ଦୁବାଇ,୨୫।୧୦: ଚଳିତ ଟି୨୦ ବିଶ୍ୱକପ୍ରେ ପାକିସ୍ତାନଠାରୁ ୧୦ ଉଇକେଟରେ ପରାସ୍ତ ହେବା ପରେ ଭାରତୀୟ ଦଳର ଖେଳାଳିଙ୍କୁ ସୋସିଆଲ ମିଡିଆରେ ଟ୍ରୋଲରେ କରାଯାଉଛି। ଏହି ମ୍ୟାଚ୍ରେ ୩.୫ ଓଭରରେ ୪୩ ରନ୍ ଖର୍ଚ୍ଚ କରିଥିଲେ ମହମ୍ମଦ ଶାମି। ତାଙ୍କର ଏଭଳି ସାଧାରଣ ପ୍ରଦର୍ଶନକୁ ୟୁଜର୍ସ ତାଙ୍କ ଧର୍ମ ସହ ଯୋଡ଼ି ସମାଲୋଚନା କରିଛନ୍ତି। ଏଭଳି ସମୟରେ ଶାମିଙ୍କ ସପକ୍ଷରେ ବାହାରିଛନ୍ତି ଅନେକ ପୂର୍ବତନ ଓ ବର୍ତ୍ତମାନ ଖେଳାଳି।
ପୂର୍ବତନ ଭାରତୀୟ ଓପନର ବୀରେନ୍ଦ୍ର ସେହ୍ବାଗ ଟୁଇଟ୍ କରି ଲେଖିଛନ୍ତି, ”ଶାମିଙ୍କୁ ଅନଲାଇନରେ କରାଯାଉଥିବା ଆକ୍ରମଣ ନିନ୍ଦା କରୁଛି। ତାଙ୍କ ସହ ଆମେ ଛିଡ଼ା ହୋଇଛୁ। ସେ ଜଣେ ଚାମ୍ପିୟନ। ଭାରତୀୟ ଦଳର କ୍ୟାପ ପିନ୍ଧି ଖେଳୁଥିବା ପ୍ରତ୍ୟେକଙ୍କ ହୃଦୟରେ ଭାରତ ରହିଛି। ପରବର୍ତ୍ତୀ ମ୍ୟାଚ୍ରେ ସେ ତାଙ୍କ ଦକ୍ଷତା ପ୍ରଦର୍ଶିତ କରିବେ“।
ସେହିଭଳି ଇର୍ଫାନ ପଠାନ ଲେଖିଛନ୍ତି, “ମୁଁ ମଧ୍ୟ ଭାରତ-ପାକିସ୍ତାନ ମ୍ୟାଚ୍ ଖେଳିଛି, ଯେଉଁଠାରେ ଆମକୁ ପରାଜୟର ସମ୍ମୁଖୀନ ହେବାକୁ ପଡ଼ିଛି। କିନ୍ତୁ ଆମକୁ କେହି ପାକିସ୍ତାନ ଯିବାକୁ କହି ନାହାନ୍ତି। ମୁଁ କିଛି ବର୍ଷ ତଳର କଥା କହୁଛି। ଏଭଳି ପ୍ରଥାକୁ ବନ୍ଦ କରାଯିବା ଦରକାର”। ଭେଟେରାନ ଅଫ୍ ସ୍ପିନର ହରଭଜନ ସିଂ ଓ ବିଶ୍ୱକପ୍ ଦଳରେ ସ୍ଥାନ ପାଇ ନ ଥିବା ୟୁଜବେନ୍ଦ୍ର ଚହଲ ମଧ୍ୟ ଟୁଇଟ୍ କରି ଶାମିଙ୍କୁ ସମର୍ଥନ କରିଛନ୍ତି।
