ନୂଆଦିଲ୍ଲୀ,୬।୧ (ଅଭୟ ଦାଶ): ଦେଶର ପ୍ରମୁଖ ଘରୋଇ ପ୍ରତିଷ୍ଠାନ ତଥା ପତଞ୍ଜଳି ସଂସ୍ଥାନର ୩୦ତମ ପୂର୍ତ୍ତି ଉତ୍ସବ ରବିବାର ହରିଦ୍ୱାରର ପତଞ୍ଜଳି ୱେଲ୍ନେସସ୍ଥିତ ଯୋଗ ଭବନ ଅଡିଟୋରିୟମଠାରେ ପାଳିତ ହୋଇଯାଇଛି। ଏହି ଅବସରରେ ପତଞ୍ଜଳି ଯୋଗପୀଠର ପରମାଧ୍ୟକ୍ଷ ସ୍ବାମୀ ବାବା ରାମଦେବ ଏବଂ ପତଞ୍ଜଳି ଯୋଗପୀଠର ସାଧାରଣ ସମ୍ପାଦକ ଆଚାର୍ଯ୍ୟ ବାଲ୍କ୍ରିଷ୍ଣାଙ୍କ ସମେତ ପତଞ୍ଜଳି ଯୋଗପୀଠର ୬୦୦୦ରୁ ଅଧିକ ପ୍ରଭାରୀ ଓ ଅନ୍ୟମାନେ ଯୋଗ ଦେଇଥିଲେ।
ଏହି ପରିପ୍ରେକ୍ଷୀରେ ବାବା ରାମଦେବ କହିଥିଲେ, ଆମେ ଅନେକ ଘଟଣା ମଧ୍ୟରେ ଆଜି ୩୦ତମ ପୂର୍ତ୍ତି ଉତ୍ସବ ପାଳନ କରୁଛୁ। ଏପରିକି ଗତ ୩୦ ବର୍ଷର ସେବା, ସଂଘର୍ଷ ଏବଂ ସାଧନାକୁ ସେ ସୁନ୍ଦର ଭାବେ ସର୍ବସାଧାରଣରେ ଉପସ୍ଥାପନ କରିଥିଲେ। ଏପରିକି ପତଞ୍ଜଳି ଯୋଗପୀଠର ଭବିଷ୍ୟତ ଯୋଜନା ଉପରେ ମଧ୍ୟ ରାମଦେବ ବିସ୍ତୃତ ଭାବେ ଆଲୋକପାତ କରିଥିଲେ। ବିଶେଷକରି ଯୋଗପୀଠର ଯୋଗକ୍ରାନ୍ତିର ଅଶେଷ ସଫଳତା ପରେ ରାମଦେବ ବର୍ତ୍ତମାନ ପାଞ୍ଚଟି ବିପ୍ଳବ ‘ଶିକ୍ଷା, ଚିକିତ୍ସା (ଔଷଧ), ଅର୍ଥନୈତିକ (ଆର୍ଥିକ), ଆଦର୍ଶ-ସାଂସ୍କୃତିକ ତଥା ନିଶା’ର ନିବାରଣ ପତଞ୍ଜଳିରୁ ଆରମ୍ଭ ହେବା ଆବଶ୍ୟକ ବୋଲି ସେ କହିଥିଲେ। ସେହିଭଳି ପତଞ୍ଜଳି ଯୋଗପୀଠର ସାଧାରଣ ସମ୍ପାଦକ ଆଚାର୍ଯ୍ୟ ବାଲକ୍ରିଷ୍ଣା କହିଥିଲେ, ଗତ ୩୦ ବର୍ଷ ମଧ୍ୟରେ ଆମେ ଅନେକ ପ୍ରକାରର ପରିବର୍ତ୍ତନ ଆଣିପାରିଛୁ। ଆଗାମୀ ଦିନରେ ସ୍ବାମୀଙ୍କର ସଂକଳ୍ପକୁ ଶତପ୍ରତିଶତ ପୂରଣ କରିବାକୁ ସବୁ ସ୍ତରରେ ପ୍ରୟାସ କରିବୁ ବୋଲି ସେ ବିସ୍ତୃତ ଭାବେ ମତପ୍ରକାଶ କରିଥିଲେ।
