହିଛି । ହେଲେ ସରକାର କହୁଛନ୍ତି ଏହାକୁ ନେଇ ଚିନ୍ତା କରିବାର କୌଣସି କାରଣ ନାହିଁ । ଏବେସୁଦ୍ଧା ବ୍ରିଟେନରୁ ଦିଲ୍ଲୀ ବିମାନ ବନ୍ଦରରେ ପହଞ୍ଚିଥିବା ପ୍ରାୟ ୯୮୪ ଯାତ୍ରୀଙ୍କ ମଧ୍ୟରୁ ୧୧ ଜଣ କରୋନାରେ ପୀଡ଼ିତ ହୋଇଥିବା ଜଣାପଡିଛି । ଏମାନଙ୍କ ମଧ୍ୟରୁ ଯେଉଁମାନେ ସଂକ୍ରମିତ ଯାତ୍ରୀଙ୍କ ପାଖରେ ବସିଥିଲେ ସେମାନଙ୍କୁ କ୍ୱାରାଣ୍ଟାଇନକୁ ପଠାଇ ଦିଆଯାଇଛି । ସେମିତି ବ୍ରିଟେନରୁ ଅମୃତସର ଆସିଥିବା ୨୪୨ ଯାତ୍ରୀଙ୍କ ମଧ୍ୟରୁ ୮ ଜଣ କରୋନାରେ ପୀଡିତ ହୋଇଛନ୍ତି । ଏମାନଙ୍କର ଜେନୋମ ଟେଷ୍ଟ କରାଯିବ । ସେହିପରି ବ୍ରିଟେନରୁ ପ୍ରାୟ ୪୦୫ ଜଣ ଯାତ୍ରୀ ମଧ୍ୟପ୍ରଦେଶ ପହଞ୍ଚିଛନ୍ତି । ଏମାନଙ୍କ ମଧ୍ୟରେ ନୂଆ କରୋନା ଭାଇରସ ଦ୍ୱାରା ସଂକ୍ରମିତ ଯାତ୍ରୀ ଥିବା ଆଶଙ୍କା କରି ଅଧିକାଂଶଙ୍କୁ କ୍ୱାରାଣ୍ଟାଇନରେ ରଖାଯାଇଛି । କେବଳ ଭାରତ ନୁହେଁ କରୋନାର ନୂଆ ରୂପକୁ ନେଇ ଅଷ୍ଟ୍ରେଲିଆ, ଫ୍ରାନ୍ସ, ଜର୍ମାନୀ, ଇଟାଲୀ, ତୁର୍କୀ, କାନାଡା, ନେଦରଲ୍ୟାଣ୍ଡସ୍, ବେଲଜିୟମ, ଅଷ୍ଟ୍ରିୟା ଓ ଇସ୍ରାଏଲରେ ବ୍ରିଟେନ ବିମାନ ସେବାକୁ ବନ୍ଦ କରି ଦିଆଯାଇଛି ।