ଭୁବନେଶ୍ୱର,୧୩।୧୨(ବ୍ୟୁରୋ):କିଛିଦିନର ବ୍ୟବଧାନ ପରେ ରାଜଧାନୀରେ ପୁଣିଥରେ ମୋ ବସ୍ରୁ ଚୋରି ହୋଇଛି। ଏଥର ଚୋରିର ଶିକାର ହୋଇଛନ୍ତି ଦମ୍ପତି। ମୋ ବସ୍ରେ ଯାତ୍ରା କରୁଥିବା ବେଳେ କେହି ଦୁର୍ବୃତ୍ତ ସେମାନଙ୍କଠାରୁ ୪୨ ହଜାର ଟଙ୍କା ନେଇଯାଇଥିବା ନୟାପଲ୍ଲୀ ଥାନାରେ ଅଭିଯୋଗ ହୋଇଛି। ଅଭିଯୋଗକୁ ଭିତ୍ତି କରି ପୋଲିସ ଘଟଣାର ତଦନ୍ତ ଆରମ୍ଭ କରିଛି। ସୂଚନାନୁଯାୟୀ, ଶହୀଦନଗର ଥାନା ଅନ୍ତର୍ଗତ ଭିଏସ୍ଏସ୍ ନଗରରେ ବିରଞ୍ଚି ନାରାୟଣ ସେଠୀ ଓ ତାଙ୍କ ସ୍ତ୍ରୀ ରହୁଛନ୍ତି। ବିରଞ୍ଚି ଜଣେ ଡ୍ରାଇଭର ଭାବେ କାମ କରନ୍ତି। କିଛିଦିନ ତଳେ ଖଣ୍ଡଗିରିରେ ଥିବା ଏକ ବ୍ୟାଙ୍କରୁ ସେ ଟଙ୍କା ଲୋନ୍ କରି ଆଣିଥିଲେ। ସୋମବାର ସ୍ବାମୀ-ସ୍ତ୍ରୀ ଲୋନ୍ ଟଙ୍କାକୁ ଧରି ବାଣୀବିହାରରୁ ମୋ ବସ୍ରେ ଚଢ଼ିଥିଲେ। ଜୟଦେବ ବିହାର ନିକଟରେ ହୋଇଥିବା ବେଳେ ତାଙ୍କ ମନିପର୍ସ ଥିବାବେଳେ କିଛି ସମୟ ପରେ ପକେଟ ଦେଖିବାବେଳେ ପର୍ସ ସହ ଟଙ୍କା ମଧ୍ୟ ନ ଥିଲା। କେହି ଦୁର୍ବୃତ୍ତ ପକେଟରୁ ୪୨ ହଜାର ଟଙ୍କା ସହ ପର୍ସ ନେଇ ଚମ୍ପଟ ମାରିଥିଲେ। ଏନେଇ ଦମ୍ପତି ବସ୍ କର୍ମଚାରୀଙ୍କୁ ଜଣାଇବା ସହ ଯାଞ୍ଚ କରିଥିଲେ ମଧ୍ୟ ଟଙ୍କା ମିଳି ନ ଥିଲା। ଶେଷରେ ଦମ୍ପତି ନୂଆପଲ୍ଲୀ ଥାନା ଦ୍ୱାରସ୍ଥ ହେବା ପରେ ପୋଲିସ ଘଟଣାକୁ ଗୁରୁତର ନେଇ ତଦନ୍ତ ଚଳାଇଛି। ଅନ୍ୟପଟେ ଚୋରି ପାଇଁ ମୋ ବସ୍ର କର୍ମଚାରୀଙ୍କୁ ଦାୟୀ କରିଛନ୍ତି ବିରଞ୍ଚି। ଏ ନେଇ ନୟାପଲ୍ଲୀ ଥାନା ଅଧିକାରୀ ବିଶ୍ୱରଞ୍ଜନ ସାହୁ କହିଛନ୍ତି, ଚୋରି ନେଇ ଅଭିଯୋଗ ହେବା ପରେ ତଦନ୍ତ ଚାଲୁଥିବା ବେଳେ ମୋ ବସ୍ରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ କରାଯିବ। ତେବେ ବିଗତ କିଛିଦିନ ମଧ୍ୟରେ ମୋ ବସ୍ରୁ ଏହିପରି ଅନେକ ଚୋରି ଘଟଣା ସାମ୍ନାକୁ ଆସୁଛି। କିଛିଦିନ ତଳେ ଜଣେ ଯାତ୍ରୀ ଚୋରିର ଶିକାର ହୋଇଥିବା ବେଳେ ପୁଣି ଆଉ ଏକ ଘଟଣା ସାମ୍ନାକୁ ଆସିବାରୁ ଚିନ୍ତାରେ ଯାତ୍ରୀ। ଅପରପକ୍ଷେ ଆଗକୁ ଖ୍ରୀଷ୍ଟମାସ, ନୂଆବର୍ଷ ଆସୁଥିବାରୁ ମୋ ବସ୍ରେ ଲୋକଙ୍କ ପ୍ରବଳ ଭିଡ଼ ଦେଖିବାକୁ ମିଳୁଛି। ତେବେ ଏହାରୁ ସୁଯୋଗ ନେଇ ପୁଣି ସକ୍ରିୟ ଉଠିଲେଣି ଦୁର୍ବୃତ୍ତ।