ଗଞ୍ଜାମ,୨୨।୧୧(ଡି.ଏନ୍.ଏ.): ଗଞ୍ଜାମ ସହର ବଡ଼ ବଜାର ସ୍ଥିତ ବହୁ ପୁରାତନ ଗଞ୍ଜାମ ସ୍ବାସ୍ଥ୍ୟକେନ୍ଦ୍ର ଏବେ ଅବ୍ୟବସ୍ଥା ଘେରରେ ରହିଛି। ବିପଦ ସଙ୍କୁଳ ଅବସ୍ଥାରେ ଚାଲିଛି ରୋଗୀସେବା। ମେଡିକାଲ କୋଠାଗୁଡିକ ଭାଙ୍ଗିରୁଜି ଯାଇଥିବା ବେଳେ ବ୍ରହ୍ମପୁର ଏମ୍କେସିଜି ମେଡିକାଲରୁ କଂକ୍ରିଟ ଖସିଲା ଭଳି ଏହି ମେଡିକାଲ ଛାତରୁ କଂକ୍ରିଟ ଖସିବା ଆରମ୍ଭ ହେଲାଣି। ମେଡିକାଲ ଅଫିସରଙ୍କ କୋଠରୀ, ଆୟୁଷ ଡାକ୍ତରଙ୍କ କୋଠରୀ ଏବଂ ରକ୍ତ ପରୀକ୍ଷା ହଲ୍ ମଧ୍ୟ ବିପଦ ସଙ୍କୁଳ ଅବସ୍ଥାରେ ଥିବା ଦେଖିବାକୁ ମିଳିଛି। ଏହି ସ୍ବାସ୍ଥ୍ୟ କେନ୍ଦ୍ରଟି ରାସ୍ତା ପାର୍ଶରେ ଥିବା ହେତୁ ପୁରୀ ଜିଲା କୃଷ୍ଣ ପ୍ରସାଦ ବ୍ଲକ ଓ ଗଞ୍ଜାମ ବ୍ଲକର ପ୍ରାୟ ଅଧିକାଂଶ ପଞ୍ଚାୟତ ଏବେ ଏନ୍ଏସିର ୧୨ଟି ୱାର୍ଡର ଲୋକମାନେ ଚିକିତ୍ସା ପାଇଁ ଏହି ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭର କରିଥାନ୍ତି। ଏଥିସହ ପ୍ରାଥମିକ ଚିକିତ୍ସା ପାଇଁ ଦୈନନ୍ଦିନ ଶହ ଶହ ରୋଗୀଙ୍କ ଭିଡ଼ ଜମୁଥିବା ବେଳେ ଜିଲା ସ୍ବାସ୍ଥ୍ୟ ବିଭାଗ ଏଥିପ୍ରତି ଦୃଷ୍ଟି ଦେବାକୁ ସ୍ଥାନୀୟ ଅଞ୍ଚଳବାସୀ ଦାବୀ କରିଛନ୍ତି।