ବାରଙ୍ଗ,୧୦।୧୦(ଡି.ଏନ୍.ଏ.): ବିନା ପ୍ରମାଣପତ୍ରରେ ରୋଗୀ ସେବା କରିବା ଜଣେ ଡାକ୍ତରଙ୍କୁ ମହଙ୍ଗା ପଡ଼ିଛି। ଜଣେ ରୋଗୀଙ୍କ ଦେହ ସୁସ୍ଥ ହେବା ବଦଳରେ ବିଗିଡ଼ିବାରୁ ପରିବାର ଲୋକ ଥାନାରେ ଅଭିଯୋଗ କରିଥିଲେ। ଅଭିଯୋଗକ୍ରମେ ଚନ୍ଦକା ଥାନା ପୋଲିସ ଉକ୍ତ ନକଲି ଡାକ୍ତରଙ୍କୁ ଶନିବାର ଗିରଫ କରିଛି। ସେ ହେଲେ ଏହି ଥାନା ଗଙ୍ଗପଡା ଭାତକୁରିର ଜାନକୀ ବଲ୍ଲଭ ପଟ୍ଟନାୟକ। ଏ ନେଇ ପୋଲିସ ମାମଲା(ନଂ.୨୪୨/୨୧) ରୁଜୁ କରି ତଦନ୍ତ ଚଳାଇଛି।
ସୂଚନାଯୋଗ୍ୟ, ଗଙ୍ଗପଡ଼ା ଗ୍ରାମର ମୀନାକରୀ ଦାସ କର୍କଟ ରୋଗରେ ପୀଡ଼ିତ ହୋଇ ସ୍ଥାନୀୟ ଡାକ୍ତରଖାନାରେ ଚିକିତ୍ସିତ ହେଉଥିଲେ। ସେଠାରେ ଜଣେ ବ୍ୟକ୍ତି ଜାନକୀଙ୍କ ପାଖରେ ଦେଖାଇଲେ ଆରୋଗ୍ୟ ହୋଇଯିବ ବୋଲି କହିଥିଲେ। ପରେ ରୋଗୀଙ୍କ ପରିବାରଲୋକ ବିଶ୍ୱାସ କରି ହସ୍ପିଟାଲ ଛାଡ଼ି ଜାନୁୟାରୀ ୨୦୨୧ ପରଠାରୁ ଜାନକୀଙ୍କ ଅଧୀନରେ ଚିକିତ୍ସିତ ହୋଇଥିଲେ। ଚିକିତ୍ସା ସତ୍ତ୍ୱେ ମୀନାଙ୍କ ସ୍ବାସ୍ଥ୍ୟ ଖରାପ ହେବାରେ ଲାଗିଥିଲା। ପରିବାର ଲୋକଙ୍କ ସନ୍ଦେହ ହେବାରୁ ମୀନାଙ୍କ ଭାଇ ପ୍ରଦୀପ୍ତପ୍ରସାଦ ରାମ ମେଣ୍ଢାଶାଳ ଫାଣ୍ଡିରେ ଅଭିଯୋଗ କରିଥିଲେ। ଚନ୍ଦକା ଥାନା ଅଧିକାରୀ ଦେବେନ୍ଦ୍ର ବିଶ୍ୱାଳ ଅଭିଯୋଗ ଆଧାରରେ ଜାନକୀଙ୍କୁ ଥାନାକୁ ଆଣିଥିଲେ। ଯାଞ୍ଚବେଳେ ତାଙ୍କର କୌଣସି ପ୍ରାମାଣିକ ପ୍ରମାଣପତ୍ର ଦେଖାଇପାରି ନ ଥିଲେ।