ତେନ୍ତୁଳିଖୁଣ୍ଟି,୧୩।୪(ଡି.ଏନ୍.ଏ.): ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ଖାତିଗୁଡ଼ାସ୍ଥିତ ଇନ୍ଦ୍ରାବତୀ ପ୍ରକଳ୍ପ ଡାକ୍ତରଖାନା ଉପରେ ସଦର ବ୍ଲକର ୪, ନନ୍ଦାହାଣ୍ଡି ବ୍ଲକର ୨, କଳାହାଣ୍ଡି ଥୁଆମୂଳ ରାମପୁର ବ୍ଲକର ୫ ଓ କୋରାପୁଟ ଜିଲା ଦଶମନ୍ତପୁର ବ୍ଲକର ୨ ପଞ୍ଚାୟତବାସୀ ନିର୍ଭର କରନ୍ତି। ରୋଗୀଙ୍କୁ ସ୍ବାସ୍ଥ୍ୟସେବା ମିଳୁଛି। କିନ୍ତୁ ଔଷଧ ବାହାରୁ କିଣିବାକୁ ପଡ଼ୁଛି। ନିରାମୟ ଯୋଜନାରେ ରାଜ୍ୟ ସାରା ସମସ୍ତ ସରକାରୀ ଡାକ୍ତରଖାନାରେ ମାଗଣା ଔଷଧ ମିଳୁଥିବାବେଳେ ଉକ୍ତ ଡାକ୍ତରଖାନା ଇନ୍ଦ୍ରାବତୀ ଓ କୋଲାବ ବେସିନ ପ୍ରକଳ୍ପ ଦ୍ୱାରା ପରିଚାଳିତ ହେତୁ ଏହି ସୁବିଧା ଏଠାରେ ମିଳୁନାହିଁ। ଉକ୍ତ ଡାକ୍ତରଖାନା କେବେ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗକୁ ଯିବ ସେ ନେଇ କୌଣସି ନିଷ୍ପତ୍ତି ରାଜ୍ୟ ସରକାର ନେଇନାହାନ୍ତି।
ସୂଚନାନୁଯାୟୀ, ସ୍ବାସ୍ଥ୍ୟ ବିଭାଗକୁ ଏହି ପ୍ରକଳ୍ପ ଡାକ୍ତରଖାନା ନ ଯିବା ପର୍ଯ୍ୟନ୍ତ ତେନ୍ତୁଳିଖୁଣ୍ଟି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରୁ ଔଷଧ ଯୋଗାଇଦେବା ବ୍ୟବସ୍ଥା ତତ୍କାଳୀନ ନବରଙ୍ଗପୁର ଜିଲାପାଳ ଅଜିତ ମିଶ୍ର ବ୍ୟବସ୍ଥା କରିଥିଲେ। ୨ ଡାକ୍ତର, ୨ ଫାର୍ମାସିଷ୍ଟ ଓ ୩ ଜଣ ଏଏନ୍ଏମ୍ଙ୍କୁ ଏହି ପ୍ରକଳ୍ପ ଡାକ୍ତରଖାନାରେ ନିଯୁକ୍ତି ମିଳିଥିଲା। କିନ୍ତୁ ୨ଡାକ୍ତର, ଜଣେ ଫାର୍ମାସିଷ୍ଟଙ୍କ ବଦଳି କରାଯିବାରୁ ଇନ୍ଦ୍ରାବତୀର ଲୋକେ ଆନ୍ଦୋଳନ ଧମକ ଦେଇଥିଲେ। ଏଥିସହ ଡାକ୍ତରଖାନାର ଦୁରବସ୍ଥା ନେଇ ଖବର ପ୍ରକାଶ ପରେ ବର୍ତ୍ତମାନର ଜିଲାପାଳ କମଳଲୋଚନ ମିଶ୍ର ଏଥିରେ ହସ୍ତକ୍ଷେପ କରିଥିଲେ। ସେ ୨ଡାକ୍ତର, ଜଣେ ଫାର୍ମାସିଷ୍ଟ ଓ ଜଣେ ଲାବ୍ ଟେକ୍ନିସିଆନଙ୍କୁ ଏଠାକୁ ପଠାଇଥିଲେ। ଏବେ ଜଣେ ଫାର୍ମାସିଷ୍ଟଙ୍କୁ ଏଠାରୁ ବଦଳି କରାଯିବା ପରେ ଏବେ ନିରାମୟ ଯୋଜନା ଔଷଧ ଡାକ୍ତରଖାନାକୁ ଆସୁନାହିଁ। ଏଣୁ ରୋଗୀଙ୍କୁ ବାହାରୁ ଔଷଧ କିଣିବାକୁ ପଡୁଛି। ଏଭଳି ଅବସ୍ଥା ଜାରି ରହିଲେ ଡାକ୍ତରଖାନା ଆଗ ଭଳି ହୋଇଯିବ ବୋଲି ବୁଦ୍ଧିଜୀବୀ କହିଛନ୍ତି। ବିଭିନ୍ନ ସମୟରେ ଇନ୍ଦ୍ରାବତୀ ପ୍ରକଳ୍ପ ପରିଚାଳିତ ଡାକ୍ତରଖାନା ଓ ବିଦ୍ୟାଳୟର ସମସ୍ୟା ସମାଧାନ ପାଇଁ ଅଞ୍ଚଳବାସୀ ଦାବି କରିଛନ୍ତି। କିନ୍ତୁ ଏହାର ସ୍ଥାୟୀ ସମାଧାନ ହୋଇପାରୁନାହିଁ। ଏଠି କଲେଜର ଅବସ୍ଥା ମଧ୍ୟ ତଦ୍ରୂପ। ବିସ୍ଥାପିତ କଲୋନି ରାସ୍ତା ଓ କୋଠାବାଡ଼ି ମଧ୍ୟ ଦୀର୍ଘ ଦିନ ହେଲା ମରାମତି ହୋଇନାହିଁ। ମୁଖ୍ୟ ଦପ୍ତର ଏଠାରୁ ଉଠି ଜୟପୁର ଚାଲିଯିବା ପରେ ବିସ୍ଥାପିତମାନେ ଆର୍ଥିକ ଦୁର୍ଗତି ଦେଇ ଗତି କରୁଛନ୍ତି। ଗୁହାରି କଲେ ମଧ୍ୟ କେହି ଶୁଣିବାକୁ ନାହାନ୍ତି ବୋଲି ବିସ୍ଥାପିତମାନେ କହିଛନ୍ତି। ଡାକ୍ତରଖାନା ଅବ୍ୟବସ୍ଥା ସମ୍ପର୍କରେ ସିଡିଏମ୍ଓ ଡାକ୍ତର କାଳିପ୍ରସାଦ ବେହେରାଙ୍କୁ ପଚାରିବାରୁ, ଡାକ୍ତରଖାନାକୁ ଦିନେ ଦୁଇ ଦିନ ମଧ୍ୟରେ ଜଣେ ଫାର୍ମାସିଷ୍ଟ ଯୋଗାଇ ଦିଆଯିବ। ନିରାମୟ ଯୋଜନାର ଔଷଧ ପାଇଁ କହିଦେବେ। ସେଠାରେ କିଭଳି ୨୪ ଘଣ୍ଟା ରୋଗୀସେବା ମିଳିବ ସେ ବ୍ୟବସ୍ଥା କରିବେ ବୋଲି ସିଡିଏମ୍ଓ ପ୍ରତିଶ୍ରୁତି ଦେଇଛନ୍ତି।