କଟକ,୫ା୧(କାର୍ତ୍ତିକ ସାହୁ)ମାଧ୍ୟମିକ ଶିକ୍ଷା ପରିଷଦ (ବୋର୍ଡ) ଦ୍ୱାରା ପରିଚାଳିତ ପଠାଣି ସାମନ୍ତ ଗଣିତ ମେଧାବୃତ୍ତି ପରୀକ୍ଷା ନିମନ୍ତେ ଫର୍ମ ପୂରଣ ଆସନ୍ତା ୭ରୁ ୧୭ ତାରିଖ ପର୍ଯ୍ୟନ୍ତ ଅନ୍ଲାଇନ୍ ଜରିଆରେ ହେବ। ସରକାରୀ ସ୍ବୀକୃତିପ୍ରାପ୍ତ ସମସ୍ତ ଓଡ଼ିଆ ମାଧ୍ୟମ ପ୍ରାଥମିକ, ଉଚ୍ଚ ପ୍ରାଥମିକ, ୟୁଜିଏମ୍ଇ, ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ/ପ୍ରଧାନ ଶିକ୍ଷକଙ୍କୁ ଏନେଇ ବୋର୍ଡ ପକ୍ଷରୁ ଅବଗତ କରାଯାଇଛି। ଷଷ୍ଠ ଶ୍ରେଣୀ ଛାତ୍ରୀଛାତ୍ରଙ୍କ ନିମନ୍ତେ ଷ୍ଟେଜ୍-୧ ପରୀକ୍ଷା ଏବଂ ନବମ ଶ୍ରେଣୀ ଛାତ୍ରୀଛାତ୍ରଙ୍କ ପାଇଁ ଷ୍ଟେଜ୍-୨ ପରୀକ୍ଷାର ବ୍ୟବସ୍ଥା ହୋଇଛି। ପ୍ରାଥମିକ, ଉଚ୍ଚ ପ୍ରାଥମିକ, ୟୁଜିଏମ୍ଇ ସ୍କୁଲ ଛାତ୍ରୀଛାତ୍ରଙ୍କ ଷ୍ଟେଜ୍-୧ ପରୀକ୍ଷାର ଫର୍ମ ପୂରଣ ବ୍ଲକ ଶିକ୍ଷାଧିକାରୀଙ୍କ ଜରିଆରେ ଏବଂ ଉଚ୍ଚ ବିଦ୍ୟାଳୟର ଛାତ୍ରୀଛାତ୍ରଙ୍କ ଷ୍ଟେଜ୍-୧ ଓ ଷ୍ଟେଜ୍-୨ ପରୀକ୍ଷା ଫର୍ମ ପୂରଣ ଶିକ୍ଷାନୁଷ୍ଠାନ ମୁଖ୍ୟଙ୍କ ଜରିଆରେ କରାଯିବ। ଅନ୍ଲାଇନ ଆବେଦନ ପାଇଁ ବୋର୍ଡ ଓ୍ବେବ୍ସାଇଟ୍ www.bseodisha.ac.inରେ ଲିଙ୍କ୍ ଆବେଦନ ସମୟସୀମା ମଧ୍ୟରେ ଉପଲବ୍ଧ ହେବ। ମେଧାବୃତ୍ତି ପରୀକ୍ଷା ନିମନ୍ତେ କୌଣସି ଦେୟ ଦାଖଲ କରିବାକୁ ପଡ଼ିବ ନାହିଁ। ଆବେଦନ କରିବାର ନିୟମାବଳୀ ଏବେ ଓ୍ବେବ୍ସାଇଟ୍ରେ ଉପଲବ୍ଧ ହୋଇଛି। ପରୀକ୍ଷାର ଧାର୍ଯ୍ୟ ତାରିଖ ପରବର୍ତ୍ତୀ ସମୟରେ ବିଜ୍ଞପ୍ତି ଜରିଆରେ ଅବଗତ କରାଯିବ ବୋଲି ବୋର୍ଡ ପକ୍ଷରୁ ସୂଚନା ଦିଆଯାଇଛି।
