ନୂଆଦିଲ୍ଲୀ,୯।୫: ଦେଶର ପ୍ରମୁଖ ଘରୋଇ ଅନୁଷ୍ଠାନ ପତଞ୍ଜଳି ଯୋଗପୀଠ ପକ୍ଷରୁ ନୂଆଦିଲ୍ଲୀର ଇନ୍ଦିରା ଗାନ୍ଧୀ ଷ୍ଟାଡିୟମରେ ଏକ ବିଶାଳ ମହିଳା ସମାବେଶ ସମ୍ମିଳନୀ ଅନୁଷ୍ଠିତ ହୋଇଯାଇଛି। ଏପରିକି ଯୋଗଗୁରୁ ସ୍ବାମୀ ରାମଦେବଙ୍କ ନେତୃତ୍ୱରେ ପତଞ୍ଜଳି ବିଶ୍ୱବିଦ୍ୟାଳୟ ଭାରତ ସ୍ବାଭିମାନ (ମହିଳା ୱିଙ୍ଗ) ସମେତ ଜି-୨୦ ସହଯୋଗୀ ସଙ୍ଗଠନ ଇଡବ୍ଲ୍ୟୁ-୨୦ର ମିଳିତ ଉଦ୍ୟମରେ ଏଭଳି ଏକ ସ୍ବତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଥିଲା। ଉକ୍ତ କାର୍ଯ୍ୟକ୍ରମରେ ଦେଶର ବିଭିନ୍ନ ପ୍ରାନ୍ତରୁ ୫,୫୦୦ରୁ ଅଧିକ ମହିଳା ଯୋଗ ଦେଇଥିଲେ । ବିଶେଷ କରି ମହିଳାମାନଙ୍କୁ ଶାରୀରିକ, ମାନସିକ ଏବଂ ଅଧ୍ୟାତ୍ମିକ ଭାବେ ଦୃଢ କରିବ ବୋଲି ସ୍ବାମୀ ରାମଦେବ ଉକ୍ତ କାର୍ଯ୍ୟକ୍ରମରେ ଗୁରୁତ୍ୱାରୋପ କରିବା ସହିତ ଯୋଗାସନ ସହ ଜଡିତ ବିଶେଷ ଶିକ୍ଷା ଦେଇଛନ୍ତି। ଏହି ପରିପ୍ରେକ୍ଷୀରେ ସ୍ବାମୀ ରାମଦେବ କହିଛନ୍ତି, ଯୋଗ କେବଳ ଭାରତ ନୁହେଁ ବିଶ୍ୱବ୍ୟାପୀ ହେବ। ଯୋଗଧର୍ମ ସହ ସାରାବିଶ୍ୱରେ ସନାତନ ଧର୍ମର ପ୍ରସାର ଦିଗରେ ବର୍ତ୍ତମାନ ଉଦ୍ୟମ ଜାରି ରହିଛି। ସେହିଭଳି ଭାରତ ସାରା ବିଶ୍ୱର ନେତୃତ୍ୱ ନେବାର କ୍ଷମତା ରଖିଛି। ଏପରିକି ଏକ ସୁସ୍ଥ,ସମର୍ଥ, ସଂସ୍କାରୀ ଏବଂ ପରମ ବୈଭବଶାଳୀ ଭାରତ ଗଠନ ଦିଗରେ ମହିଳାମାନଙ୍କର ସବୁଠାରୁ ବଡ ଭୂମିକା ରହିଛି। ଉକ୍ତ କାର୍ଯ୍ୟକ୍ରମରେ ସାଧ୍ୱୀ ଦେବପ୍ରିୟା ଏବଂ ଡ.ଏନ.ପି ସିଂ ପ୍ରମୁଖ ଉପସ୍ଥିତ ଥିଲେ ।
