ଭୁବନେଶ୍ୱର,୧୨।୯: ପତଞ୍ଜଳି ଯୋଗପୀଠର ସାଧାରଣ ସମ୍ପାଦକ ଆଚାର୍ଯ୍ୟ ବାଳକୃଷ୍ଣଙ୍କ ନେତ୍ୱତୃରେ ଅନେକ ନୂତନ ଗୁଣାତ୍ମକ ଔଷଧ ପତଞ୍ଜଳି ଅନୁସନ୍ଧାନ ସଂସ୍ଥାନ ପକ୍ଷରୁ ପ୍ରସ୍ତୁତ କରାଯାଇଛି। ବିଶେଷ କରି ଜଡ଼ି ବୁଟି ସାମଗ୍ରୀ ଉପରେ ଗବେଷଣା କରି ପତଞ୍ଜଳି ଅନୁସନ୍ଧାନ ସଂସ୍ଥାନ ଅନେକ ନୂଆ ଔଷଧ ପ୍ରସ୍ତୁତ କରିଛି। ଏପରିକି ଅଷ୍ଟ୍ରେଲିଆର ସ୍ବିନବର୍ଣ୍ଣ ବିଶ୍ବବିଦ୍ୟାଳୟର ପ୍ରଫେସର ଏବଂ ପତଞ୍ଜଳି ଅନୁସନ୍ଧାନ ସଂସ୍ଥାନ ପକ୍ଷରୁ କରାଯାଇଥିବା ଏକ ମିଳିତ ଗବେଷଣାରୁ ପ୍ରସ୍ତୁତ ବିଭିନ୍ନ ଆୟୁର୍ବେଦିକ ଔଷଧ ଶରୀର ପାଇଁ ଲାଭଦାୟକ ସାବ୍ୟସ୍ତ ହୋଇଛି। ଏ ନେଇ ଆଚାର୍ଯ୍ୟ ବାଳକୃଷ୍ଣ କହିଛନ୍ତି, ଏହି ନୂତନ ଗବେଷଣାଗୁଡିକ ବିଶ୍ବ ପ୍ରସିଦ୍ଧ ଅକ୍ସଫୋର୍ଡ ବିଶ୍ବବିଦ୍ୟାଳୟର ଫେମସ ମାଇକ୍ରୋବାୟୋଲୋଜି ଇକୋଲୋଜି ଜର୍ନାଲରେ ସାମିଲ କରାଯାଇଛି। ଏପରିକି ଉକ୍ତ ଜର୍ନାଲରେ ପତଞ୍ଜଳିର ଗବେଷଣା ସମ୍ପର୍କିତ ବିଭିନ୍ନ ଦିଗ ଉପରେ ବିସ୍ତୃତ ଆଲୋଚନା କରାଯାଇଛି। ସେହିଭଳି ଭାରତୀୟ ଆୟୁର୍ବେଦର ଶକ୍ତିକୁ ବିଦେଶୀ ବୈଜ୍ଞାନିକମାନେ ମଧ୍ୟ ଗ୍ରହଣ କରୁଥିବା ବେଳେ ଅଧିକ ଗବେଷଣା ପାଇଁ ଉତ୍ସାହ ଦେଖାଇଥିବାରୁ ଆଚାର୍ଯ୍ୟ ଖୁସି ପ୍ରକଟ କରିଛନ୍ତି। ଏହା ପୂର୍ବରୁ ମଧ୍ୟ ପତଞ୍ଜଳିର ଗବେଷଣାକୁ ଏଲସିଭିଅର, ସ୍ପ୍ରିଙ୍ଗର, ଫ୍ରଣ୍ଟିୟର, ନେଚର, ମଲିକ୍ୟୁଲ୍ସ, ବାୟୋମଲିକ୍ୟୁଲ୍ସ, ଜର୍ନାଲ ଅଫ ସେପାରେଶନ ସାଇନ୍ସ, ଜର୍ନାଲ ଅଫ ଇନଫ୍ଲେମେଶନ ରିସର୍ଚ୍ଚ, ନାନୋସ୍କେଲ ଆଡଭାନ୍ସେସ ଆଦିରେ ଦେଖିବାକୁ ମିଳିଥିଲା। ଅପରପକ୍ଷରେ ପତଞ୍ଜଳି ସମ୍ପୂର୍ଣ୍ଣ ବୈଜ୍ଞାନିକ ପଦ୍ଧତିରେ କାର୍ଯ୍ୟ କରୁଥିବା ବେଳେ ଏନ୍ଏବିଏଲ୍ ମାନ୍ୟତାପ୍ରାପ୍ତ ଲାବ୍ ଓ ପଶୁଙ୍କ ଦେହରେ ପରୀକ୍ଷଣ ସମେତ ଅନ୍ୟାନ୍ୟ ସବୁ ପ୍ରକାର ସୁବିଧା ପତଞ୍ଜଳି ଅନୁସନ୍ଧାନ ସଂସ୍ଥାନରେ ଉପଲବ୍ଧ ବୋଲି ଆଚାର୍ଯ୍ୟ ମତପ୍ରକାଶ କରିଛନ୍ତି।