ସିଡନୀ,୨୬।୧୧: ଅଷ୍ଟ୍ରେଲିଆର ଟେଷ୍ଟ କ୍ରିକେଟ ଦଳର ନୂତନ ଅଧିନାୟକ ଭାବରେ ବିଶ୍ୱର ଏକ ନମ୍ବର ଟେଷ୍ଟ ବୋଲର ପ୍ୟାଟ କମିନ୍ସଙ୍କୁ ମନୋନୀତ କରାଯାଇଛି। କମିନ୍ସ ଅଷ୍ଟ୍ରେଲିଆର ୪୭ ତମ ଟେଷ୍ଟ ଅଧିନାୟକ ହୋଇଛନ୍ତି। ଭେଟେରାନ ଖେଳାଳି ଷ୍ଟିଭ ସ୍ମିଥଙ୍କୁ ଦଳର ଉପ-ଅଧିନାୟକ କରାଯାଇଛି। ୬୫ ବର୍ଷ ମଧ୍ୟରେ ଏହା ପ୍ରଥମ ଥର ଘଟଛି ଯେ ଜଣେ ବୋଲର ଅଷ୍ଟ୍ରେଲୀୟ ଟେଷ୍ଟ ଦଳର ଅଧିନାୟକ ହେବେ। କମିନ୍ସ ଟିମ ପେନ୍ଙ୍କ ସ୍ଥାନ ନେଇଛନ୍ତି। ଜଣେ ଯୁବତୀଙ୍କୁ ତାଙ୍କର ଅଶ୍ଳୀଳ ଫଟୋ ଏବଂ ଅଶ୍ଳୀଳ ବାର୍ତ୍ତା ପଠାଇଥିବାରୁ ଦୁଃଖ ପ୍ରକାଶ କରି ପେନ୍ ଅଧିନାୟକ ପଦରୁ ଇସ୍ତଫା ଦେବାକୁ ନିଷ୍ପତ୍ତି ନେଇଥିଲେ। ଆସନ୍ତା ମାସରୁ ଅଷ୍ଟ୍ରେଲିଆ ଏବଂ ଇଂଲଣ୍ଡ ମଧ୍ୟରେ ଆଶେସ ସିରିଜ ଅନୁଷ୍ଠିତ ହେବ।
୨୦୧୮ରେ, ଦକ୍ଷିଣ ଆଫ୍ରିକା ବିପକ୍ଷରେ କେପଟାଉନ ଟେଷ୍ଟରେ ବଲ ଟାମ୍ପରିଂ କରିବା ପରେ ଷ୍ଟିଭ ସ୍ମିଥ ଅଧିନାୟକତ୍ୱରୁ ବଞ୍ଚିତ ହୋଇଥିଲେ ଏବଂ ତାଙ୍କ ସ୍ଥାନରେ ପେନ୍ ଟେଷ୍ଟ ଦଳର ଅଧିନାୟକ ହୋଇଥିଲେ। ସ୍ମିଥଙ୍କୁ ମଧ୍ୟ ଏକ ବର୍ଷ ପାଇଁ ବାସନ୍ଦ କରାଯାଇଥିଲା। ଦଳକୁ ଫେରିବା ପରେ ସେ ଜଣେ ବ୍ୟାଟ୍ସମ୍ୟାନ ଭାବରେ ଖେଳୁଥିଲେ। ତେବେ କ୍ରିକେଟ ଅଷ୍ଟ୍ରେଲିଆ ପୁଣି ଥରେ ସ୍ମିଥଙ୍କ ଉପରେ ଆତ୍ମବିଶ୍ୱାସ ପ୍ରକାଶ କରିଛି। ଉପ-ଅଧିନାୟକ ହେବାପରେ ସ୍ମିଥ କହିଛନ୍ତି, ଦଳର ନେତୃତ୍ୱରେ ଫେରି ମୁଁ ବହୁତ ଖୁସି। ମୁଁ ପ୍ୟାଟ କମିନ୍ସଙ୍କୁ ସାହାଯ୍ୟ କରିବାକୁ ପ୍ରସ୍ତୁତ।କମିନ୍ସ ଏବଂ ମୁଁ ଦୀର୍ଘ ସମୟ ଧରି ଏକାଠି ଖେଳୁଛୁ ତେଣୁ ଆମେ ପରସ୍ପରର ଶୈଳୀ ଜାଣିଛୁ ବୋଲି ସେ କହିଛନ୍ତି।
